ايماقتار • 09 تامىز، 2020

كارانتين كەزىندەگى تۋعان كۇن كاراوكە-باردا تويلانعان

32 رەت كورسەتىلدى

پەتروپاۆلدىڭ ورتالىق اۋداندارىنىڭ بىرىندە ورنالاسقان "Royal Palace" مەيرامحاناسى ەڭ جاقسى ساۋىق ورىندارىنىڭ ءبىرى. بىراق قازىر كارانتين بولعاندىقتان ونىڭ ەسىگى ايقارا اشىق بولماۋى كەرەك-ءتى. الايدا وسى مەيرامحانانىڭ ىشىندە ساۋىق بولىپ، مۋزىكا ويناپ جاتقاندىعى، ءتىپتى جانجالدىڭ ايعاي-شۋى ەستىلەتىنى تۋرالى دابىل پوليتسياعا تۇنگى ساعات ۇشتە تۇسكەن، دەپ حابارلايدى Egemen.kz

جەدەل جەتكەن اۆتوپاترۋلگە مەيرامحانا قىزمەتكەرلەرى ەسىك اشپاعان. قوسىمشا كۇشتەر كەلىپ، ەسىكتى اشۋعا ءماجبۇر ەتۋگە تۋرا كەلگەن. ساۋىق مەيرامحانانىڭ بارىندا ورىن العان ەكەن. ونداعى "قوناقتار" ءبىرىنشى پوليتسيا بولىمىنە جەتكىزىلەدى. سۇراستىرۋ بارىسىندا كاراوكە-بارعا كەلگەندەر 1989 جىلى تۋعان قالا تۇرعىنىنىڭ تۋعان كۇنىن اتاپ جاتقان.

قازىر كارانتيندىك شارالاردى بۇزعانى ءۇشىن ءار كەلۋشىگە قاتىستى ماتەريال جينالىپ جاتىر. كەيىن ول اكىمشىلىك كودەكستىڭ "حالىقتىڭ سانيتاريالىق-ەپيدەميالىق سالاماتتىلىعى سالاسىنداعى زاڭناما تالاپتارىن، سونداي-اق گيگيەنالىق نورماتيۆتەردi بۇزۋ" بابى بويىنشا جاۋاپكەرشىلىككە تارتۋ ءۇشىن تاۋارلار مەن قىزمەتتەردىڭ ساپاسىن باقىلاۋ دەپارتامەنتىنە جىبەرىلەدى. اتالعان كوڭىل كوتەرۋ ورنىنىڭ يەسىنە قاتىستى زاڭنامامەن كوزدەلگەن شارالار قابىلدانادى.

سقو پد باستىعىنىڭ ءبىرىنشى ورىنباسارى، پوليتسيا پولكوۆنيگى قانات ايتباەۆتىڭ ايتۋىنشا، وبلىس اۋماعىندا 20 شىلدەدەن باستاپ سانيتارلىق-ەپيدەميالىق نورمالاردىڭ ساقتالۋىن قاداعالاۋ جانە مونيتورينگىلەۋ جونىندەگى قۇرىلعان توپتار جۇمىس ىستەۋدە. ولاردىڭ قۇرامىندا اكىمدىك، پروكۋراتۋرا، پوليتسيا جانە سانيتارلىق-ەپيدەميالىق قىزمەت ماماندارى بار.

"وسىنداي ءىس-قيمىلدىڭ ناتيجەسىندە سوڭعى ءۇش اپتادا سولتۇستىك قازاقستان وبلىسىندا سانيتارلىق-ەپيدەميالىق سالاماتتىلىعى سالاسىنداعى زاڭناما تالاپتارىنىڭ 642 بۇزۋشىلىعى انىقتالدى. 253 بۇزۋشىلىق – وبلىس ورتالىعىندا، 389-ى اۋدانداردا"، دەدى پوليتسيا پولكوۆنيگى.

سوڭعى جاڭالىقتار

اقسۋدا قارتتار ءۇيى ورتەندى

ايماقتار • بۇگىن، 09:57

ۇقساس جاڭالىقتار