سەنات توراعاسى ماۋلەن اشىمباەۆ دەپۋتاتتىق كانيكۋل كەزىندەگى سەناتورلاردىڭ جۇمىسىنا توقتالدى.
"بيىلعى جاز دەپۋتاتتارىمىز ىندەتپەن كۇرەسكە ءوز ۇلەسىن قوسۋعا تىرىستى. دەپۋتاتتارىمىز وڭىرلەرگە بارعان كەزدە پرەزيدەنتتىڭ تاپسىرمالارىنىڭ ورىندالۋىن باقىلادى. مەملەكەت باسشىسىنىڭ قابىلداپ جاتقان شارالارىن حالىققا جەتكىزۋگە تىرىستى. ءدارى دارمەكتەرگە, مەديتسينالىق بۇيىمدارعا قاتىستى مونيتورينگ جۇرگىزىپ, تۋىنداعان ماسەلەلەردى مەملەكەتتىك ورگانداردىڭ الدىنا قويدى. وڭىرلەردە دەپۋتاتتارىمىز ءبىراز ولقىلىقتاردى دا, پروبلەمالاردى دا كوردى. سول سەبەپتى سەسسيامىز باستالعاننان كەيىن وسىنداي ولقىلىقتار مەن پروبلەمالاردى شەشۋ ءۇشىن ۇكىمەتكە ارنايى ساۋالداردى جولدايتىن بولامىز, بۇل ماسەلەلەردى ۇكىمەتتىڭ الدىندا كوتەرەمىز", - دەدى ول.
سونىمەن قاتار, ماۋلەن اشىمباەۆ دەپۋتاتتاردىڭ الدىندا سىبايلاس جەمقورلىققا قارسى قۇقىقتىق بازانى جەتىلدىرۋ مىندەتى تۇرعانىن اتاپ ءوتتى.
ء"بىز پرەزيدەنتىمىزدىڭ تاپسىرماسىنا سايكەس سىبايلاس جەمقورلىققا قارسى قۇقىقتىق بازانى جەتىلدىرۋىمىز كەرەك. بۇل ماسەلەگە قاتىستى پرەزيدەنتىمىز جاقىندا ۇلكەن جينالىس وتكىزدى. سوندا ءبىراز تاپسىرمالار بەرىلدى. قۇقىق قورعاۋ ورگاندارىنا, باسقا مەملەكەتتىك ورگاندارعا ءتيىستى زاڭدارعا وزگەرىس ەنگىزۋ كەرەكتىگىن دە ايتتى. سوندىقتان ءبىز باس پروكۋراتۋرامەن, ۇكىمەتپەن, مەملەكەتتىك ورگاندارمەن بىرلەسىپ ءتيىستى زاڭداردى قابىلدايتىن بولامىز", - دەدى سەنات سپيكەرى تەلەارناعا بەرگەن سۇحباتىندا.
