اۋىل جاماعاتى ورتالىق كوشەگە دانا ابايدىڭ قارا سوزدەرىن تولىقتاي جازىپ, ءىلىپ قويعان. كوشەگە سانمەن قوسا ءمان بەرىپ تۇرعان كەمەڭگەردىڭ قاناتتى سوزدەرى جازىلعان تاقتايشالار ا.قۇنانباي ۇلىنىڭ 175 جىلدىعىنا ءبىزدىڭ تارتۋىمىز دەيدى قارامۇرتتىقتار.
"ەلباسىمىز جانە پرەزيدەنتىمىز قوعامدى رۋحاني جاڭعىرۋعا شاقىرىپ كەلەدى. رۋحاني جاڭعىرۋدى ءار ادام وزىنەن باستاۋ كەرەك. ال ۇلى ابايدىڭ شىعارماشىلىعى ادامزاتتىڭ ساناسىنا سەرپىن بەرىپ, وياتاتىن مىقتى كۇش دەپ بىلەمىن. سول سەبەپتەن بولاشاق جاستارعا ازىق بولسىن دەپ اقىننىڭ ۇلاعاتتى سوزدەرىن كوشەگە ءىلىپ قويۋدى ءجون سانادىق. ءبىزدىڭ اۋىلدىڭ ءبىر ەرەكشەلىگى, كوپ جاعدايدا ورتادان بىرىگىپ, ورتاق نارسەنى جاساۋعا ۇمىتىلىپ تۇرامىز. بۇل تاقتايشالار دا تۇرعىندار كومەگىمەن جاسالدى. بۇل بىزدە ۇردىسكە اينالعان, – دەيدى اۋىل اكىمى مامۋرجان ناجيەۆ.
"ابايدى وقىپ وسكەن جاس, بۇگىنگى كۇنىن ەمەس كەلەشەگىن ويلايتىن تۇلعالىق قىرىن اشادى. بابامىزدىڭ دانالىق سوزدەرى ءبىز سياقتى جاستارعا ۇلكەن وي سالىپ, مىقتى تاربيە قۇرالىنا دا اينالىپ وتىر دەيدى", - اۋىل جاستارى.
كوشەنىڭ تازالىعىنا عانا ەمەس جۇرەكتىڭ دە تازالىعىنا ءمان بەرىپ بەرىپ وتىرعان اۋىل وسىلايشا ابايدىڭ قارا سوزدەرىنەن ءنار الىپ وتىر. مۇنداعى حالىقتىڭ 99 پايىزى وزبەك ۇلتى بولسا دا قازاقتىڭ باس اقىنىن كوككە كوتەرىپ وتىر. بۇل ۇلى ابايدى وقۋعا, تانىپ-بىلۋگە ۇلت پەن ءتىلدىڭ, شەكارانىڭ قاجەتى جوق ەكەنىن اڭعارتسا كەرەك.
