كونفەرەنتسيادا ءبىرىنشى بولىپ ءسوز العان «ەرەكشە تاڭداۋ-شەلەك» كورپوراتيۆتىك قورىنىڭ باعدارلامالىق ديرەكتورى زاحيرا بەگاليەۆا ەرەكشە قاجەتتىلىگى بار ادامدار اراسىندا جۇمىسسىزدىقتى جويۋعا كومپيۋتەرلىك قۇزىرەتتىلىكتەردى مەڭگەرمەۋ سەبەپ بولاتىنىن ايتتى.
– قازىرگى بۇكىل الەمگە تارالعان ۆيرۋستان ساقتانۋدىڭ ەڭ ءتيىمدى جولى – وقشاۋلانۋ. سول سەبەپتى قانشاما ازاماتىمىز وزدەرىنىڭ جۇمىس ورىندارىن تاستاپ, قاشىقتان ەڭبەك ەتۋگە كوشتى. وسى رەتتە كوپ ادام, سونىڭ ىشىندە مۇمكىندىگى شەكتەۋلى قىزمەتكەرلەر كومپيۋتەرلىك قۇزىرەتتىلىكتەرىنىڭ تومەندىگىنەن جۇمىستارىنان ايىرىلىپ قالدى. بۇگىندە ەلىمىزدە 695 مىڭ مۇمكىندىگى شەكتەۋلى ازامات بار. سونداعى 424 مىڭ ەڭبەككە قابىلەتتى ازاماتتىڭ تەك 112 مىڭى عانا, ياعني 26 پايىزى جۇمىسپەن قامتىلعان. بۇل – ەڭبەك جانە حالىقتى الەۋمەتتىك قورعاۋ مينيسترلىگىنىڭ 2020 جىلعى دەرەگى. ەىدۇ ەلدەرىندە مۇنداي كورسەتكىش 40 پايىزدى قۇرايدى. وسى ماسەلەگە جاۋاپتى مينيسترلىك مۇگەدەكتەردى جۇمىسپەن قامتۋ كورسەتكىشىن 2021 جىلعا قاراي 30 پايىزعا جەتكىزۋدى ماقسات ەتىپ وتىر. بيىلعى كوكتەمدە جۇرگىزىلگەن ساۋالدامانىڭ ناتيجەسىندە مۇمكىندىگى شەكتەۋلى ازاماتتاردىڭ كوبى اقپاراتتىق تەحنولوگيادان بەيحابار ەكەنى انىقتالدى. سول ساۋالداماعا قاتىسۋشىلاردىڭ باسىم بولىگى SMM, ونلاين-ساۋدا, جارناما, باعدارلامالاۋ بويىنشا وقىعىسى كەلەتىنىن جەتكىزدى, – دەدى ز.بەگاليەۆا.
ونىڭ ايتۋىنشا, «ەرەكشە تاڭداۋ-شەلەك» كورپوراتيۆتىك قورى وسى ماسەلەلەردى ەسكەرىپ, «LIDERZ» جوباسىن قولعا العان. جوبانى جۇزەگە اسىرۋعا «Samuryk-Kazyna Trust» الەۋمەتتىك جوبالاردى دامىتۋ قورى سەرىكتەس رەتىندە قولداۋ كورسەتىپ وتىر. مۇمكىندىگى شەكتەۋلى جاندار ونلاين-مەكتەپتە كومپيۋتەرلىك ساۋاتتىلىق, SMM-مەندجمەنت, گرافيكالىق ديزاينەر, تيپوگرافيا سەكىلدى قازىرگى تاڭدا سۇرانىسقا يە ماماندىقتاردىڭ كۋرسىنان وتە الادى. ۇيىمداستىرۋشىلار جوبا اياسىندا ءبىلىم العان ازاماتتاردى وقىتىپ قانا قويماي, جۇمىسقا ورنالاسۋىنا كومەكتەسۋدى دە كوزدەيدى.
ال اقپارات جانە قوعامدىق دامۋ مينيسترلىگى جانىنداعى ازاماتتىق قوعام ىستەرى كوميتەتىنىڭ توراعاسى ماديار قوجاحمەت ەلىمىزدەگى مۇمكىندىگى شەكتەۋلى ازاماتتاردىڭ الەۋمەتتىك مۇمكىندىگىن ارتتىرۋ ەڭ وزەكتى ماسەلەلەردىڭ بىرىنە اينالعانىنا توقتالدى.
– ۇكىمەتتىك ەمەس ۇيىمدار ەرەكشە قاجەتتىلىكتەرى بار ادامداردى جۇمىسقا ورنالاستىرۋدا, ءبىلىم بەرۋدە, فيزيكالىق جانە ەموتسيانالدى تۇرعىدا دامىتۋعا جاڭا شەشىمدەر قابىلداي الادى. ولاردىڭ كوپشىلىگى قازىردىڭ وزىندە الەۋمەتتىك كاسىپكەرلىكپەن اينالىسىپ, وسى باعىتتا دا جەمىستى جۇمىس ىستەي الاتىنىن, باسەكەگە قابىلەتتى بولا بىلەتىنىن دالەلدەدى. بىراق الەۋمەتتىك كاسىپكەرلىكپەن اينالىساتىن ۇەۇ سانى – جالپى ۇيىمدار سانىنا شاققاندا وتە از. سوندىقتان وسىنداي ۇيىمداردىڭ قاتارىن كوبەيتۋ كەرەك. ال پاندەميا بىزگە زاماناۋي قىزمەتتەر ادامداردىڭ فيزيكالىق مۇمكىندىكتەرىنە ەمەس, كومپيۋتەرلىك مەحانيزمدەردى مەڭگەرۋ مۇمكىندىگىنە بايلانىستى بولاتىنىن كورسەتتى. سول سەبەپتى ءىت سالاسىنداعى قىزمەتتەرگە مۇمكىندىگى شەكتەۋلى ازاماتتاردى قارقىندى دايارلاۋ قاجەت. ال وسى ماقساتتا قولعا الىنىپ وتىرعان «LIDERZ» جوباسى مۇمكىندىگى شەكتەۋلى ازاماتتارعا ءوزىن دامىتۋدا مۇمكىندىكتەردىڭ شەكسىز ەكەنىنە تاعى ءبىر مارتە دالەل بولا الادى, – دەدى م.قوجاحمەت.
