نۇر-سۇلتان قالاسىنىڭ اكىمى التاي كولگىنوۆ الداعى اتقارىلاتىن جۇمىستاردىڭ تىزبەسىن اتاپ ءوتتى:
ءبىرىنشى. ب.مومىش ۇلى داڭعىلىنداعى پروبلەمالىق ۋچاسكەسىندە ورنالاسقان جاۋىن-شاشىن سۋ كارىزىنىڭ ماگيسترالدى كوللەكتورىنىڭ قۇرىلىسىن اياقتايمىز. بۇل جاۋىن-شاشىن سۋ كارىزىنىڭ ۇزىندىعى – 500 مەتر, داۋىلپاز كوشەسىنەن ەلىم-اي كوشەسىنە دەيىن جالعاسادى (ب.مومىش ۇلى داڭعىلىنان وتەدى). جاڭا قۇرىلىس قازىرگى جاۋىن-شاشىن سۋ كارىزى جەلىلەرىنىڭ سۋ وتكىزۋ مۇمكىندىگىن ءبىر جارىم ەسە ارتتىرادى.
ەكىنشى. بۇعان قوسا "مولوديوجنىي" شاعىن اۋدانىندا (تاشەنەۆ پەن اممان كوشەلەرىنىڭ قيىلىسى) تازارتۋ قوندىرعىلارىن سالىپ جاتىرمىز. ول جەردە كوللەكتورلاردى دا تولىق قالپىنا كەلتىرەمىز. بۇرىن بۇل جەر باتپاقتى بولعان.
بۇل قوندىرعىلاردىڭ ايىرماشىلىعىنا كەلسەك, ولار جاڭبىر جانە قار سۋىن ەسىل وزەنىنە جىبەرمەس بۇرىن تازارتۋعا مۇمكىندىك بەرەدى. بۇرىن سۋ اعىنى تىكەلەي وزەنگە اعاتىندىقتان, وزەندى لاستاپ, قالا ەكولوگياسىنا زيان تيگىزەتىن. بۇل قۇرىلىستى 2021 جىلى اياقتاۋدى جوسپارلاپ وتىرمىز. بىراق ءبىرىنشى كەزەڭ – سۋ تازارتۋدى بيىل كۇزدە ىسكە قوسامىز.
"مولوديوجنىي" شاعىن اۋدانىنداعى جاڭا قوندىرعىلاردىڭ قۋاتى تاۋلىگىنە 42 مىڭ تەكشە مەتر. بۇل تازارتۋ قوندىرعىلارى تاشەنەۆ, باراەۆ, ءۋاليحانوۆ, يمانباەۆ كوشەلەرى مەن رەسپۋبليكا داڭعىلىن سۋ باسۋىنا جول بەرمەيدى. سەبەبى تازارتۋ قوندىرعىسى جەر استىندا سالىنىپ, ونىڭ ۇستىنەن اباتتاندىرىلعان, كوگالداندىرىلعان سكۆەر سالىنادى.
ءۇشىنشى. بيىلعى جىلدىڭ سوڭىنا دەيىن تەلمان تۇرعىن الابىندا تازارتۋ قوندىرعىلارى مەن ماگيسترالدى كوللەكتور قۇرىلىسى بويىنشا جۇمىستى اياقتايمىز. ونىڭ قۋاتى تاۋلىگىنە 36 مىڭ تەكشە مەتردى قۇرايدى. جوبانى جۇزەگە اسىرۋ جەر بەتىندەگى سۋاعارلاردىڭ بۇرىلۋىن قامتاماسىز ەتۋگە مۇمكىندىك بەرەدى. ول تەلمان تۇرعىن الابى مەن № 27 كوشەسىنىڭ بويىن قامتيدى.
ءتورتىنشى. بيىل پريگورودنىي تۇرعىن الابى مەن الاش تاس جولى بويىنداعى لوگيستيكا ورتالىعى اۋدانىندا تازارتۋ قوندىرعىلارىن سالدىق.
