تالدىقورعان قالاسىنىڭ «قاراتال» شاعىن اۋدانىندا ۇزاق جىلدار بويى قاراۋسىز قالعان اياقسىز قۇرىلىستى وبلىس اكىمى ا.باتالوۆ كوممۋنالدىق مەنشىككە وتكىزىپ, ستۋدەنتتەر جاتاقحاناسى رەتىندە قايتا سالۋدى تاپسىرعان بولاتىن. سونىڭ ناتيجەسىندە اينالاسى ءبىر جىلدىڭ ىشىندە 13 قاباتتى, ساۋلەتى كەلىستى جاڭا جاتاقحانا بوي كوتەردى. تالدىقورعانداعى بىردەن ءبىر جوعارى وقۋ ورنى ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى ءۇشىن بەرىلىپ وتىرعان بۇل نىسان بىلىمگەرلەردىڭ ءومىر ءسۇرۋ جاعدايىن جاقسارتىپ, ءبىلىم ساپاسىن ارتتىرۋعا ىقپال ەتەتىن قادام بولماق. جاتاقحانانىڭ اشىلۋ سالتاناتىندا وبلىس اكىمى ا.باتالوۆ ستۋدەنت جاستارعا ىزگى تىلەگىن ءبىلدىردى.
– كەزىندە كاسىپ يەسى قوناقۇي سالامىز دەپ, كەيىن قۇرىلىسىن اياقسىز قالدىرىپ كەتكەن نىساننىڭ بەتونى ۇگىلىپ, ارماتۋراسى توزىپ, قاراۋسىز جاتقان بولاتىن. وسى قۇرىلىستى ستۋدەنتتەر ءۇيى رەتىندە سالساق دەپ شەشىم قابىلداپ, بۇگىن, مىنە, پايدالانۋعا بەرىپ وتىرمىز. عيماراتتىڭ جوباسىن مارقۇم, بەلگىلى ساۋلەتشى اقمىرزا رۇستەمبەكوۆ جاسادى. تالدىقورعان قالاسىنىڭ اجارىن اشاتىن بۇل نىسان جەتىسۋلىق جاستار ءۇشىن ۇلكەن سىي دەپ بىلەمىن. ەندى بۇل جاتاقحانا جالىندى, جىگەرلى جاستارىمىزدىڭ ءوز ۇيىندەي بولادى, – دەدى ايماق باسشىسى ءوز سوزىندە.
جاتاقحانانىڭ اشىلۋىندا ءسوز العان ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزاەۆ, ستۋدەنتەر پارلامەنتىنىڭ سپيكەرى, قۇقىق جانە ەكونوميكا فاكۋلتەتىنىڭ 4 كۋرس ستۋدەنتى مادينا تۇرداش تا جاستارعا دەگەن قامقورلىعى ءۇشىن ەل اعالارىنا ۋنيۆەرسيتەت ۇجىمىنىڭ اتىنان, ستۋدەنتتەردىڭ اتىنان ريزاشىلىقتارىن ءبىلدىردى. مۇنان كەيىن جينالعان كوپشىلىك عيماراتتىڭ ءىشىن ارالاپ, كىتاپحانا, كينوزال, وزىندىك جۇمىس بولمەسى, دەمالىس بولمەسى, اسحانا, جاتىن بولمەلەرگە كىرىپ كوردى. كەلۋشىلەرگە «Bolashak Books» بۇرىشى تانىستىرىلدى. ءار بولمەدە ستۋدەنتتەردىڭ ەركىن ءبىلىم الۋى مەن دەمالۋىنا بارلىق قاجەتتى جاعدايلار جاسالعان, ءتيىستى قۇرال-جابدىقتارمەن تولىق قامتىلعان. ازىرگە مۇندا «اينالايىن» بالالار ءۇيىنىڭ تاربيەلەنۋشىلەرى قاتارىنداعى جانە ينتەرنەت جىلدامدىعى باياۋ شالعاي ەلدى مەكەندەردەن كەلگەن جالپى سانى 13 ستۋدەنت ورنالاستى.
– تالدىقورعاندا سوناۋ توقىراۋ جىلدارىندا يەلەرى سالا باستاپ, كەيىن بىتىرمەي تاستاپ كەتكەن قۇرىلىستىڭ تۇرعانىنا جيىرما جىلدان اسقان. قاراۋسىز جاتقان سوڭ ءارتۇرلى ادامدار ءۇيىر بولادى. وعان قوسا قالانىڭ ءسانىن كەتىرىپ تۇرعان. بۇگىن وسى قۇرىلىستىڭ ورنىنا ستۋدەنتتەرگە ارنالعان ءزاۋلىم جاتاقحانا سالىنىپ بەرىلگەنىنە قۋانىپ جاتىرمىز. ءوزىمىز كەزىندە ينستيتۋتتا وقىعاندا جاتاقحانا دەگەندى بىلگەنىمىز جوق, بىزگە مۇنداي جاعداي جاسالعان جوق. قازىرگى جاستارعا وقيمىن دەسە, ءوزىن ءوزى دامىتامىن دەسە بارلىق مۇمكىندىكتەرى بار, – دەيدى ستۋدەنتتەر ءۇيىنىڭ ءسان-سالتاناتىنا تاڭ بولعان تالدىقورعان قالاسىنىڭ تۇرعىنى دينا نۇرعاليەۆا.
ايتپاقشى, جەتىسۋلىق ستۋدەنت جاستاردىڭ جاڭا قونىسقا كوشۋى جالعاسا بەرمەك. بۇيىرسا, جىل سوڭىنا دەيىن تالدىقورعان قالاسىنىڭ مەديتسينالىق جانە پوليتەحنيكالىق كوللەدجدەرىنىڭ 280 جانە 200 ورىندىق, قاراتال اۋدانىنداعى بەستوبە سەرۆيستىك-تەحنيكالىق كوللەدجىنىڭ 50 ورىندىق جاتاحانالارى قولدانىسقا بەرىلىپ, تاعى 530 ستۋدەنت قۋانىشقا بولەنەدى.
– مەن وقۋعا تۇسكەندە ماعان جاڭا جاتاقحانادا تۇراسىڭ دەدى, بىراق العاشىندا سەنبەدىم. شىنىندا دا قازىر وسى ستۋدەنتتەر ۇيىندە تەگىن تۇرىپ جاتىرمىن. وتە قۋانىشتىمىن. بىزدە كىتاپحانا, كينوزالداردى ايتپاعاندا, ءتىپتى كىر جۋاتىن ماشيناعا دەيىن بار. ەندى ءبىز ەشتەڭەگە الاڭداماي تەك قانا جاقسى وقۋىمىز كەرەك, – دەيدى تالدىقورعان قالاسىنداعى «اينالايىن» بالالار ءۇيىنىڭ تاربيەلەنۋشىسى, ءى.جانسۇگىروۆ اتىنداعى جمۋ جۋرناليستيكا ءبولىمىنىڭ 1 كۋرس ستۋدەنتى اياۋلىم قويشىباەۆا.
الماتى وبلىسى
