العاشقىلاردىڭ قاتارىندا بوستاندىققا شىققانداردىڭ ءبىرى – دوسبول پالۋانوۆ. وزبەكستاننىڭ 28 جاستاعى ازاماتى 2019 جىلى قر قىلمىستىق كودەكسىنىڭ 109-بابىمەن (دەنساۋلىققا قاساقانا اۋىر زيان كەلتىرۋ) 3 جىلعا سوتتالعان. بيىل جازاسىنىڭ قالعان مەرزىمىن ايىپپۇلعا اۋىستىرىپ, 1 ملن تەڭگەدەن استام قارجى تولەپ, بوستاندىققا شىعىپ وتىر.
«مەنىڭ قاراقالپاقستاندا تۇراتىن انام مەن اعام بار. ولاردىڭ اي سايىن مەنىڭ اماندىعىمدى ءبىلۋ ءۇشىن كەلۋىنە شاماسى بولمادى. سول سەبەپتەن, جىلىنا ءبىر رەت كەلىپ تۇردى. ال, مەن الدىمەن اقتاۋدا, كەيىن اتىراۋدا جالدامالى جۇمىسشى بولدىم. جۇمىس ىستەپ جۇرگەن كەزدە ءىستى بولىپ, سوتتالدىم. مەكەمەدە تۇزەلۋ جولىنا ءتۇسىپ, ءوز-وزىمە تۇرمەگە قايتا تۇسپەۋگە ۋادە بەردىم», -دەيدى دوسبول پالۋانوۆ.
ونىڭ ايتۋىنشا, تۇرمەدە كىتاپحانادان قازاقشا كىتاپتار الىپ, ءتىلىن جاتتىقتىرىپتى. قازىر قازاق ءتىلىن تولىق تۇسىنەدى. قازاقشا سويلەي الادى. سپورتتىق, مادەني شارالارعا ءجيى قاتىسىپ, فۋتبول ويناۋدى ۇيرەنگەن. ەندى ول وبلىستىق پوليتسيا دەپارتامەنتىنە قاراستى كوشى-قون قىزمەتىنە تىركەۋگە تۇرادى. ال, ونىڭ ءىسى اتىراۋ قالالىق اكىمشىلىك سوتىنا جىبەرىلىپ, 10 كۇننىڭ ىشىندە ەلدەن شىعارىلادى.
«تۋعان جەرىمە ورالامىن. ءوز ەلىمدە ءۇي سالىپ, ۇيلەنبەك ويىم بار. قازاقستانداعى جىلدارىم ماعان ومىرلىك ساباق بولدى» دەيدى وزبەكستاندىق دوسبول پالۋانوۆ.
تەمىر توردان بوستاندىققا شىققان تاعى ءبىر ازامات – اقتاۋلىق دانيار. جيىرما تورتتەگى جاس جىگىت 2019 جىلى قر قىلمىستىق كودەكسىنىڭ 194-بابىمەن (قورقىتىپ الۋ) 6 جىلعا باس بوستاندىعىنان ايىرىلعان. ەندى جازاسىنىڭ قالعان بولىگىن ايىپپۇلعا اۋىستىرىپ, بوستاندىققا شىعىپ جاتىر.
«جاستىقپەن وت باسىپ, ەندى بوستاندىققا شىعىپ وتىرمىن. ءومىرىم الدا عوي, سول سەبەپتەن, ەندى قاتەلىك جاسامايمىن دەپ ويلايمىن. مەكەمەدە بىرنەشە رەت سوتتالعانداردى كورىپ, ولاردىڭ ورنىنا ءوزىمدى ەلەستەتىپ كوردىم. وتە قورقىنىشتى»,-دەيدى دانيار.
بوستاندىققا شىققان ازاماتتارعا اتىراۋ قالالىق پروباتسيا قىزمەتى مەن وبلىستىق دەنساۋلىق ساقتاۋ باسقارماسىنىڭ وكىلدەرى كونسۋلتاتسيالىق قىزمەت كورسەتتى. سونداي-اق, تۇزەۋ مەكەمەسىنىڭ قىزمەتكەرلەرى ولاردى جەكە قورعانىش قۇرالدارىمەن قامتاماسىز ەتىپ, دوسبولدى كوشى-قون قىزمەتىنە, ال, دانياردى اقتاۋعا شىعارىپ سالدى.
«ايىپپۇل تولەۋ ارقىلى بوستاندىققا شىعۋ – الەمنىڭ كوپتەگەن ەلدەرىندە بۇرىننان قولدانىلىپ كەلە جاتقان ءتاسىل. مۇنداي تاجىريبە كورشىلەس رەسەيدە دە قولدانىسقا ەنگەن. بىراق, حالىق جازانىڭ وتەلمەگەن بولىگى ءۇشىن ايىپپۇل تولەۋ دەگەندى دۇرىس تۇسىنبەي ءجۇر. سول سەبەپتەن, «سوتتالعاندار اقشا تولەپ, تۇزەۋ مەكەمەلەرىنەن شىعىپ جاتىر» دەگەن قاتە تۇسىنىك قالىپتاسقان. نەگىزىندە ولاي ەمەس. بۇل – زاڭمەن, سوتپەن قارالعان جازانىڭ وتەلمەگەن بولىگىن نەعۇرلىم جەڭىل جازا تۇرىنە اۋىستىرۋ. باسقاشا ايتقاندا, شارتتى تۇردە مەرزىمىنەن بۇرىن بوساتۋ. بۇل ءۇشىن جازاسىن وتەگەن كەزدە سوتتالۋشىنىڭ ءوزىن-ءوزى جاقسى جاعىنان كورسەتۋى دە, ءتارتىبى دە ەسكەرىلەدى. كەز كەلگەن جازاسىن وتەۋشىنىڭ ايىپپۇل تولەپ, ەركىندىككە شىعۋعا قۇقىعى جوق. جازالاۋ مەرزىمىنىڭ بەلگىلى ءبىر بولىگى وتەلگەننەن كەيىن تۇرمە باسشىلىعى مىنەزدەمە بەرىپ, سوتتا ايىپكەردىڭ تۇزەلگەنى, قايتادان زاڭ بۇزۋ ارەكەتىنە بارمايتىنى دالەلدەنىپ, بارلىق سوت شىعىنى تولەنگەننەن كەيىن عانا باس بوستاندىعىن بەرۋ تۋرالى شەشىم شىعارىلادى. بۇل شەشىم شىققانعا دەيىن قىلمىس جاساعاندار مەكەمەدە جازاسىن وتەي بەرەدى» -دەيدى ۋگ-157/9 مەكەمەسىنىڭ باستىعى دۋمان تاجەنوۆ.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
