پارلامەنت • 09 قىركۇيەك، 2020

ءماجىلىس بىرقاتار زاڭ جوباسىن ماقۇلدادى

13 رەت كورسەتىلدى

ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا پالاتا اكتىلەرىنە ادامداردى قازاقستان رەسپۋبليكاسىنىڭ شەگىنەن تىس شىعارىپ جىبەرۋ كەزىندە ۇستاۋ مەرزىمدەرىن رەتتەۋ ماسەلەلەرى بويىنشا دەپۋتاتتار ازىرلەگەن زاڭ جوباسىنا تۇزەتۋلەردى ءبىرىنشى وقىلىمدا ماقۇلدادى، دەپ حابارلايدى Egemen.kzء ماجىلىستىڭ ءباسپاسوز قىزمەتىنە سىلتەمە جاساپ.

زاڭ جوباسىن قابىلداۋ ادام قۇقىقتارىن قورعاۋ سالاسىنداعى ۇلتتىق زاڭناماعا حالىقارالىق ستاندارتتاردى ەنگىزۋ مۇمكىندىك بەرەدى.

سونداي-اق كونستيتۋتسيالىق كەڭەستىڭ ادامداردى (شەتەلدىكتەر مەن ازاماتتىعى جوق ادامداردى) ەلىمىزدەن تىسقارى جەرلەرگە شىعارىپ جىبەرۋ كەزىندە ۇستاپ الۋ مەرزىمدەرىن قوسىمشا زاڭنامالىق رەتتەۋ تۋرالى ۇسىنىستارىن ورىنداۋ، ولاردى ۇستاپ الۋ جانە كەيىننەن ىشكى ىستەر ورگاندارىنىڭ ارناۋلى مەكەمەلەرىنە ورنالاستىرۋ ءتارتىبىن رەگلامەنتتەۋدى قاراستىرادى.

وسى مىندەتتەردى ىسكە اسىرۋ ازاماتتاردىڭ، سونداي-اق شەتەلدىكتەر مەن ازاماتتىعى جوق ادامداردىڭ بوستاندىعىنا جانە جەكە باسىنا قولسۇعىلماۋشىلىعىنا قۇقىقتاردى قورعاۋ سالاسىنداعى ۇلتتىق زاڭنامانى ودان ءارى جەتىلدىرۋدى قامتاماسىز ەتەدى. بۇگىنگى وتىرىستا دەپۋتاتتار بىرقاتار راتيفيكاتسيالىق زاڭ جوبالارىن ماقۇلدادى. اتاپ ايتقاندا، قازاقستان مەن ليۋكسەمبۋرگ اراسىنداعى تابىس پەن كاپيتالعا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنتسياعا تولىقتىرۋ ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسى.

بۇل حاتتامانى راتيفيكاتسيالاۋ ينۆەستيتسيالار ءۇشىن قولايلى جاعدايلار جاساۋعا، ەكونوميكالىق ىنتىماقتاستىقتى نىعايتۋعا جانە سالىق سالۋ ماسەلەلەرى بويىنشا اقپارات الماسۋ ارقىلى ەكى مەملەكەتتىڭ سالىق قىزمەتىنىڭ ىنتىماقتاستىعىن كەڭەيتۋگە مۇمكىندىك بەرەدى.

حاتتامادا تابىس كوزى بولىپ تابىلاتىن مەملەكەتتە ديۆيدەندتەردى ەگەر مۇنداي ديۆيدەندتەردىڭ ناقتى يەسى ۇكىمەت نەمەسە ورتالىق نەمەسە جەرگىلىكتى بيلىك ورگانى، ورتالىق (ۇلتتىق) بانك نەمەسە ۇكىمەتكە تولىعىمەن تيەسىلى كەز كەلگەن باسقا مەكەمە بولسا، سالىق سالۋدان بوساتۋ كوزدەلەدى.

