تۇركىستان وبلىسىنا ارنايى ىسساپارمەن كەلگەن دەنساۋلىق ساقتاۋ ءمينيسترى الەكسەي تسوي اۋرۋحانا قۇرىلىسىندا بولدى. سونداي-اق وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆپەن تۇركىستانداعى بىرقاتار ەمدەۋ مەكەمەسىن ارالاپ, تىنىس-تىرشىلىگىمەن تانىستى. قالالىق ورتالىق ەمحانادا بولىپ, ونداعى جۇمىس بارىسىن باقىلادى. ەمحانا ءبىر اۋىسىمدا 500 كەلۋشىگە لايىقتالعان, 900 - دەن استام مەديتسينا قىزمەتكەرى جۇمىس ىستەيدى. كوروناۆيرۋس ينفەكتسياسىمەن كۇرەس ماقساتىندا 18 ءموبيلدى توپ قۇرىلعان. ەمحانا بازاسىندا سونداي-اق, ىندەتتى انىقتايتىن ۆيرۋسولوگيالىق زەرتحاناسى بار. وسى كۇنگە دەيىن 40 مىڭعا جۋىق ازاماتتان سىناما الىنعان. ەمدەۋ مەكەمەسى بارلىق قاجەتتى مەديتسينالىق قۇرال-جابدىقتارمەن دە تولىق قامتاماسىز ەتىلگەن.
جەرگىلىكتى مەديتسينا قىزمەتكەرلەرىمەن كەزدەسىپ, جاعدايلارىمەن تانىسقان مينيستر وڭىردەگى ەمدەۋ مەكەمەلەرىنىڭ قىزمەتىن وڭ باعالادى. "پرەزيدەنت حالىققا جولداۋىندا العاشقى مەديتسينالىق كومەكتى دامىتۋعا اسا ءمان بەردى. تۇركىستان وبلىسىندا بۇل باعىتتا اۋقىمدى جۇمىستار اتقارىلۋدا. تۇركىستان قالالىق ەمحانا قىزمەتكەرلەرىنىڭ كوروناۆيرۋس ينفەكتسياسى بەلەڭ الا قالعان جاعدايدا ەكىنشى تولقىنعا دايىندىعى جوعارى دەڭگەيدە ەكەندىگىن دە بايقادىق. ەمدەۋ مەكەمەسى بارلىق مەديتسينالىق قاجەتتىلىكتەرمەن جانە جەدەل-جاردەم كولىكتەرىمەن قامتاماسىز ەتىلگەن", - دەدى الەكسەي تسوي.
وبلىستا تۇماۋعا قارسى ەكپە ەگۋگە دايىندىق جۇمىستارى جۇرگىزىلۋدە. بۇل ورايدا ۆاكتسينانىڭ ءبىرىنشى پارتياسى جەتكىزىلگەن. وسى ايدىڭ 15-نەن باستاپ ەگۋ جۇمىستارى باستالادى. دەنساۋلىق ساقتاۋ ءمينيسترى ساپار سوڭىندا تۇركىستان قالاسىندا جاڭادان بوي كوتەرىپ جاتقان ءمودۋلدى جۇقپالى اۋرۋلار اۋرۋحاناسىندا دا بولدى. ەمدەۋ مەكەمەسى 200 توسەك-ورىنعا ەسەپتەلگەن. نىساننىڭ قۇرىلىسى جوسپارلانعان ايماقتا بارلىق قاجەتتى ينجەنەرلىك جەلىلەر مەن كولىك ينفراقۇرىلىمى بار.
