قازىردىڭ وزىندە اۋداندا 31 تۇرعىن ءۇيدىڭ ىرگەلىك جەرىنە تامشىلاتىپ سۋعارۋ ءادىسىن ەنگىزدى. سولاردىڭ ءبىرى جىلاندى ەلدى مەكەنىنىڭ تۇرعىنى ايتباەۆا گۋلباحيرا ابدۋللاقىزى. "ناتيجيەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ" 2017-2021 جىلدارعا ارنالعان باعدارلاما اياسىندا "تامشىلاتىپ سۋعارۋ ءادىسى" جانە "مال شارۋاشىلىعىن دامىتۋ" باعىتىندا 555600 تەڭگەگە قايتارىمسىز گرانت الىپ, شاعىن اۋلاسىندا جۇمىسىن باستادى.
كوپبالالى انالارعا قولداۋ بەرىلەتىنىن ەستىگەن ول تەز ارادا قۇجاتتارىن جيناپ, ءوتىنىم بەرگەن. نەسيە العالى وتباسىنىڭ جاعدايى ەداۋىر جاقسارعان كورىنەدى. قارجىنىڭ 200 مىڭ تەڭگەسىنە "تامشىلاتىپ سۋعارۋ قۇرىلعىسىن", ال قالعان قارجىعا ساۋىندى سيىر ساتىپ العان.
"بۇگىندە تامشىلاتىپ سۋعارۋ قۇرىلعىسىن 10 سوتىق جەرىنە ورنالاستىردىق. ول جەرگە قىرىق قابات, قىزاناق, كارتوپ, قيار, بولگار بۇرىشىن ەكتىك. ەندى پىسكەن ءونىمنىڭ جەمىسى قىسقا ازىق بولادى", دەيدى كوپبالالى انا.
بۇدان وزگە, ساۋىن سيىردان شىعاتىن ءسۇتتى اۋداندىق "مايلىكەنت-ءسۇت" جشس وتكىزىپ, پايدا تاۋىپ وتىر.
