سونىڭ ىشىندە 700 مىڭ ادامنىڭ 2021 جىلدان باستاپ وزدەرىنىڭ زەينەتاقى قورىندا جيناعان قاراجاتىنىڭ ءبىر بولىگىن جەكە باسىنىڭ جاعدايىن جاقسارتۋعا جۇمساۋىنا رۇقسات بەرىلەتىنى تۋرالى ايتقانى مىڭداعان ادام مەن ولاردىڭ وتباسىنداعى جانداردى ءبىر قۋانتىپ تاستاعانىن كورۋگە بولادى. وسى كۇنگە دەيىن بۇل قاراجاتتىڭ پايداعا اسپاي قالۋى مۇمكىن دەپ ويلاپ, سارى ۋايىمعا سالىنىپ جۇرگەندەر ءبىر سەرپىلىپ قالدى.
سونىمەن بىرگە پرەزيدەنت زاڭ ۇستەمدىگىنىڭ ورناۋىنا ايرىقشا نازار اۋداردى. «زاڭ ۇستەمدىگى ورنىقپاسا جانە ازاماتتاردىڭ قاۋىپسىزدىگىنە كەپىلدىك بەرىلمەسە, الەۋمەتتىك-ەكونوميكالىق دامۋدىڭ بىردە-ءبىر مىندەتى تابىستى جۇزەگە اسىرىلمايدى», دەپ اتاپ كورسەتتى ول.
پرەزيدەنت قازىرگى مەملەكەتتىك ورگاندار قىزمەتكەرلەرىنىڭ ازاماتتاردىڭ ماسەلەلەرىن تىڭداپ, كورۋمەن عانا شەكتەلەتىنىنە نازار اۋداردى. جولداۋدا وسى ماسەلەگە نازار اۋدارىلدى.
«حالىق ۇنىنە قۇلاق اساتىن مەملەكەت» – بۇل, شىن مانىسىندە, «ادىلەتتى مەملەكەت» قۇرۋ تۇجىرىمداماسى. ازاماتتاردىڭ ماسەلەلەرىن تىڭداپ, كورىپ قانا قويۋ جەتكىلىكسىز. ەڭ باستىسى – دۇرىس جانە ءادىل شەشىم شىعارۋ قاجەت, دەدى پرەزيدەنت. وسىعان بايلانىستى مەملەكەتتىڭ جاڭا ستاندارتتارىن جاساۋدىڭ قاجەتتىلىگىن اتاپ ءوتتى. ال ونى جاسايتىن قۇقىق قورعاۋ جانە سوت جۇيەلەرىنە نەگىزگى زور مىندەت جۇكتەلەدى. سوندىقتان وسى سالالارعا رەفورما قاجەتتىگىن ايتتى پرەزيدەنت. وسى جانە باسقا دا ماسەلەلەر ابدەن تولعاعى جەتكەن دۇنيەلەر ەكەنى داۋسىز.
ساۋلە سۇلەيمەنوۆا,
«سولتۇستىك قازاقستاننىڭ ازاماتتىق اليانسى» زتب توراعاسى
سولتۇستىك قازاقستان وبلىسى
