ەكونوميكا • 14 قىركۇيەك، 2020

شاعىن جانە ورتا بيزنەس قولداۋدى قاجەت ەتەدى - اليك شپەكباەۆ

46 رەت كورسەتىلدى

سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ا.ج. شپەكباەۆ Facebook جەلىسىندەگى جەكە پاراقشاسىندا بيزنەس پەن ينۆەستيتسيانى قورعاۋ جونىندە جازبا جاريالادى، دەپ حابارلايدى Egemen.kz.

"دوستار، بيزنەس پەن ينۆەستيتسيالاردى سىبايلاس جەمقورلىق قىسىمىنان جانە اكىمشىلىك كەدەرگىلەردەن قورعاۋ – ەلدىڭ كۇن تارتىبىندەگى نەگىزگى باسىمدىقتارىنىڭ ءبىرى ەكەنى ءسوزسىز. وسى جىلدىڭ 19 تامىزىندا سىبايلاس جەمقورلىققا قارسى ءىس-قيمىل ماسەلەلەرى جونىندەگى كەڭەيتىلگەن كەڭەستە مەملەكەت باسشىسى وسى باعىتتى كۇشەيتۋگە باسا نازار اۋداردى. بۇل ماسەلە جىل سايىنعى جولداۋدا دا ناقتى ايقىندالدى. شاعىن جانە ورتا بيزنەس COVID-19 پاندەمياسى جاعدايىندا قيىن كەزەڭدى باستان كەشۋدە. قازىر شوب بۇرىنعىدان دا زور قولداۋدى قاجەت ەتەدى. وسى تۇرعىدان العاندا كاسىپكەرلىك قىزمەتكە زاڭسىز ارالاسۋ "مەملەكەتكە قارسى ەڭ اۋىر قىلمىس" رەتىندە قاراستىرىلۋى ءتيىس. شاعىن بيزنەس بويىنشا حالىقارالىق كەڭەستىڭ (ICSB) دەرەكتەرىنە سايكەس، شوب الەمدەگى بارلىق كاسىپورىنداردىڭ 90%-دان استامىن قۇراپ، شامامەن حالىقتى جالپى 70% جۇمىسپەن قامتۋدى جانە ءىجو-ءنىڭ 50%-ىن قامتاماسىز ەتەدى"، دەپ جازدى اليك شپەكباەۆ.

ونىڭ ايتۋىنشا، ازاماتتاردىڭ ءال-اۋقاتى جەكە سەكتورداعى ىستەردىڭ احۋالىنا تىكەلەي بايلانىستى ەكەنىن ناقتى ءتۇسىنۋ قاجەت.

"بۇل – سالىق تۇسىمدەرى، جۇمىس ورىندارىن قۇرۋ، جاڭا تەحنولوگيالار جانە ادام كاپيتالىن دامىتۋ. ءبىر سوزبەن ايتقاندا، بيزنەس مەملەكەتكە حالىق الدىنداعى الەۋمەتتىك مىندەتتەمەلەردى ورىنداۋعا كومەكتەسەدى. ءبىز بيزنەسكە نەعۇرلىم ءتيىمدى جاعداي جاساساق، سوعۇرلىم ول ءونىمدى جۇمىس ىستەپ، قوعامعا پايدا اكەلەدى. اگەنتتىك سوڭعى ءۇش جىلدا شەنەۋنىكتەردىڭ زاڭسىز ارالاسۋىنان مىڭنان استام كاسىپكەردىڭ مۇددەلەرىن قىلمىستىق-قۇقىقتىق شارالارمەن قورعادى. بۇل جۇمىس جالعاسىن تابادى. سونىمەن قاتار سىبايلاس جەمقورلىققا قارسى قىزمەتتىڭ ءاربىر وفيتسەرى بيزنەس ىسىنە ارالاسۋ فاكتىلەرىنە جول بەرمەۋ تۋرالى جەكە ەسكەرتىلدى.

بۇگىن مەن كەشەندى الدىن الۋ باعىتىنا تولىعىراق توقتالعىم كەلەدى. 2018 جىلدان باستاپ ءبىز سىرتقى ىستەر مينيسترلىگىمەن، "Kazakh Invest "ۇك" اق-مەن جانە "اتامەكەن" ۇكپ-مەن بىرلەسىپ "Protecting business and investments" جوباسىن ىسكە اسىرىپ كەلەمىز. قازىرگى ۋاقىتتا وعان جاڭا سەرپىن بەرىلدى. نەگىزگى ماقسات – بيزنەس پەن ينۆەستورلاردىڭ قىزمەت ۇدەرىستەرىن سىبايلاس جەمقورلىققا قارسى سۇيەمەلدەۋ ارقىلى ولاردىڭ مەملەكەتتىك بيلىك ينستيتۋتتارىنا سەنىمىن ارتتىرۋ"، دەلىنگەن جازبادا.

سونداي-اق ول كاسىپكەرلەردىڭ تۋىنداعان ماسەلەلەرىن شەشۋدە قۇقىقتىق الاڭ اياسىندا كومەك كورسەتىلەتىنىن ايتىپ وتكەن.

