ءىس-شارادا ءسوز العان بالالاردىڭ قۇقىقتارىن قورعاۋ كوميتەتىنىڭ توراعاسى ەسەنعازى نۇرتولەۋ ۇلى اتالعان اكتسيا ءبىلىم جانە عىلىم مينيسترلىگىنىڭ «اتامەكەن» ۇلتتىق كاسىپكەرلەر پالاتاسى جانىنداعى «مەنىڭ اتامەكەنىم» قوعامدىق بىرلەستىگىمەن بىرلەسىپ قولعا الىنعانىن جەتكىزدى.
«بۇل اكتسيا مەتسەناتتار, ۆولونتەرلەردىڭ كومەگىمەن قولداۋ مەن دەمەۋگە اسا مۇقتاج وقۋشىلاردى قاشىقتان وقۋعا قاجەتتى تەحنيكالىق قۇرالدارمەن, سونداي-اق جوعارى جىلدامدىقتاعى ينتەرنەتپەن قامتاماسىز ەتۋگە باعىتتالعان. ءبىز بارلىق قازاقستاندىقتاردى, كاسىپورىندار مەن ۇيىمداردى, كومپانيالاردى اكتسياعا بەلسەنە قاتىسۋعا, بالالاردىڭ قاشىقتان قيىندىقسىز وقۋىنا كومەكتەسۋگە شاقىرامىز. مينيسترلىكتە ەڭ الدىمەن كومەككە اسا مۇقتاج ءبىلىم الۋشىلاردىڭ ءتىزىمى جاسالدى, ولاردىڭ قاتارىنا ءبىرىنشى جەتىم بالالار جانە جاعدايى تومەن وتباسىلارداعى وقۋشىلار ەنگىزىلدى. سونىمەن قاتار اكتسيا اياسىندا ءوتىنىم بەرۋ ءۇشىن ارنايى «qoldau.edu.kz» سايتى اشىلدى», دەدى ە.نۇرتولەۋ ۇلى. كوميتەت باسشىسىنىڭ بايانداۋىنا قاراعاندا, ءتىزىم بويىنشا تەحنيكالاردى تاراتۋدا اتاۋلى الەۋمەتتىك كومەك الىپ وتىرعان, كوپبالالى وتباسىدان شىققان, اتا-اناسى مۇگەدەك جانە جالعىزىلىكتى اتا-اناسى بار بالالارعا دا باسىمدىق بەرىلەدى. ءوتىنىم بەرۋشىلەر مەن كومەك قولىن سوزعىسى كەلەتىن قايىرىمدى جاندار تۋىنداعان سۇراقتارى بولسا, بالالاردىڭ قۇقىقتارىن قورعاۋ كوميتەتىنىڭ تەلەگرام چاتى جانە كوميتەتتىڭ باسقا دا الەۋمەتتىك جەلىلەردەگى پاراقشالارى, وقۋشىنىڭ ءوز مەكتەبى ارقىلى ماماندارمەن بايلانىسىپ جاۋاپ الا الادى.
ال «مەنىڭ اتامەكەنىم» قوعامدىق بىرلەستىگىنىڭ اتقارۋشى ديرەكتورى ءلاززات التىنبەكقىزى اكتسيانى جۇزەگە اسىرۋدا قولدانىلاتىن سايتتى اتالعان بىرلەستىكتىڭ تەگىن جاساعانىن ايتتى. ء«بىز qoldau.edu.kz سايتىن مۇمكىندىگىنشە جەڭىل قولدانۋعا ىڭعايلاپ جاسادىق. وندا ءبىر باتىرمادان سوڭ ەكىنشىسىن باسۋدىڭ نەمەسە العاشقى ساناتتان كەلەسىسىنە ءوتىپ وتىرۋدىڭ قاجەتى جوق. بارلىعى ءبىر بەتتە انىق كورىنىپ تۇر. پورتالدا قازىردىڭ وزىندە مينيسترلىك راستاپ بەرگەن جەكە كومپيۋتەرى جوق 20 مىڭنان اسا وقۋشىنىڭ ءتىزىمى بار», دەدى ل.التىنبەكقىزى.
ارنايى ءتىزىم ەنگىزىلگەن سايتتا كومەككە مۇقتاج ءبىلىم الۋشىلار «جەتىم بالالار, اتا-انانىڭ قامقورلىعىنسىز قالعان بالالار جانە الەۋمەتتىك از قامتىلعان وتباسىلاردىڭ بالالارى» دەپ ءۇش ساناتقا جىكتەلگەن. بۇدان بولەك اۋىل بالالارىنا ارناپ 4-سانات تا قوسىلىپتى. اتا-انالار ءبىلىم الۋشىنىڭ جەكە سايكەستەندىرۋ نومىرىندەگى سوڭعى 3 تسيفردى تەرىپ, بالاسىنىڭ ەنگىزىلگەن-ەنگىزىلمەگەنىن انىقتاي الادى.
«ەگەر بالاڭىزدى تىزىمنەن تاپپاساڭىز, ۋايىمداماڭىز. بۇل – بار بولعانى ءبىرىنشى كەزەڭ. كومەككە اسا مۇقتاج ءبىلىم الۋشىلاردى تەحنيكامەن قامتاماسىز ەتىپ بولعاننان كەيىن ەكىنشى كەزەڭدى باستايمىز. وسى اۋقىمدى ءىستى جەدەل جۇرگىزۋ – ءسىز بەن ءبىزدىڭ قولىمىزدا. كاسىپكەرلەر قاۋىمى, سونىمەن بىرگە جەكە تۇلعالار دا سايتىمىز ارقىلى تولەمدى وڭاي ءارى تەز جاساي الادى», دەدى «مەنىڭ اتامەكەنىم» قوعامدىق بىرلەستىگىنىڭ اتقارۋشى ديرەكتورى.
