نۇر-سۇلتاندا انا مەن بالا ءولىمىنىڭ ازايۋى بايقالادى

وتىرىسقا نۇر-سۇلتان قالاسى اكىمىنىڭ ورىنباسارى باقتيار ماكەن، دەنساۋلىق ساقتاۋ ۆيتسە-ءمينيسترى اجار عينايات، قالاداعى مەديتسينالىق ۇيىم باسشىلارى قاتىستى. 2020 جىلعى قاڭتار-ماۋسىمدا ەلوردادا انا ءولىمى 7،2%، نارەستە ءولىمى 1،3% تومەندەدى. سونىمەن قاتار نەوناتالدى ءولىمنىڭ (-1،5%) جانە بەس جاسقا دەيىنگى بالالار ءولىمىنىڭ (3%) تومەندەۋى بايقالادى.

"نۇر-سۇلتاندا ءسابي ءولىمى تومەندەدى. بىراق بۇل بوساڭسۋعا سەبەپ ەمەس. جۇمىستى جاقسارتۋ قاجەت"، دەدى جيىندا نۇر-سۇلتان قالاسى اكىمىنىڭ ورىنباسارى باقتيار ماكەن.

نۇر-سۇلتان قالالىق قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءا.رۇستەموۆانىڭ ايتۋىنشا، 2019 جىلمەن سالىستىرعاندا ەلورداداعى جالپى سىرقاتتانۋشىلىق 9،4%-عا تومەندەدى.

اۋرۋشاڭدىق قۇرىلىمىندا تىنىس الۋ جۇيەسىنىڭ اۋرۋلارى الدىڭعى ورىندا – 40%-دى قۇرايدى. بەلگىلى بولعانداي، 2020 جىلدىڭ 1 قاڭتارىنان باستاپ قالانىڭ مەديتسينا ۇيىمدارى مىندەتتى الەۋمەتتىك مەديتسينالىق ساقتاندىرۋ جۇيەسىندە جۇمىس ىستەي باستادى. ءمامس پەن كتمك بويىنشا مەديتسينالىق كومەك كورسەتۋگە كەلىسىم-شارتتار جاساعان نۇر-سۇلتان قالاسىنداعى بارلىق 95 مەديتسينا ۇيىمىندا دەنساۋلىق ساقتاۋ مينيسترلىگى مەن "ساقتاندىرۋ" اقپاراتتىق جۇيەلەرىمەن تولىقتاي ينتەگراتسيالانعان مەديتسينالىق اقپاراتتىق جۇيەلەر ەنگىزىلدى. مەديتسينالىق كومەككە تىكەلەي قولجەتىمدىلىكتى قامتاماسىز ەتۋ ءۇشىن "ۇيدەگى دارىگەر" جوباسى بەلسەندى تۇردە جۇزەگە اسىرىلۋدا. بيىل 6 نىسان اشىلدى، جىل سوڭىنا دەيىن تاعى 4 نىساندى اشۋ جوسپارلانۋدا.

"كۆي بويىنشا احۋالدى تۇراقتاندىرۋ ءۇشىن اتقارىلعان وراسان زور جۇمىس ءوز ناتيجەسىن بەردى. سونىمەن، بۇگىندە قالا تۇرعىندارىنىڭ وتىنىمدەرىنىڭ سانى 2،3 ەسە – كۇنىنە 3 410-نان 1 493-كە دەيىن; قوڭىراۋلار سانى ەكى ەسە – كۇنىنە 2 368-دەن 1155-كە دەيىن ازايدى. ونىڭ ىشىندە كۆي بويىنشا 5 ەسە – كۇنىنە 350-دەن 71-گە دەيىن تومەندەدى. اۋرۋحانالارعا تۇسكەن ناۋقاستار سانى 4 ەسە – كۇنىنە 400-دەن 100-گە دەيىن ازايدى. تيىسىنشە، توسەك-ورىن قورىنىڭ جۇكتەمەسى 90%-دان 39%-عا دەيىن تومەندەدى"، دەدى ءا. رۇستەموۆا.

"مەملەكەت باسشىسى ستاتسيونارلاردا جوسپارلى تۇردە ەمدەۋگە باسا نازار اۋداردى. بۇل تەك كوروناۆيرۋس ينفەكتسياسى بار ناۋقاستارعا عانا قاتىستى ەمەس، ءبىز ساپالى مەديتسينالىق كومەككە مۇقتاج ازاماتتاردىڭ بارلىعىنا قامقورلىق جاساۋىمىز كەرەك. سونداي-اق قالا تۇرعىندارىنىڭ كەلىپ تۇسكەن شاعىمدارىن دا ۇدايى ەسكەرۋ قاجەت. جۇمىس قايتا جولعا قويىلعان كەزدە ولاردىڭ سانى ارتادى"، دەدى ب.ماكەن.

كەزدەسۋ قورىتىندىسى بويىنشا ەلوردانىڭ دەنساۋلىق ساقتاۋ جۇيەسىنىڭ باسىم باعىتتارى انىقتالدى. بۇل دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىن جۇزەگە اسىرۋ، مەديتسينا ۇيىمدارىن كادرلارمەن قامتاماسىز ەتۋ، ەپيدەميولوگتاردىڭ ءرولىن كۇشەيتۋ، پاندەميا كەزىندەگى جۇمىس تاجىريبەسىن ەسكەرە وتىرىپ، بمسك جۇمىسىن ۇيىمداستىرۋ، سونداي-اق كۇز-قىس كەزەڭىندەگى كوروناۆيرۋس ينفەكتسياسىنىڭ كەلەسى تولقىنىنا دايىندىق جۇرگىزۋ.