"بوتانيكالىق باقتاعى كورسەتىلىم" اتتى كونتسەرتتىك باعدارلاماعا ەكى ءبىر اكتىلى بالەت ەنگەن: تەاتردىڭ شاقىرىلعان حورەوگرافى ريكاردو امارانتەنىڭ "Love Fear Loss" جانە زاماناۋي بالەتمەيستەر رايموندو رەبەكتىڭ "وتكەنگە ساياحات" قويىلىمى.
"Love Fear Loss" – فرانتسۋزدىڭ عاجايىپ ءانشىسى ەديت پيافتىڭ ءومىرى مەن عالامات مۋزىكاسىنان ءنار العان ءۇش دۋەت. ونى تەاتردىڭ جەتەكشى سوليستتەرى ديلارا شوماەۆا مەن دەۆيد دجوناتان, ايجان مۇقاتوۆا مەن سۇندەت سۇلتانوۆ, تاتيانا تەن مەن فارحاد بوريەۆ ورىنداپ شىقتى.
"وتكەنگە ساياحات" بالەتىندەگى باستى پارتيالاردى اينۇر ابىلعازينا, تاتيانا تەن, فارحاد بوريەۆ پەن قازبەك احمەدياروۆ ورىندادى.
كونتسەرتتىڭ ترانسلياتسياسى 2 قىركۇيەكتە, ساعات 20:00 تەاتردىڭ youtube-ارناسىنان كورسەتىلمەك. قالىڭ كوپشىلىكتىڭ تاماشالاۋىنا مۇمكىندىك بار.
كەلەسى كونتسەرتتىڭ ءتۇسىرىلىمى 30-تامىزدا, "استانا بالەت" تەاترىنىڭ ورتالىق كىرەبەرىسىندە ورناتىلعان جاساندى ساحنادا وتەدى. كونستيتۋتسيا كۇنىنە وراي وتكىزىلەتىن ءىس-شارا ونلاين رەجيمدە كورسەتىلىپ, تەاتردىڭ رەسمي ينتەرنەت-پلاتفورمالارى – youtube جانە ينستاگرام ارقىلى تاراتىلادى. كونتسەرت باعدارلاماسىنا " ۇلى دالا مۇراسى" ديۆەرتيسمەنتىنىڭ ۇزدىك حورەوگرافيالىق مينياتيۋرالارى ەنگەن.
"كارانتين كەزىندە "استانا بالەت" تەاترى" ءبىرشاما ونلاين-جوبالاردى جۇزەگە اسىردى. جۇمىستىڭ وسى تۇرىنە ارناپ ۇيىمداستىرىلعان كونتسەرت تۇسىرىلىمدەرى – جۇمىستىڭ جاڭا ساتىسى. مۇندا ۇيرەنشىكتى تۇسىرىلىمنەن ەرەكشەلەنەتىن ءتۇسىرىلىم جۇرگىزىلەدى. بىراق, كورەرمەن قاۋىم ارتىستەرىمىزدىڭ ەڭبەگىن باعالايتىنىنا سەنىمدىمىن. بۇدان بولەك, ءبىز تاعى ءبىر ەرەكشە ونلاين-جوبانى جۇزەگە اسىرماقشىمىز. ول كورەرمەنمەن ۇيرەنشىكتى جۇمىس تارتىبىنە ورالۋىمىزبەن قاتار, پاراللەل جۇزەگە اسىرىلماقشى", دەدى «استانا بالەت» تەاترىنىڭ ديرەكتورى الەكساندر سوۆوستيانوۆ.
ەستەرىڭىزگە سالا كەتەيىك, ۆەدومستۆوارالىق كوميسسيا قازاقستاندا كارانتيندى جۇمسارتۋدىڭ ەكىنشى كەزەڭىن ماقۇلدادى. 31 تامىزدان, ەلىمىزدە مادەني وشاقتار زالدارىن 50% تولتىرىپ, جۇمىسىنا كىرىسە باستايدى. "استانا بالەت" تەاترى 1 قىركۇيەكتەن باستاپ, كورەرمەنىنە ەسىگىن اشپاقشى. الدا وتەتىن ءىس-شارالار جايلى تەاتردىڭ سايتى مەن ينستاگرام پاراقشاسىنان بىلۋگە بولادى.
