ەكونوميكا • 25 تامىز، 2020

قازاقستاندا بيىل 18 ملن توننا استىق جيناۋ جوسپارلانعان

12 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا 2020 جىلعى ەگىن جيناۋ جۇمىستارىنىڭ بارىسى قارالدى، - دەپ حابارلايدى Egemen.kz.

ەگىن جيناۋ ناۋقانىنىڭ باستالۋى تۋرالى اۋىل شارۋاشىلىعى ءمينيسترى س. وماروۆ، جانار-جاعارماي ماتەريالدارىمەن قامتاماسىز ەتۋ تۋرالى ەنەرگەتيكا ءمينيسترى ن. نوعاەۆ، وڭىرلەردەگى احۋال تۋرالى اقمولا وبلىسىنىڭ اكىمى ە. مارجىقپاەۆ، قوستاناي وبلىسىنىڭ اكىمى ا. مۇحامبەتوۆ، سولتۇستىك قازاقستان وبلىسىنىڭ اكىمى ق. اقساقالوۆ، قاراعاندى وبلىسىنىڭ اكىمى ج. قاسىمبەك باياندادى.

قازىرگى ۋاقىتتا بارلىق وڭىرلەر جاپپاي ەگىن جيناۋعا كىرىستى. بيىل 22،7 ملن گا جەرگە ەگىن ەگىلدى، بۇل 2019 جىلعى دەڭگەيدەن 439 مىڭ گا  جەرگە ارتىق. ءداندى داقىلدار 15،9 ملن گا (ونىڭ ىشىندە بيداي – 12،1 ملن گا)، مايلى داقىلدار 2،9 ملن گا، ماقتا 125،8 مىڭ گا، قانت قىزىلشاسى 20،9 مىڭ گا، كوكونىس-باقشا ونىمدەرى جانە كارتوپ 457،4 مىڭ گا، جەمشوپ داقىلدارى 3،3 ملن گا القاپقا ەگىلدى. ەگىن جيناۋ جۇمىستارىن جۇرگىزۋ ءۇشىن ارزانداتىلعان ديزەل وتىنىنىڭ قاجەتتى كولەمى — 395 مىڭ توننا (اۋىل شارۋاشىلىعى تاۋارىن وندىرۋشىلەر ءۇشىن ورتاشا باعا — شامامەن 147 تەڭگە/ليتر) انىقتالدى.

رەسپۋبليكادا 145 مىڭ تراكتور، 75 مىڭ تراكتور تىركەمەسى، 38 مىڭ استىق جيناۋ كومباينى، 15 مىڭ دەستەلەگىش، 39 مىڭ جۇك ءاۆتوموبيلى بار. اگروونەركاسىپتىك كەشەن سۋبەكتىلەرىن قولداۋ ءۇشىن «اگرارلىق نەسيە كورپوراتسياسى» اق رەسپۋبليكالىق بيۋدجەتتەن 70 ملرد تەڭگە كولەمىندە بيۋدجەتتىك نەسيە ءبولدى، ولار 3،4 ملن گا ەگىس القاپتارىن قامتي وتىرىپ، تولىعىمەن اوك-ءتىڭ 2400 سۋبەكتىسىنە بەرىلدى. مەملەكەت باسشىسىنىڭ تاپسىرماسى بويىنشا «قاراپايىم زاتتار ەكونوميكاسى» باعدارلاماسى اياسىندا 100 ملرد تەڭگە ءبولىندى، سونداي-اق ازىق-ت ۇلىك كەلىسىمشارت كورپوراتسياسى اۋىل شارۋاشىلىعى ونىمدەرىن فورۆاردتىق تۇردە ساتىپ الدى.

«ۇكىمەت تاراپىنان ەگىن جيناۋ جۇمىستارىن قارجىلاي جانە ماتەريالدىق-تەحنيكالىق قامتاماسىز ەتۋ ءۇشىن بارلىق قاجەتتى شەشىمدەر قابىلداندى. جالپى العاندا، قابىلدانعان شارالاردىڭ ەسەبىنەن وسى جىلى استىقتىڭ بولجامدى جالپى جينالىمى 18 ملن توننا دەڭگەيىندە (2019 جىلعا قاراعاندا 3،4% ءوسىم) جوسپارلانىپ وتىر. قازاقستان ءوزىن استىقپەن تولىق قامتاماسىز ەتەدى. ەكسپورت الەۋەتى دە جاقسى بولادى»، — دەدى ا. مامين. 

ۇكىمەت باسشىسى استىق جيناۋدى ساپالى ءارى ۋاقىتىلى جۇرگىزۋ، اۋىل شارۋاشىلىعى تاۋارىن وندىرۋشىلەردى جانار-جاعارماي ماتەريالدارىمەن قامتاماسىز ەتۋ، سونىمەن قاتار جينالعان ءونىمدى ۋاقىتىلى قابىلداۋ جانە ءتيىستى ساقتاۋ جاعدايلارىن ەرەكشە باقىلاۋ بويىنشا بارلىق قاجەتتى شارالاردى قابىلداۋدى تاپسىردى.

 

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار