بالالاردىڭ الاڭسىز ءبىلىم الۋى ءۇشىن قولجەتىمدى ينتەرنەت جەلىسى كەدەرگىسىز جۇمىس ىستەۋگە ءتيىس. دەگەنمەن, قالادا ۇيالى تەلەفون بايلانىسى ناشار, ءتىپتى عالامتور جۇيەسى تارتپايتىن 46 نۇكتە انىقتالىپ وتىر. وسى كەدەرگىنى ەڭسەرۋ ماقساتىندا وقۋشىلار مەن مۇعالىمدەر ءۇشىن قولجەتىمدى ء"بىلىم" ءتاريفى ىسكە قوسىلماق. رەسمي مالىمەت بويىنشا, بيىل شامامەن الماتىلىق 30 مىڭ بالا مەكتەپ تابالدىرىعىن اتتايدى. وقۋشى سانىنىڭ ارتۋىنا بايلانىستى مەگاپوليستە قىركۇيەكتەن باستاپ جاڭا ەكى ءبىلىم ۇياسى پايدالانۋعا بەرىلمەك.
"جاڭا وقۋ جىلىندا قالامىزدىڭ ورتا ءبىلىم بەرۋ جەلىسىنە جاڭا نىساندار قوسىلادى. قازىرگى تاڭدا الماتى قالاسىندا 205 مەملەكەتتىك, 61 جەكەمەنشىك مەكتەپ جۇمىس ىستەيدى. 1 قىركۇيەكتە قوسىمشا ەكى مەكتەپ ىسكە قوسىلاتىن بولادى. ول – اۋەزوۆ اۋدانىنداعى مامىر شاعىن اۋدانىنداعى 200 ورىندىق جاڭا مەكتەپ جانە تۇركسىب اۋدانىنداعى نۇرشاشقان شاعىن اۋدانىنداعى 600 ورىندىق جاڭا مەكتەپ", دەيدى قالالىق ءبىلىم باسقارماسىنىڭ باسشىسى ءلاززات جىلقىباەۆا.
سونداي-اق, قالاداعى كومپيۋتەرگە مۇقتاج جاندارعا ءتيىستى تەحنيكانى ءبولىپ بەرۋ ماسەلەسى ءجىتى باقىلاۋدا. ول ءۇشىن جەرگىلىكتى ءبىلىم باسقارماسىنىڭ جانىنان قالالىق سىبايلاس جەمقورلىققا قارسى ءىس-قيمىل دەپارتامەنتى, "الماتى-ادالدىق الاڭى" جانە "سانالى ۇرپاق" ۇيىمدارىنان تۇراتىن ارنايى كوميسسيا قۇرىلعان. ودان بولەك, ءاربىر ءبىلىم ورداسىنداعى قارجىنىڭ قايدا جۇمسالىپ جاتقانىن publicbudget.kz سايتىنان كورۋگە بولادى. مەكتەپتەردەگى جوندەۋ جۇمىستارى مەن ماتەريالدىق شىعىن ءۇشىن اتا-انالاردان ءبىر تيىن دا الىنباۋ كەرەك دەيدى كوميسسيا مۇشەلەرى.
– ءبىلىم باسقارماسىنىڭ جانىنان ارنايى كوميسسيا قۇرىلدى. كوميسسيا قۇرامىنا ەنۋدەگى ماقساتىمىز – قوعامدىق باقىلاۋ بولسىن, ادىلدىك بولسىن, مولدىرلىك بولسىن دەگەن ىزگى نيەت. ءبىلىم سالاسىندا اتقارىلىپ جاتقان بارلىق جۇمىستاردىڭ باسى-قاسىندا بولامىز, – دەيدى "سانالى ۇرپاق" جوبالىق كەڭسەسىنىڭ باسشىسى قايىرجان توقىشەۆ.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
