مەديتسينا • 12 تامىز، 2020

ەكپەگە دەگەن كوزقاراستى وزگەرتۋ قاجەت – ب.ساعىنتاەۆ

29 رەت كورسەتىلدى

بيىل جرۆي مەن تۇماۋعا قارسى 430 مىڭ دوزالىق ەكپە ساتىپ الىنادى. بۇل تۋرالى قالا اكىمى باقىتجان ساعىنتاەۆ "الماتى" تەلەارناسىنداعى Aكimat Live باعدارلاماسىنىڭ تىكەلەي ەفيرى بارىسىندا حابارلادى، دەپ جازادى Egemen.kz

الماتىدا جىل سايىن جرۆي مەن تۇماۋ باستالعان كەزدە "تاۋەكەل توپتارعا" ەكپە جاسالادى. ولار – مەديتسينا قىزمەتكەرلەرى، مەديتسينالىق ۇيىمداردا ديسپانسەرلىك ەسەپتەردە تۇراتىن بالالار، التى ايدان اسقان ءجيى اۋىراتىن بالالار، جەتىمدەر ۇيىندەگى بالالار، قارتتار ۇيىندەگىلەر مەن مۇگەدەكتەر، مەديتسينالىق-الەۋمەتتىك مەكەمەلەر قىزمەتتەرىن قولدانۋشىلار، جۇكتىلىكتىڭ ەكىنشى نەمەسە ءۇشىنشى تريمەسترىندەگى جۇكتى ايەلدەر جانە ەپيدەميولوگيالىق كورسەتكىشتەرى بار ناۋقاستار.

بيىلعى جىلى جەرگىلىكتى بيۋدجەت قارجىسى ەسەبىنەن تۇماۋعا قارسى 130 مىڭ دوزالىق ەكپە ساتىپ الۋ جوسپارلانعان. ەكپە قىركۇيەك ايىندا جەتكىزىلەدى دەپ كۇتىلۋدە. تاۋەكەل توبىنداعىلارعا تۇرعىلىقتى جەرلەرىندەگى اۋماقتىق ەمحانالاردا ەكپە تەگىن جاسالادى.

"كۆي سىرقاتى بويىنشا ەپيدەميالىق احۋالدى ەسكەرە وتىرىپ، تاۋەكەل توبىنداعى جانداردى تولىق قامتۋ ءۇشىن جرۆي مەن تۇماۋعا قارسى 300 مىڭ دوزالىق ەكپەنى قوسىمشا ساتىپ الۋ تۋرالى شەشىم قابىلداندى"، دەپ حابارلادى ب.ساعىنتاەۆ جانە تۇرعىندارعا ەكپەگە قاتىستى كوزقاراستى وزگەرتۋ كەرەكتىگىن اتاپ ءوتتى. بۇل سىرقاتتارعا قارسى پارمەندى تەتىك بولىپ تابىلادى.

تۇماۋ ۆيرۋسى جىل سايىن وزگەرىسكە ۇشىرايدى، سوندىقتان ەپيدەميالىق ماۋسىم الدىندا – قازان جانە قاراشا ايلارىندا تۇماۋعا قارسى ەكپەنى الۋ قاجەت. ەكپەدەن سوڭ يممۋنيتەت 14 كۇننەن كەيىن قالىپتاسادى جانە ماۋسىم بويىنا، 1 جىلعا دەيىن ساقتالادى.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار