بۇگىنگى تاڭدا وبلىس بويىنشا 574 مىڭ گەكتار سۋارمالى القاپ بار. ال, «قازسۋشار» رمك تۇركىستان وبلىستىق بولىمشەسى ونىڭ 313 مىڭ گەكتارىن سۋارمالى سۋمەن قامتىپ وتىر.
«بيىلعى ۆەگيتاتسيالىق كەزەڭ سۋ تاپشىلىعىنا بايلانىستى كۇردەلى بولدى. بىزگە جىلدا كەلەتىن سۋ مولشەرى بيىل شامامەن 30% از بولدى. وسىعان وراي ەكولوگيا ءمينيسترى ماعزۇم مىرزاعاليەۆ, وبلىس اكىمى ومىرزاق شوكەەۆ بىرنەشە مارتە كورشىلەس وزبەكستان ەلىنە بارىپ, كەلىسسوزدەر جۇرگىزدى. ناتيجەسىندە ترانسشەكارالىق «دوستىق», «حانىم», «اچيناۋ» كانالدارىندا سۋدى ادىلەتتى ءبولۋ تۋرالى كەلىسىم جاسالدى. ايتا كەتۋ كەرەك, وزبەكستان قيىن كەزەڭگە قاراماستان ءوز ۋادەسىندە تۇرىپ, سۋدى كەلىسىم بويىنشا جىبەرىپ وتىردى. ال, ءبىزدىڭ تۇركىستان وبلىستىق بولىمشەسى تاۋلىك بويى جۇمىس ىستەپ, شارۋالاردى بارىنشا سۋمەن قامتىدى», دەدى د. كونوۆالوۆ.
«قازسۋشار» بولىمشەسى باستىعىنىڭ ايتۋىنشا, نەگىزىنەن تىك درەناجدى ۇڭعىمالارى قازۋ, سورعى بەكەتتەرىن ورناتۋ جانە سۋ بوگەتتەرىن سالۋ ارقىلى ءوڭىر شارۋالارى سۋمەن قامتىلعان.
سونداي-اق, بيىل وڭىردە كۇرىش داقىلىنىڭ كوپ ەگىلۋىنە بايلانىستى (جەتىساي جانە وتىرار اۋداندارىندا 5 مىڭ توننا) وزگە ءداندى داقىلدارعا سۋ جەتىسپەۋشىلىگى بايقالعان. تىعىرىقتان شىعۋ ءۇشىن بولىمشە ماماندارى اۆتوماتتى سۋ بوگەتتەرىن سالىپ, ايماقتاعى بارلىق ەگىن القاپتارىن قۇرعاقشىلىقتان امان الىپ قالعان. ناتيجەسىندە ماقتا, كۇرىش, كوكونىستەر مەن جەمىستەر بىتىك شىققان.
«بۇگىنگى تاڭدا وڭىردەگى سۋارۋ ناۋقانى 95% اياقتالدى. ناتيجە جامان ەمەس. قازىر سىرداريا وزەنىنىڭ ساعاسى بويىنشا اعاتىن سۋ مولشەرى سەكۋندىنا 42 تەكشە مەتردى قۇرايدى. ول شاردارا سۋ قويماسىنا جيناقتالۋدا. دەمەك, سۋ جەتكىلىكتى دەپ ايتۋعا تولىق نەگىز بار», دەدى ول.
قازىرگى تاڭدا بولىمشە سۋارمالى جۇيەلەردى قايتا جاڭعىرتۋ بويىنشا اۋقىمدى جۇمىس جۇرگىزۋدە. ماسەلەن مۇنداي شارالاردىڭ ءبىرى تۇلكىباس اۋدانىندا جۇزەگە اسىرىلۋدا.
«قازىر وڭىردەگى سۋارۋ جۇيەلەرى شامامەن 63% جۇمىس ىستەپ تۇر. سوندىقتان ءبىز بىرنەشە باعدارلاما بويىنشا جۇمىس جۇرگىزەتىن بولامىز. بارلىق كانالدار جەردى قازۋ ارقىلى تارتىلعان. ول بىرىنشىدەن سۋدىڭ ءسىڭىپ كەتۋىنە سەبەپ بولسا, ەكىنشىدەن قۇم قۇرامى دا ۇگىلگىش بولىپ كەلەدى. سوندىقتان جىلىنا 1-2 مارتە ارنالاردى تازارتىپ وتىرامىز. الداعى ۋاقىتتا كەزەڭ-كەزەڭىمەن ارنالاردى بەتوندايمىز»,- دەدى د. كونوۆالوۆ.
«قازسۋشار» رمك تۇركىستان وبلىستىق بولىمشەسى ديرەكتورىنىڭ ورىنباسارى سەرىك پىرىمقۇلوۆتىڭ سوزىنشە, وڭىردە 6 نىسان قايتا جاڭعىرتىلۋدا. تۇلكىباس اۋدانىندا – 2 نىسان جاڭارتىلىپ جاتىر. ونىڭ شەڭبەرىندە اۋدانداعى اۋىلداردىڭ بىرىنە باراتىن 5 بوگەت جانە 13 ماگيسترالدى كانال قايتا ىسكە قوسىلماق. بۇل جۇمىستارعا 300 تەحنيكا جۇمىلدىرىلعان.
«بۇل كانالعا ۇلكەن ءۇمىت ارتىپ وتىرمىز. ەگىن ەگۋىمىز ءۇشىن بىزگە ءبىرىنشى كەزەكتە سۋ كەرەك. اۋىل شارۋاشىلىعىنا قاجەتتى جەم-ءشوپتىڭ ءوسۋى دە وسى سۋعا بايلانىستى. اۋىلدىقتار ارنانىڭ ىسكە قوسىلاتىنىن ەستىپ قاتتى قۋانىپ جاتىر. اتقارىلىپ جاتقان جۇمىستاردى دا كوزبەن كورىپ وتىرمىز»,- دەدى قارابۇلاق اۋىلىنىڭ تۇرعىنى ەرجان ابدىحالىق اقساقال.
