ايماقتار • 30 شىلدە، 2020

تاتارستان دارىگەرلەرى جامبىل مەديتسيناسىن جوعارى باعالادى

94 رەت كورسەتىلدى

جۋىردا تاجىريبە الماسۋ ماقساتىندا اۋليەاتا وڭىرىنە كەلگەن تاتارستان دارىگەرلەرى جامبىل وبلىسىنىڭ اكىمى بەردىبەك ساپارباەۆپەن كەزدەستى. كەزدەسۋ بارىسىندا تاتارستان دارىگەرلەرى جامبىل وبلىسىنىڭ دەنساۋلىق ساقتاۋ جۇيەسىنىڭ دامۋ دەڭگەيىنە جوعارى باعا بەردى. ءوز كەزەگىندە بەردىبەك ساپارباەۆ بىلىكتى ماماندارعا شاقىرۋدى قابىل العانى ءۇشىن العىس ءبىلدىردى. سونىمەن قاتار، الەمدەگى كۇردەلى ەپيدەميالىق احۋال جاعدايىندا باۋىرلاس كورشى مەملەكەتتەردىڭ قولداۋى اسا ماڭىزدى ەكەنىن اتاپ ءوتتى، - دەپ جازادى Egemen.kz

"سىزدەردىڭ رەسپۋبليكالارىڭىزدىڭ باسشىلىعىمەن بۇرىننان كەلە جاتقان دوستىق بايلانىسىمىز بار. مەن ءبىر كەزدەرى باسشىلىق ەتكەن شىعىس قازاقستان وبلىسىنىڭ سەمەي قالاسىندا تاتار ەتنوسىنىڭ ءوكىلدەرى كوپتەپ ورنالاسقان. ول جاقتا جىل سايىن سابانتوي مەرەكەسى وتكىزىلىپ، الەءمنىڭ تۇكپىر-تۇكپىرىنەن تاتار ۇلتىنىڭ وكىلدەرى شاقىرىلادى. بىردە وعان تاتارستاننىڭ بۇرىنعى پرەزيدەنتى مينتيمەر شايميەۆ تە قاتىسقان بولاتىن. سىزدەردىڭ رەسپۋبليكالارىڭىزدىڭ قازىرگى باسشىلىعىمەن دە سەرىكتەستىك، سونىمەن بىرگە دوستىق قارىم-قاتىناس ساقتاپ قالعانىمىزعا قۋانىشتىمىن"، دەدى بەردىبەك ساپارباەۆ. سونداي-اق، اكىم بۇگىندە رەسەي فەدەراتسياسى، اسىرەسە تاتارستان كوروناۆيرۋسقا قارسى كۇرەستە جوعارى ناتيجەلەرگە قول جەتكىزە بىلگەنىن، بۇل ەڭ اۋەلى دارىگەرلەردىڭ ەرەن ەڭبەگىنىڭ جەمىسى ەكەنىن اتاپ ءوتتى.

ء"بىز بۇعان دەيىن قازاقستاندا بولعان ەمەسپىز. نۇر-سۇلتان، الماتى، شىمكەنت، قاراعاندى سياقتى قالالار تۋرالى ەستىگەنبىز. شىنىن ايتۋ كەرەك، جامبىل وبلىسى مەديتسيناسىنىڭ دەڭگەيى اۋىلدىق كورسەتكىشپەن بىردەي دەپ ويلاعانبىز. بىراق ءبىز قاتەلەسىپپىز. سىزدەردىڭ دارىگەرلەرىڭىز كوروناۆيرۋسپەن اۋىراتىن ناۋقاستاردى ەمدەۋدە قولداناتىن مەديتسينالىق كومەك ۇلگىلەرى، ەمدەۋ حاتتامالارى، ءتىپتى اۋىلدىق جەردەگى مەديتسينالىق كومەك كورسەتۋ مودەلدەرىڭىز ءىس جۇزىندە رەسەيدەگىدەن ەش ايىرماشىلىعى جوق. سىزدەردەن دە ۇيرەنەتىن نارسەمىزدىڭ بار ەكەنىن مويىندايمىز. وكىنىشكە قاراي، بۇگىندە الەمنىڭ بىردە-ءبىر ەلىندە كوروناۆيرۋستى ەمدەۋدىڭ ناقتى حاتتاماسى جوق. سوندىقتان ءبىزدىڭ كەزدەسۋىمىز تاجىريبە، پىكىر الماسۋعا نەگىزدەلگەن. ءبىز قازاقستاندىق ماماندارمەن بىرگە كوروناۆيرۋسپەن كۇرەسكە ۇلەسقوسامىز دەپ ۇمىتتەنەمىز"، دەيدى توپ جەتەكشىسى، تاتارستان رەسپۋبليكاسى ورتالىق وكرۋگى باسشىسىنىڭ كوروناۆيرۋستىق ينفەكتسياسى بار ناۋقاستارعا رەانيماتسيالىق كومەك كورسەتۋ جونىندەگى ورىنباسارى الەكساندر ۆانيۋشين. ءوز سوزىندە بەردىبەك ساپارباەۆ بۇگىندە وڭىردە جاعدايدىڭ تۇراقتانعانىن جەتكىزدى. «وبلىستا كوروناۆيرۋسپەن اۋىراتىنداردىڭ سانى 3391 ادامدى قۇرايدى. قازىرگى كەزدە ولاردىڭ جارتىسىنا جۋىعى ەمدەلىپ شىقتى. ينفەكتسيالىق جانە پروۆيزورلىق ستاتسيونارلار اشىلىپ، اۋرۋحانالار مەن ءدارىحانالاردى ءدارى-دارمەكپەن قامتاماسىز ەتۋ ماسەلەسى شەشىلدى. دەگەنمەن، مەديتسينالىق جابدىقتارمەن قامتۋدا ماسەلە بار. ءاسىرەسە وكپەنى جاساندى جەلدەتۋ اپپاراتتارىنىڭ جەتىسپەۋشىلىگى بايقالادى. بۇل ماسەلەنى شەشۋگە ءبىز كاسىپكەرلەردى، ءىرى كومپانيالاردى تارتتىق. تامىز ايىندا بارلىق مەديتسينالىق مەكەمەلەردى وكپەنى جاساندى جەلدەتۋ اپپاراتتارىمەن تولىق قامتاماسىز ەتە الامىز دەپ ويلايمىن. جاقىن ارادا وبلىستىڭ بارلىق اۋداندارى ءۇشىن 10 كومپيۋتەرلىك توموگراف ساتىپ الۋ جوسپارلانىپ وتىر. كادر تاپشىلىعى ماسەلەسىن شەشۋ ءۇشىن زەينەت دەمالىسىنداعى دارىگەرلەر مەن مەديتسينالىق جوعارى وقۋ ورىندارىنىڭ تۇلەكتەرىن دە جۇمىسقا شاقىرتتىق. بۇل جۇمىسقا شامامەن 300-گە جۋىق ادام تارتىلدى»، دەدى بەردىبەك ساپارباەۆ. سونىمەن قاتار، ول وڭىردەگى جانە جالپى رەسپۋبليكاداعى جاعدايدىڭ تۇراقتانعانىنا قاراماستان، ءالى ونى جاقسى دەپ باعالاۋعا بولمايتىنىن ايتتى. سوندىقتان قازاقستان پرەزيدەنتىنىڭ كارانتيندى تاعى ەكى اپتاعا ۇزارتۋ، سودان كەيىن بارىپ بىرتىندەپ شەكتەۋ شارالارىن جەڭىلدەتۋ تۋرالى شەشىمىنىڭ دۇرىس ەكەنىن اتاپ ءوتتى.

كەزدەسۋ سوڭىندا وزدەرىنىڭ قازاقستانعا كەلۋىنە مۇمكىندىك جاساعانى ءۇشىن قازاقستان ۇكىمەتىنە جانە جامبىل وبلىسىنىڭ باسشىلىعىنا ريزاشىلىقتارىن ءبىلدىردى. سونداي-اق، جامبىلدىق دارىگەرلەردى تاتارستانعا ءىسساپارمەن كەلۋگە شاقىردى.

 

جامبىل وبلىسى

سوڭعى جاڭالىقتار

ۇقساس جاڭالىقتار