نۇر-سۇلتان قالاسىنىڭ اۋەجايىندا اسكەري دارىگەرلەرمەن سالتاناتتى كەزدەسۋ ءوتتى. اتالعان كەزدەسۋدە قورعانىس ءمينيسترىنىڭ ورىنباسارى گەنەرال-مايور رۋسلان شپەكباەۆ قۇتتىقتاۋ ءسوز سويلەدى.
«وسى ۋاقىت ىشىندە ءبىزدىڭ مەديتسينا قىزمەتكەرلەرى قويىلعان مىندەتتەردى لايىقتى ورىنداپ, شەتەلدىك ارىپتەستەرىنىڭ تاراپىنان وڭ باعالاندى. سىزدەردى بەلگىلەنگەن مىندەتتەردىڭ ورىندالۋىمەن شىن جۇرەكتەن قۇتتىقتايمىن. بارشاڭىزعا مىقتى دەنساۋلىق, وتباسىلارىڭىزعا اماندىق, قىزمەتتە تابىس تىلەيمىن», دەپ لەبىزىن ءبىلدىردى قورعانىس ۆەدومستۆوسى باسشىسىنىڭ ورىنباسارى.
ليۆاندا قازاقستاندىق دارىگەرلەر حيرۋرگيالىق, تراۆماتولوگيالىق جانە تەراپەۆتىك ناۋقاستاردى ەمدەۋگە جۇمىلدىرىلدى. كۇن سايىن دارىگەرلىك-مەيىربيكەلىك بريگادالار تەكسەرۋلەر مەن كونسۋلتاتسيالار, قاجەتتى ءدارى-دارمەكپەن ەمدەۋ ءىس-شاراسىن جۇرگىزدى. اسكەري دارىگەرلەر ءارتۇرلى جاستاعى ناۋقاستاردى ەمدەدى. ونىڭ ىشىندە كىشكەنتاي بالالار مەن ەرەسەكتەر دارىگەرلەردىڭ كومەگىنە جۇگىندى. ەڭ قارت ناۋقاسىڭ ءبىرى سول جاق جامباس سۇيەگى سىنعان 90 جاستاعى ەر ادام بولدى. قارياعا ەكى تاراپ ماماندارىنىڭ كۇشىمەن وتا ءساتتى جۇرگىزىلدى. اسكەري دارىگەرلەر بارلىعى 635 ناۋقاستى قابىلداپ, 73 ەمدەلۋشىگە وتا جاسالدى. سونىمەن قاتار بەيرۋت اسكەري گوسپيتالىنە قازاقستان تاراپىنان ءدارى-دارمەك جانە مەديتسينالىق م ۇلىك تۇرىندە گۋمانيتارلىق جۇك تاپسىرىلدى.
«ليۆاندىقتار بىزگە ءدان ريزا. ءبىز قايتىپ بارا جاتقاندا ولار قازاقستان رەسپۋبليكاسىنا, پرەزيدەنتىمىزگە ۇلكەن العىس ءبىلدىردى. جەرگىلىكتى تۇرعىندار ءبىزدى جىلى قابىلدادى. اسكەري گوسپيتال مەن مۋنيتسيپالدىق اۋرۋحانالاردا جۇمىس ىستەۋ بارىسىندا ءبىز ۇلكەن تاجىريبە جينادىق», دەدى قر قم باس اسكەري كلينيكالىق گوسپيتالى باستىعىنىڭ عىلىمي-حيرۋرگيالىق جۇمىس جونىندەگى ورىنباسارى, جەتەكشى حيرۋرگ, مەديتسينا قىزمەتىنىڭ پولكوۆنيگى اسقار مارۋفوۆ.
سونىمەن قاتار جۇمىس بارىسىندا قازاقستاندىق اسكەري دارىگەرلەر ليۆاندىق ارىپتەستەرىمەن ءوزارا ءىس-قيمىل جاساپ, بىرلەسكەن ەمدىك ءىس-شارالار جۇرگىزىپ, قۇندى تاجىريبە الماستى. اسكەري دارىگەرلەر ەلىمىزگە اتتانار تۇستا ليۆان قارۋلى كۇشتەرى باس اسكەري-مەديتسينالىق باسقارماسىنىڭ باستىعى, گەنەرال دجوردج يۋسسەف جانە اسكەري گوسپيتال باستىعى گەنەرال ابۋداحير ناسيممەن كەزدەسۋ ءوتتى. كەزدەسۋگە قاتىسۋشىلار تاجىريبە الماسۋ مەن ەكى ەلدە اسكەري مەديتسينانى دامىتۋ بويىنشا ودان ءارى ىنتىماقتاستىق ماسەلەلەرىن تالقىلادى. سونداي-اق ليۆان تاراپى كورسەتكەن كومەگى ءۇشىن ءبىزدىڭ دارىگەرلەرىمىزگە زور العىسىن ءبىلدىردى.
ايتا كەتۋ كەرەك, اسكەري دارىگەرلەر قر پرەزيدەنتى – قر قك جوعارعى باس قولباسشىسى قويعان مىندەتتى لايىقتى ورىندادى.
