ەسىل اۋدانى بويىنشا "گۋسينوە" اڭشىلىق شارۋاشىلىعىنىڭ قورىقشىسىمەن بىرلەسكەن رەيد بارىسىندا سقو پد جەرگىلىكتى پوليتسيا قىزمەتى باسقارماسىنىڭ تابيعاتتى قورعاۋ پوليتسياسى توبىنىڭ اعا ينسپەكتورى اسحات قوجاباەۆ تەلەفون حابارلاماسىن العان. كۋاگەر توراڭعۇل كولىنىڭ ار جاعىنداعى ەگىستىكتە بەلگىسىز ادامدار اۆتوكولىكپەن اڭ قۋىپ ءجۇرىپ, ەلىكتى اتقانى تۋرالى حابارلاعان. حابارلاما سول ساتتە اۋداندىق پوليتسيا بولىمىنە تاپسىرىلدى. وقيعا ورىن العان جەرگە جاقىن ماڭدا زاگرادوۆكا مەن بۇلاق اۋىلدىق وكرۋگتەرىنىڭ ۋچاسكەلىك ينسپەكتورلارى بولعان. پوليتسەيلەر "Audi 80" جانە "ۆاز 21060" اۆتوكولىكتەرىن باسقارعان اۋداننىڭ 1995 جانە 2000 جىلى تۋعان ەكى تۇرعىنىن ۇستادى. ولاردان ەكى اڭشى پىشاعى, 12 كاليبرلى پاترون, پنەۆماتيكالىق تاپانشا مەن اتىس جاراقاتى كەلتىرىلگەن جانە اياقتارى سىنعان ەلىكتىڭ دەنەسى الىندى. بۇل فاكتى قر قىلمىستىق كودەكسىنىڭ 337-بابى 3-بولىگى (زاڭسىز اڭشىلىق) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. كۇدىكتىلەرگە قاتىستى مىندەتتى كەلۋ تۇرىندەگى بۇلتارتپاۋ شاراسى تاعايىندالدى, اتىس قارۋىن ىزدەۋ بويىنشا شارالار قابىلداندى. كەلتىرىلگەن شىعىن سوماسى انىقتالۋدا.
– كۇز كەزىندەگى اڭ اۋلاۋ ماۋسىمىندا ورمان شارۋاشىلىعىمەن بىرلەسكەن رەيد كۇشەيتىلدى. پوليتسيا بولىنىستەرىنە وبلىستىڭ بيورەسۋرستارىن براكونەرلىك جولمەن اۋلاۋدان قورعاۋعا باعىت بەرىلدى. جۇمىس مۇددەلى ۆەدومستۆولاردىڭ وكىلدەرىمەن بىرلەسە جۇرگىزىلۋدە. جىل باسىنان سقو-دا ەكولوگيا سالاسىندا 14 قىلمىستىق ءىس تىركەلىپ, اڭ اۋلاۋ قاعيدالارىنىڭ 393 بۇزۋشىلىعى انىقتالدى. ەڭ كوپ كەزدەسەتىن بۇزۋشىلىق – قارۋدى ساقتاۋ, تاسىلمالداۋ قاعيدالارىن بۇزۋ مەن رۇقسات قۇجاتتارىنىڭ بولماۋى, – دەيدى اسحات قوجاباەۆ.