"وكىنىشكە قاراي، كاسىپكەرلەر كوپ جاعدايدا بيۋروكراتيالىق كىدىرىستەر مەن قاعازباستىلىقتى باستان كەشىرە وتىرىپ، "كابينەتتەر ارالاۋعا" ءماجبۇر. الايدا، ولار جالعىز كۇرەسۋگە ءتيىستى ەمەس. بۇگىنگى تاڭدا ءبىزدىڭ اۋماقتىق دەپارتامەنتتەرىمىزدىڭ سىبايلاس جەمقورلىققا قارسى سۇيەمەلدەۋىمەن جالپى ينۆەستيتسيا سوماسى 12 ترلن تەڭگەدەن اساتىن 500-دەن استام بيزنەس-جوبا جۇزەگە اسىرىلۋدا. جوبالاردىڭ 20%-ى – شەتەلدىك ينۆەستورلاردىڭ سالىمى. ولاردىڭ كوبىسى قىتاي، رەسەي، گەرمانيا جانە تۇركيا ەلدەرىنەن. ءباا، اقش، پولشا، نيدەرلاند جانە باسقا دا ەلدەردىڭ بيزنەسمەندەرىنىڭ قاتىسۋىن اتاپ وتكىم كەلەدى. ءىس جۇزىندە ءاربىر ەكىنشى جوبا – وڭدەۋ ونەركاسىبى سالالارىندا، ءاربىر بەسىنشى جوبا – اۋىل شارۋاشىلىعىندا ىسكە اسۋدا.

ءبىز ىلەسپە بيزنەس جۇگىنەتىن پروبلەمالىق ماسەلەلەردى زەرتتەدىك. ولار نەگىزىنەن ينۆەستورلىق ۆيزالارعا، ليتسەنزيالارعا، سالىق سالۋعا، كەدەندىك باجدارعا، جوسپاردان تىس تەكسەرۋلەرگە جانە جەر قاتىناستارىنا قاتىستى"، دەدى ول.

سونىمەن قاتار ول بيزنەسپەن جۇمىس ء"بىر قاقپانىڭ ويىنى" بولماۋى كەرەك ەكەنىن اتاپ ءوتتى.

"كاسىپكەرلەردىڭ وزدەرى مەملەكەتتىك ورگاندارمەن ءوزارا ءىس-قيمىل كەزىندە زاڭسىز ءىس-ارەكەتتەردىڭ باستاماشىسى بولاتىن جاعدايلار ءجيى كەزدەسەدى. اگەنتتىكتىڭ بيزنەس-جوبانى سىبايلاس جەمقورلىققا قارسى سۇيەمەلدەۋىنىڭ نەگىزگى شارتى – شەتەلدىك، سونداي-اق وتاندىق ينۆەستور بىردەي شارتتا ادال بيزنەس جۇرگىزۋگە مىندەتتەنەتىن كەلىسىمگە قوسىلۋ. بۇل باعىتتا كاسىپكەرلەردىڭ ساناسىن وزگەرتۋ ماڭىزدى. ىستەردى جۇرگىزۋ كەزىندە پاراساتتىلىق بەرىك ستاندارت بولۋى كەرەك. بۇعان حالىقارالىق ۇيىمداردىڭ بىرقاتار ۇسىنىمى، اتاپ ايتقاندا، "شىعىس ەۋروپا مەن ورتا ازياداعى بيزنەستىڭ پاراساتتىلىعى" جانە "بيزنەستى جاۋاپتى جۇرگىزۋ" اتتى ەىدۇ-نىڭ سىبايلاس جەمقورلىققا قارسى ستاندارتتارى مەن زەرتتەۋلەرى دالەل بولا الادى"، دەلىنگەن جازبادا.

ونىڭ ايتۋىنشا، بۇل ۇدەرىس كۆازيمەملەكەتتىك سەكتوردا سىبايلاس جەمقورلىققا قارسى كومپلاەنس ينستيتۋتىن تولىققاندى ەنگىزۋمەن ايتارلىقتاي جاندانادى. ءتيىستى زاڭ جوباسىن ءماجىلىس جانە ءبىرىنشى وقىلىمدا سەنات ماقۇلداعان.

"ەگەر ءسىزدىڭ بيزنەس-جوباڭىز ىسكەرلىك پاراساتتىلىق قاعيداتتارىن ساقتاي وتىرىپ جۇمىس ىستەۋگە دايىن بولسا، ءبىز ءوز تاراپىمىزدان ءسىزدى قولداپ، سىبايلاس جەمقورلىق كورىنىستەرى مەن اكىمشىلىك توسقاۋىلداردان قورعاۋعا دايىنبىز. ەگەر ءسىزدىڭ انتيكور-سۇيەمەلدەۋگە ءوتىنىم بەرۋ جانە كەلىسىمگە قوسىلۋ تۋرالى سۇراقتارىڭىز بولسا، +7 (707) 350-63-07 جانە +7 (701) 575-40-37 (WhatsApp) تەلەفوندارى بويىنشا جوبالىق كەڭسەنىڭ ۇيلەستىرۋشىلەرىنە جۇگىنە الاسىز. ولار اگەنتتىكتىڭ اۋماقتىق دەپارتامەنتتەرى جانىنداعى "Antikor Ortalyǵy" سەرۆيستىك ورتالىعىندا انتيكور مەن وڭىرلىك كاسىپكەرلەر پالاتاسىنىڭ قىزمەتكەرلەرىمەن كەزدەسۋىڭىزدى قامتاماسىز ەتەدى"، دەپ جازدى ا.شپەكباەۆ.

سوڭعى جاڭالىقتار

شىڭعىستاۋدىڭ شاكىرى

ادەبيەت • كەشە

جانى ىزگى جۋرناليست

ەگەمەن قازاقستان • كەشە

ۇقساس جاڭالىقتار