جامبىل وبلىسىندا جاڭا وقۋ جىلىنا دايىندىق جۇمىستارى وتە ءالسىز بولىپ شىقتى. اۋەلگىدە دايىندىق شارالارىنا بايلانىستى ءتيىستى باسشىلارعا بىرقاتار تاپسىرما بەرىلگەنىمەن, ونىڭ دەنى ورىندالماعان.
وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆانىڭ ايتۋىنشا, بۇگىنگى تاڭدا وڭىردە 22 ءبىلىم بەرۋ نىسانىنىڭ قۇرىلىسى جۇرگىزىلۋدە. ال ونىڭ ىشىندە 9 ءبىلىم نىسانى بيىل سالىنىپ ءبىتۋى كەرەك ەكەن. قۇرىلىس جۇمىستارىنا 10,1 ملرد تەڭگە بولىنگەن. سونداي-اق 7,7 ملرد تەڭگەگە 42 مەكتەپ كۇردەلى جوندەۋدەن وتۋدە. ءبىلىم باسقارماسى باسشىسىنىڭ كەلتىرگەن مالىمەتىنە قاراعاندا, وبلىستاعى 32 مەكتەپتىڭ جوندەۋ جۇمىستارى بيىل 30 تامىزعا دەيىن, ال قالعان 6 ءبىلىم وشاعىنداعى كۇردەلى جوندەۋ جۇمىستارى تەك 30 قىركۇيەكتە عانا اياقتالماق. ياعني جاڭا وقۋ جىلىنىڭ باستالعانىنا از عانا ۋاقىت قالعانىنا قاراماستان, جۇمىستار كەشىكتىرىلۋدە. بۇل رەتتە وبلىس باسشىلىعى تاراپىنان اۋدان اكىمدەرىنە سىن دا ايتىلعان بولاتىن. اۋدان اكىمدەرى ءوز اۋداندارىنداعى مەكتەپ قۇرىلىسىنىڭ جايىن ءجىتى باقىلاپ وتىرعان جوق. سونىمەن قاتار مەردىگەرلەردىڭ دە سىلبىر جۇمىسى جاڭا وقۋ جىلىنا دايىندىققا قولبايلاۋ بولدى. سوندىقتان دا مەكتەپتەرى ءالى پايدالانۋعا بەرىلمەگەن بالالار قالانىڭ شالعايىندا ورنالاسقان مەكتەپتەرگە بارىپ وقۋعا ءماجبۇر. الايدا وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆا نىسانداردىڭ قۇرىلىسى مەن جوندەۋ جۇمىستارىنىڭ سوزىلىپ كەتۋىن جۇمىسشىلاردىڭ جەتىسپەۋشىلىگىمەن ءتۇسىندىردى. ال وبلىس اكىمى بەردىبەك ساپارباەۆ اتالعان ماسەلە بويىنشا وتكەن جيىندا مەكتەپ قۇرىلىسىنا جانە كۇردەلى جوندەۋگە بايلانىستى جاعدايلار اۋەلدەن-اق وبلىستىق قۇرىلىس باسقارماسى مەن اۋداندىق قۇرىلىس بولىمدەرىنىڭ باقىلاۋىندا بولۋى كەرەك ەكەنىن ايتقان بولاتىن. «ەگەر جۇمىس بارىسىن قاداعالاماسا, تەحنيكالىق قاداعالاۋ نە ءۇشىن قاجەت؟ جالپى تاپسىرمالار نە ءۇشىن بەرىلەدى؟ ەگەر قۇرىلىس باسقارماسى ءوز جۇمىسىن جۇرگىزە الماسا», دەگەن ەدى اكىم.
ءبىلىم بەرۋ سالاسىنداعى تاعى ءبىر ماڭىزدى ماسەلە – سىرتتاعى مەكتەپ دارەتحانالارىنا قاتىستى. بىلتىر تاراز قالاسىندا ورىن العان وقۋشى قىزدى زورلاۋ ارەكەتىنەن كەيىن وسىنداي شەشىم قابىلدانعان بولاتىن. وبلىس اكىمىنىڭ تاپسىرماسى بويىنشا, ونىڭ ءبارى بيىل 1 قىركۇيەككە دەيىن مەكتەپ عيماراتتارىنا ەنگىزىلۋى كەرەك بولعان. بۇل ماقساتقا 1,1 ملرد تەڭگە بولىنگەن. بىراق وسى ۋاقىتقا دەيىن وبلىس مەكتەپتەرىنە قاتىستى 285 دارەتحانانىڭ تەڭ جارتىسى عانا كوشىرىلگەن بولىپ شىقتى. بۇل ورايدا بايزاق, قورداي, مەركى جانە شۋ اۋداندارى ايتارلىقتاي ارتتا قالىپ وتىر. اتالعان اۋداندارعا اقشانىڭ جەتكىلىكتى دەڭگەيدە بولىنگەنىنە قاراماستان, جۇمىس سىلبىر جۇرگىزىلۋدە. سونداي-اق دارەتحانالاردىڭ تالاپقا ساي سالىنباۋى دا قاتاڭ سىنعا ۇشىراۋدا. «مەن اۋدان اكىمدەرىنىڭ قالاي تىنىش ۇيىقتايتىنىن تۇسىنبەيمىن. ولاردىڭ ورنىندا بولسام, جەلتوقسان ايىندا بالالاردىڭ كۇن سايىن كوشە دارەتحانالارىنا قالاي باراتىندارىن ويلاناتىن ەدىم. بۇل بالالاردىڭ الدىندا ۇيات», دەگەن بولاتىن ب.ساپارباەۆ. سونىمەن قاتار وبلىستاعى بارلىق مەكتەپتەرگە بەينەكامەرالار ورناتۋ دا كۇن تارتىبىندەگى ماسەلەنىڭ ءبىرى بولىپ وتىر. بۇگىنگى تاڭدا وڭىردەگى ءبىلىم بەرۋ وشاقتارىنداعى بەينەكامەرالاردىڭ 80 پايىزى ەسكىرگەن. ەندى ونى ساندىق كامەرالارعا اۋىستىرۋ ماسەلەسى تۇر.
ال بيىل جاڭا وقۋ جىلىنىڭ باسىندا قاشىقتان وقىتۋ ءتارتىبى بولعاندىقتان, وقۋشىلاردى كومپيۋتەرمەن قامتاماسىز ەتۋ دە ماڭىزدى ماسەلەنىڭ ءبىرى. وبلىستاعى 234 مىڭ 715 وقۋشىنىڭ تەك 57,4 پايىزىندا عانا دەربەس كومپيۋتەر مەن نوۋتبۋك بار. ال 99 مىڭ 852 وقۋشىنىڭ, ياعني ولاردىڭ 42,5 پايىزىنىڭ كومپيۋتەرلىك تەحنيكاسى جوق بولىپ وتىر. جىل باسىنان بەرى وبلىس مەكتەپتەرى ءۇشىن 2 658 كومپيۋتەر ساتىپ الىنعان. ەندى جىل سوڭىنا دەيىن 30 مىڭنان استام كومپيۋتەر ساتىپ الۋ جوسپارلانۋدا. سونىمەن قاتار وبلىستىڭ 130 ەلدى مەكەنى ينتەرنەتپەن قامتىلماعان. ال ينتەرنەتسىز ەلدى مەكەندەردە 123 مەكتەپ بار. وندا 18 مىڭ 937 وقۋشى وقيدى. بۇل دا وڭىردەگى ءتيىستى اۋدان اكىمدەرى مەن ءبىلىم سالاسى باسشىلارىنىڭ جۇمىسىنىڭ جۇيەسىزدىگىن كورسەتەدى.
جامبىل وبلىسى
