ونلاين رەجىمدە وتكەن سەزد جۇمىسىنا رەسپۋبليكانىڭ بارلىق سالالارىن قامتيتىن 151 دەلەگات, سونداي-اق الەۋمەتتىك ارىپتەستەر, ساياسي پارتيالار جەتەكشىلەرى, پارلامەنت دەپۋتاتتارى, شەتەلدىك كاسىپوداق جانە حالىقارالىق ۇيىمداردىڭ وكىلدەرى قاتىستى.
مەملەكەت باسشىسى قاسىم-جومارت توقاەۆتىڭ سەزد دەلەگاتتارىنا ارناعان قۇتتىقتاۋ ءسوزىن پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ وقىپ بەردى. ء«بىز ەڭبەكتى قازاقستان قوعامىنىڭ نەگىزگى قۇندىلىعى رەتىندە دارىپتەۋىمىز كەرەك. بۇل – مەنىڭ ناقتى ۇستانىمىم. بۇل ءۇشىن تەك اتقارۋشى ورگانداردىڭ بولۋى جەتكىلىكسىز ەكەنىن ءبارىمىز تۇسىنەمىز. سوندىقتان الەۋمەتتىك سەرىكتەستىك مەحانيزمى, مەملەكەت پەن ازاماتتاردىڭ, ۇكىمەتتىك ەمەس سەكتوردىڭ ەكىجاقتى ءوزارا ارەكەتتەسۋ جۇيەسىنىڭ بالامالارى جوق. كاسىپوداقتار فەدەراتسياسى – قازاقستانداعى ەڭ كوپ ينستيتۋتسيونالدىق تۇرعىدا دامىعان قوعامدىق بىرلەستىكتەردىڭ ءبىرى. جالپى, ساياسي ومىردە, ەكونوميكالىق, الەۋمەتتىك, رۋحاني جانە مادەني باعدارلامالاردى جۇزەگە اسىرۋدا ونىڭ الار ورنى ەرەكشە», دەلىنگەن پرەزيدەنتتىڭ قۇتتىقتاۋ سوزىندە.
د.اباەۆتىڭ ايتۋىنشا, 2017 جىلدان باستاپ فەدەراتسيانى باسقارۋ جۇيەسى ايتارلىقتاي رەفورمالانىپ, ونىڭ مۇمكىندىكتەرى كەڭەيتىلىپ, ازاماتتاردىڭ الەۋمەتتىك, ەكونوميكالىق, ەڭبەك قۇقىقتارى مەن مۇددەلەرىن قورعايتىن كەڭەس قۇرىلعان. «كاسىپوداقتار فەدەراتسياسى ەڭبەككە قاتىستى داۋ-دامايلاردى شەشۋدىڭ باستى باستاماشىسىنا اينالۋى كەرەك. جۇمىسشىلاردىڭ قۇقىقتارىن جۇيەلى تۇردە جۇزەگە اسىرۋ ارقىلى عانا الەۋمەتتىك قىزمەتكەرلەردىڭ كۇمانى مەن سەنىمسىزدىگىن جويۋعا بولادى. فەدەراتسيا ءۇشىن ەڭبەك داۋلارىن بولدىرماۋ ءۇشىن, اسىرەسە ءىرى كاسىپورىنداردا ءوزىنىڭ الەۋەتىن جاقسارتۋ وتە ماڭىزدى. الەۋمەتتىك سەرىكتەستىك جونىندەگى ەكىجاقتى كوميسسيا شەڭبەرىندە فۋنكتسيالاردى ناقتى ءبولىپ, ونىڭ ورىندالۋىن تۇراقتى باقىلاۋدى قامتاماسىز ەتۋ قاجەت. بۇل فەدەراتسيانىڭ ءتيىستى مينيسترلىكتەرمەن جانە اكىمدىكتەرمەن جۇمىسشىلاردىڭ دەلدالدىعى بويىنشا بىرلەسكەن جۇمىس ءۇشىن ءوزارا ءىس-قيمىلىنىڭ ناقتى الگوريتمىن قالىپتاستىرۋعا مۇمكىندىك بەرەدى. بىزگە بارلىق دەڭگەيدەگى كاسىپوداقتار اراسىنداعى زاماناۋي قولجەتىمدى اقپاراتتىق بايلانىس قاجەت. اقپاراتتىق كەڭىستىكتە قوعاممەن ءوزارا ارەكەتتەسۋدىڭ سىندارلى ارنالارىن قۇرۋ قاجەتتىلىگى سەزىلەدى», دەدى د.اباەۆ.
پرەمەر-ءمينيستردىڭ ورىنباسارى ەرالى توعجانوۆ ۇكىمەت اتىنان سەزد دەلەگاتتارىنا قۇتتىقتاۋ ءسوزىن ارنادى. ول كاسىپوداق ۇيىمدارى جۇمىس ىستەيتىن كاسىپورىنداردا ەڭبەك ۇجىمدارى مەن جۇمىس بەرۋشىلەر اراسىندا بايلانىس جۇيەسىنىڭ تيىمدىلىگىن اتاپ ءوتتى. «قازاقستان كاسىپوداقتارى – الەۋمەتتىك تۇراقتىلىق ماقساتىنا قول جەتكىزۋ ىسىندە ۇكىمەتتىڭ سەنىمدى سەرىكتەسى مەن قاتىسۋشىسى. بۇل ۇيىم جۇمىس ىستەيتىن جەرلەردە ەڭبەك ۇجىمدارى مەن جۇمىس بەرۋشىلەر اراسىندا ءتيىمدى بايلانىس جۇيەسى ورناتىلعانىن بىلەمىز. جالاقىنى ارتتىرۋ, ەڭبەك جانە دەمالىس جاعدايلارىن جاقسارتۋمەن بايلانىستى ماسەلەلەر ءتيىمدى شەشىلەدى. ەلىمىزدە كۇردەلى جاعداي ورىن العاندا كاسىپوداقتار فەدەراتسياسى ءوزىنىڭ باستى ماقساتى – جۇمىسشىلاردىڭ ەڭبەك قۇقىقتارى مەن مۇددەلەرىن قورعاۋدى بەلسەندى جۇزەگە اسىرۋدا, ەڭبەككەرلەرگە جانە حالىقتىڭ الەۋمەتتىك تۇرعىدان ءالسىز توبىنا ماتەريالدىق كومەك كورسەتەدى, كەڭەس بەرەدى», دەدى پرەمەر-ءمينيستردىڭ ورىنباسارى.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءوز كەزەگىندە كاسىپوداقتار فەدەراتسياسىنىڭ ەڭبەككەرلەردىڭ زاڭدى قۇقىقتارى مەن مۇددەلەرىن قورعاۋداعى ماڭىزدى ءرولىن اتاپ ءوتتى.
حالىقارالىق ەڭبەك ۇيىمىنىڭ ەڭبەككەرلەردىڭ قىزمەتى جونىندەگى ەۋروپا جانە ورتالىق ازيا سەكتورىنىڭ مەڭگەرۋشىسى سەرگيۋس گلوۆاتسكاس قازاقستان كاسىپوداقتار فەدەراتسياسىنىڭ قىزمەتىندەگى وڭ وزگەرىستەردى اتاپ ءوتتى ءارى ءوز پوزيتسياسىن نىعايتۋعا باعىتتالعان بەلسەندى ءىس-شارالارىن, سونىڭ ىشىندە حەۇ كونۆەنتسيالارىن راتيفيكاتسيالاۋ بويىنشا باستامالارىن جوعارى باعالادى.
كاسىپوداقتار فەدەراتسياسىنىڭ جەتىستىكتەرى مەن كاسىپوداقتار بىرلەستىگىنىڭ الداعى مىندەتتەرى تۋرالى قركف توراعاسى ساتىبالدى داۋلەتالين ءوز سوزىندە ايتىپ ءوتتى. قركف باسشىسى بارلىق كاسىپوداق ۇيىمدارى مەن كاسىپوداق مۇشەلەرىن ەلىمىزدە لايىقتى ءومىردىڭ جاڭا الەۋمەتتىك ۇلگىسىن ازىرلەۋگە بەلسەندى قاتىسۋعا شاقىردى. ونىڭ ايتۋىنشا, «كاسىپتىك وداقتار تۋرالى» زاڭ بىرقاتار وزگەرتۋدى قاجەت ەتەدى.
XXVI سەزد دەلەگاتتارى ەڭبەككەرلەرگە, كاسىپوداق ۇيىمدارى مەن الەۋمەتتىك ارىپتەستەرگە مەملەكەت باسشىسىنىڭ جولداۋىندا كورسەتىلگەن جاڭارۋ باعىتتارىن قولداۋ تۋرالى ۇندەۋ قابىلدادى.
سەزدە قازاقستان رەسپۋبليكاسىنىڭ كاسىپوداقتارىنىڭ 2020-2025 جىلدارعا ارنالعان ستراتەگياسى قابىلداندى. قركف جوعارى ورگانىنىڭ قاتىسۋشىلارى – سەزد دەلەگاتتارى باسىم داۋىسپەن ساتىبالدى داۋلەتاليندى قازاقستان كاسىپوداقتار فەدەراتسياسىنىڭ توراعاسى لاۋازىمىنا سايلادى.
