ەكى مىڭ جىلدان استام تاريحى بار تاراز قالاسىندا دا اباي كۇنى لايىقتى دەڭگەيدە اتالىپ ءوتتى. تاراز قالاسىنىڭ اكىمدىگى تاراپىنان وبلىس ورتالىعىنداعى اباي ەسكەرتكىشىنە گۇل شوقتارى قويىلىپ, كەلۋشىلەر ۇلى اقىن رۋحىنا تاعزىم ەتتى. سونداي-اق جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن اباي ەسكەرتكىشىنىڭ ماڭىندا اقىن شىعارمالارىنان راديوكونتسەرت قويىلدى. مۇندا اقىننىڭ ولەڭدەرى وقىلىپ, اندەرى شىرقالدى. ال, وبلىستىق ش.ءۋاليحانوۆ اتىنداعى امبەباپ-عىلىمي كىتاپحاناسى اباي الەمىنە قاتىستى كىتاپتاردان كورمە ۇيىمداستىردى. كورمەدە بىرقاتار تىلدەرگە اۋدارىلعان ابايدىڭ ولەڭدەرى مەن قاراسوزدەرى جانە اباي تۋرالى جازىلعان كىتاپتار بار. اعىمداعى جىلى بۇل باعىتتا اتالعان كىتاپحانا قورىنا 67 اتاۋدان تۇراتىن 200-دەن استام كىتاپ ساتىپ الىنعان. اباي كۇنىنە وراي, رەسپۋبليكالىق "ەجەلگى تاراز ەسكەرتكىشتەرى" تاريحي-مادەني قورىق-مۋزەيىنىڭ ۇجىمى كوپشىلىككە ۇلى اقىننىڭ بەينەسى سالىنعان ءتۇرلى كارتينالاردى تانىستىردى.
سونىمەن قاتار "جاستار" قابىلەت ورتالىعىندا "عىلىم تاپپاي ماقتانبا" اتتى اباي شىعارماشىلىعىنا ارنالعان كونكۋرستىڭ جەڭىمپازدارىن ماراپاتتاۋ ءراسىمى ءوتتى. جيىندا وبلىستىق ىشكى ساياسات باسقارماسىنىڭ باسشىسى داۋىل بەيسەنقۇلوۆ كوپشىلىكتى ەلىمىز ءۇشىن ماڭىزى زور رۋحاني مەرەكە – اباي كۇنىمەن قۇتتىقتاسا, "ادىرنا" ۇلتتىق-ەتنوگرافيالىق بىرلەستىگىنىڭ توراعاسى ارمان اۋباكىر ۇلى اباي شىعارماشىلىعىنا توقتالدى. سونداي-اق بۇل كۇنى وبلىستىق ىشكى ساياسات باسقارماسى جاريالاعان "ماڭگىلىك ەل الىپتارى" اتتى ەسسە بايقاۋىنىڭ دا جۇلدەگەرلەرى انىقتالدى.
جامبىل وبلىسى
