قازاقستاندا تسيفرلىق جەرۇستى تەلەحابار تاراتۋدى ەنگىزۋ جونىندەگى جوبانى ىسكە اسىرۋ 2012 جىلعى شىلدەدە باستالدى. قازىرگى ۋاقىتتا پايدالانۋعا بەرىلگەن رتس جالپى سانى – 491 بىرلىك, بۇل 13 ميلليوننان استام تۇرعىندى قامتيدى. ۇزاق وتپەلى كەزەڭ تاپسىرمانىڭ كۇردەلىلىگىمەن تۇسىندىرىلەدى. ەلدىڭ «انالوگتەن» «تسيفرعا» كوشۋى – قازىرگى قازاقستاننىڭ ەڭ اۋقىمدى جانە بىرەگەي جوبالارىنىڭ ءبىرى. انالوگتى تەلەحابار تاراتۋدى 100%-عا كوشىرۋ ءۇشىن بۇكىل ەل بويىنشا 827 راديوتەلەۆيزيالىق ستانسا سالۋ جانە جاڭعىرتۋ قاجەت. بىراق مۇنداي جۇمىس كولەمى ماقساتتى اقتايدى: تسيفرلىق تەلەۆيزيا جوعارى ساپالى كەسكىن مەن دىبىس الۋعا مۇمكىندىك بەرەدى, سونىمەن قاتار ارنالار مەن باعدارلامالاردىڭ ۇلكەن تاڭداۋىن ۇسىنادى. ەسكى ۇلگىدەگى سيگنال سىرتقى اسەرلەرگە وتە وسال كەلەدى, مىسالى, ول اۋا رايىنىڭ قولايسىزدىعىنا بايلانىستى جانە قاتتى جەل تۇرعاندا جوعالىپ كەتۋى مۇمكىن. تسيفرلى تەلەحابار تاراتۋ سيگنالدىڭ ساپاسى مەن قورعانىسىنىڭ جوعارى دەڭگەيىنە يە, ول ۇزاق قاشىقتىقتان قابىلدانادى. قازىر انالوگتى حابار تاراتۋ ءبىر تاراتقىش – ءبىر ارنا ۇستانىمى بويىنشا جۇمىس ىستەيدى. تسيفرلى ءبىر تاراتقىشتان كوپتەگەن ارنانى تاراتۋعا مۇمكىندىك بەرەدى. قاراپايىم تىلمەن ايتقاندا, ارنالار «قىسىلادى» جانە 1 جيىلىكتە «مۋلتيپلەكس» ارقىلى بەرىلەدى. كورەرمەندەر ءۇشىن ارتىقشىلىقتار ايقىن, سيگنال ساپاسى, ارنالاردى تاڭداۋ بۇرىنعىعا قاراعاندا ۇلكەن, ال تەگىن توپتاماعا كەمىندە 30 تەلەارنا كىرەدى. جانە دە مۇنىڭ ءبارى ەشقانداي ابونەنتتىك تولەمسىز بەرىلەدى.
ەفيرلىك تەلەۆيزياداعى العاشقى جاڭالىقتى ماڭعىستاۋ, جامبىل, تۇركىستان, الماتى, قوستاناي جانە پاۆلودار وبلىستارىنىڭ تۇرعىندارى سەزىندى. وتانداستارىمىز نەگىزگى مۋلتيپلەكس بويىنشا «QAZAQSTAN», «حابار», «حابار24», «BALAPAN», «ەل ارنا», «QAZSPORT», «Kazakh TV», «پەرۆىي كانال ەۆرازيا» سياقتى قازاقستاننىڭ ءىرى تەلەارنالارى مەن وڭىرلىك ءبىر تەلەارنا كىرەتىن ساپالى تەلەۆيزيانى پايدالانا الادى.
تسيفرلى حابار تاراتۋدىڭ ەنگىزىلۋىمەن وتاندىق تەلەارنالار دا دامۋ ءۇشىن جاڭا سەرپىن الادى. انالوگتى تەلەۆيزيانىڭ مۇمكىندىكتەرى تاۋسىلدى, ال جاڭا تەلەارنالار «انالوگتە» ورىن بولماۋىنا بايلانىستى ەفيرگە شىعا المايدى. «تسيفر» بارلىعىنىڭ جۇمىس ىستەۋىنە مۇمكىندىك بەرەدى. مەملەكەت الدىندا شاعىن وڭىرلىك تەلەارنالاردى قولداۋ مىندەتى تۇر, سوندىقتان جىل سايىن وبلىستىق تەلەارنالار ءبىرىنشى, نەگىزگى مۋلتيپلەكسكە كىرۋ كونكۋرسىنا قاتىسىپ ءجۇر. الايدا تسيفرلى جەلى بويىنشا تاراتۋ تاريفىنە ساي كەز كەلگەن قازاقستاندىق ارنا تسيفرلىق تولقىنداعى قولجەتىمدى ارنالار تىزىمىنە كىرە الادى. ەسەسىنە تەلەكومپانيا تەك ءمىنسىز ساپادا ۇزدىكسىز حابار تاراتۋدى عانا ەمەس, سونىمەن قاتار EPG تۇيمەسىن باسۋ ارقىلى كىدىرتۋ جانە تەلەشوۋلاردىڭ حابارلاندىرۋىن كورسەتۋ سياقتى تەلەۆيزيالىق حابار تاراتۋ جۇيەسىنە قوسىمشا فۋنكتسيالاردى ەنگىزۋ مۇمكىندىگىن الا الادى. تسيفرلى جەرۇستى تەلەحابار تاراتۋدى دامىتۋ جانە ابونەنتتەرگە ساپالى سۋرەت پەن دىبىس بەرۋ, تۇتاستاي العاندا بۇكىل ەل ءۇشىن دە ءتيىمدى ەكەنى ايقىن. بۇگىنگى «تسيفرعا» كوشۋ – جالپى الەمدىك ترەند. مىسالى, گەرمانيا, ۇلىبريتانيا, يسپانيا, شۆەتسيا سيگنالدى قايتا فورماتتاۋدى 20 جىل بۇرىن باستاعان. مۇنداعى باستى باسىمدىق – ادامنىڭ ءومىر ءسۇرۋ ساپاسىن, ونىڭ ىشىندە ساپالى تەلەۆيزيا كومەگىمەن جاقسارتۋ.