سونىمەن قاتار شىۇ مۇشە مەملەكەتتەر اراسىنداعى بىرلەسكەن اسكەري وقۋ-جاتتىعۋلار وتكىزۋ تۋرالى كەلىسىمگە تولىقتىرۋلار ەنگىزۋ تۋرالى حاتتامانى راتيفيكاتسيالاۋعا قاتىستى زاڭ جوباسىن ماقۇلدادى. حاتتاماعا سايكەس شانحاي ىنتىماقتاستىق ۇيىمىنا مۇشە مەملەكەتتەر اراسىنداعى بىرلەسكەن اسكەري وقۋ-جاتتىعۋلار وتكىزۋ تۋرالى كەلىسىم شانحاي ىنتىماقتاستىق ۇيىمىنىڭ مۇشەسى بولىپ تابىلاتىن كەز كەلگەن مەملەكەتتىڭ وعان قوسىلۋى ءۇشىن اشىق. بۇگىنگى جالپى وتىرىستا پالاتا «نوتاريات تۋرالى» زاڭ جوباسىن جۇمىسقا الدى. وسىنىڭ قاتارىندا ەاەو مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ جانە كەدەن وداعىنا مۇشە مەملەكەتتەردىڭ كەدەن قىزمەتتەرىنىڭ بىرىككەن القاسى تۋرالى شارتقا وزگەرىستەر ەنگىزۋ تۋرالى قۇجاتتاردى راتيفيكاتسيالاۋعا قاتىستى زاڭ جوبالارى بار.

سونىمەن قاتار بۇگىنگى جالپى وتىرىستا دەپۋتاتتار التىنشى سەسسياعا ارنالعان نەگىزگى پارلامەنتتىك ءىس-شارالار جوسپارىن بەكىتتى. ءماجىلىس توراعاسى نۇرلان نىعماتۋلين اتاپ وتكەندەي، اعىمداعى سەسسيا جۇمىسى اۋقىمدى بولادى دەپ كۇتىلۋدە. كوميتەتتەردىڭ كەڭەيتىلگەن تاقىرىپتىق وتىرىستارىندا، دوڭگەلەك ۇستەلدەرىندە قوعامنىڭ وزەكتى ماسەلەلەرى قارالادى. ولاردىڭ قاتارىندا ەكولوگيا، اگروونەركاسىپتىك كەشەن، عىلىم، حالىققا قىزمەت كورسەتۋدى جەتىلدىرۋ جانە ت.ب ماسەلەلەر بار.

الدىڭعى سەسسياداعىداي «ۇكىمەت ساعاتتارى» ءمينيستردىڭ جالپى سالاداعى احۋال تۋرالى ەمەس، ناقتى ءبىر مەملەكەتتىك باعدارلامانىڭ ورىندالۋى تۋرالى ەسەبىمەن جاڭارتىلعان نىساندا وتكىزىلەتىن بولادى. ازاماتتارعا قۇقىقتىق كومەك كورسەتۋگە بويىنشا دا پارلامەنتتىك تىڭداۋلار جوسپارلانعان. بارلىق ءىس-شارالار سانيتارلىق-ەپيدەميولوگيالىق تالاپتاردى ساقتاي وتىرىپ ۇيىمداستىرىلادى.

ءماجىلىس توراعاسى دەپۋتاتتاردىڭ جۇمىس اۋقىمى، ەڭ الدىمەن مەملەكەت باسشىسى جولداۋىنداعى مىندەتتەردى زاڭنامالىق جۇزەگە اسىرۋعا باعىتتالاتىنىن ايتا كەلىپ:

- وزدەرىڭىز كورىپ وتىرعانداي، ەلدەگى قالىپتاسقان جاعدايعا قاراماستان ءبىز وسى سەسسيادا ادەتتەگىدەي كوپتەگەن ءىس-شارالار جوسپارلاپ وتىرمىز. ونىڭ ىشىندە، ۇكىمەت ساعاتتارى، پارلامەنتتىك تىڭداۋلار، ءارتۇرلى كەزدەسۋلەر جانە وتىرىستار دا بار. ولاردىڭ بارلىعىندا ەڭ الدىمەن، ەكونوميكالىق-الەۋمەتتىك ماڭىزدى سۇراقتار تالقىلاناتىن بولادى. ارينە، ءىس-شارالاردى ۇيىمداستىرۋ، وتكىزۋ فورماتىندا وزگەرىستەر بولسا دا، ول جۇمىس ساپاسىنا ەشقانداي اسەر ەتپەيدى. ول جاعىنان وتكەن سەسسيادان دا تاجىريبەمىز بار،– دەدى.

نۇرلان نىعماتۋلين سونىمەن بىرگە دەپۋتاتتار جۇمىسىنىڭ اشىقتىعىنا جانە بارلىق اقپاراتتىق مۇمكىندىكتەردى پايدالانۋ قاجەتتىگىنە باسا نازار اۋداردى. وتىرىس سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا دەپۋتاتتىق ساۋالدار جولدادى. ولار: د. نۇرمانبەتوۆا، ي.ارونوۆا، د.ەسپاەۆا، م.ماگەرراموۆ، ي. سميرنوۆا، ا.پەرۋاشەۆ.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار