فورسايت سەسسيالارى ءۇش تاقىرىپ بويىنشا ءوتتى: «بولاشاقتاعى قازاقستاندىقتىڭ بەينەسىن قالىپتاستىرۋ», «ينكليۋزيۆتى كوزقاراس پەن ينكليۋزيۆتى قوعامدى قۇرۋ» جانە «حالىقارالىق ارەناداعى قازاقستان». زەرتتەۋ جۇمىستارىنا وتاندىق جانە شەتەلدىك ساراپشىلار تارتىلدى.
پاندەمياعا بايلانىستى فورسايت ونلاين فورماتتا ءوتتى. الايدا «رۋحاني جاڭعىرۋ» قازاقستاندىق قوعامدىق دامۋ ينستيتۋتى» ورتالىعىنىڭ جەتەكشىسى جانار بۋكانوۆانىڭ ايتۋىنشا, مۇنىڭ دا ءوز ەرەكشەلىكتەرى بار.
– بۇل فورسايتتىڭ قىزىعى دا, دەربەستىگى دە قوعام ساناسىن جاڭعىرتۋعا ارنالعاندىعىندا, – دەدى جانار بۋكانوۆا. – ويتكەنى, بۇل جىلدام وزگەرىپ تۇراتىن سالا. فورسايت تەحنولوگيالارى بولاشاقتىڭ كەلبەتىن ناقتى انىقتاۋعا كومەكتەسىپ, ءتيىمدى ناتيجەلەرگە جەتۋ جولدارىن جەڭىلدەتەدى. وكىنىشكە قاراي, بۇل قۇرال ءوزىنىڭ تيىمدىلىگىن دالەلدەپ قويعانىنا قاراماستان عالىمدار مۇنداي زەرتتەۋلەرگە كوپ جۇگىنە بەرمەيدى. بۇگىندە ءبىزدىڭ زەرتتەۋلەرمەن قاتار فورسايت «جاڭا ماماندىقتار اتلاسى» جوباسىنىڭ اياسىندا جۇزەگە اسىپ, جاقسى ناتيجەسىن بەرۋدە. جالپى, فورسايت زياتكەرلىك تەحنولوگيا رەتىندە زەرتتەۋشىلەرگە جاڭا فورماتتاردى قولدانۋ ارقىلى جارقىن بولاشاققا قول جەتكىزۋگە جول اشادى. الداعى ۋاقىتتا بۇل فورسايتتىڭ قورىتىندىسى جاڭا عىلىمي زەرتتەۋلەرگە نەگىز بولادى.
زەرتتەۋ بارىسىندا ساراپشىلار قوعامنىڭ دامۋ ستسەناريىن ءۇش كەزەڭگە ءبولىپ قاراستىردى. جاقىن كەزەڭ 2025 جىلعا دەيىن, ورتا كەزەڭ 2030 جىلعا دەيىن جانە الىس قاشىق – 2050 جىل. ساراپشىلار بولاشاقتىڭ قوعامىن ءتۇزۋ بارىسىندا بۇگىنگىنىڭ ءتۇرلى ترەندتەرىن ءتىزىپ ءوتىپ, پەسسيميستىك, رەاليستىك جانە وپتيميستىك ستسەناريلەرىن جاسادى.
جالپى, ساراپشىلاردىڭ ايتۋىنشا, بۇگىنگى قوعام سپورتقا قۇشتار, زاماناۋي تەحنولوگيانى جەتىك مەڭگەرگەن جانە وزگەرىستەرگە بەيىم جاستاردان قۇرالعان. ماسەلەن, «Global Futures Kazakhstan» جشس-ءنىڭ ۇيىمدىق دامۋ جونىندەگى ساراپشىسى ولەگ مەتسيكتىڭ ايتۋىنشا, بۇگىنگى قالىپتاسقان ترەندتەردىڭ پايدالىسى دا كوپ, قاۋىپتىسى دە بار.
– بۇگىنگى ترەندتەردىڭ بىرقاتارى پاتريوتيزممەن بايلانىستى. وتانسۇيگىش قازاقستاندىقتار قالىپتاسىپ كەلەدى. قاي جەردە جۇرسە دە الەمگە تانىمال وتانداستارىمەن ماقتاناتىن, ۇلتىن ءسۇيىپ, رامىزدەرىن قادىرلەيتىن جاستار كوپ. سونداي-اق ءبىلىم بەرۋ جۇيەسىندە دە جاڭا وزگەرىستەر بار. ستاندارتتى ءبىلىم بەرۋ جۇيەسى ەسكىرىپ, بۇگىندە جەكە باعدارلاما بويىنشا ءىلىم ىزدەگەن قازاقستاندىقتار سانى ارتىپ كەلەدى. بۇل جاقسى ءۇردىس, – دەدى ولەگ مەتسيك.
ايتا كەتەيىك, فورسايت «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ» قولعا الۋىمەن ۇيىمداستىرىلدى. زەرتتەۋ قورىتىندىسى بويىنشا قازاقستاندىق قوعامنىڭ دامۋىنىڭ 2030 جىلعا دەيىنگى «جول كارتاسى» جاسالىپ, ناقتى قادامدار قولعا الىنادى.
