پارلامەنت • 28 شىلدە، 2020

نۇرلان نىعماتۋلين: ءماجىلىس دەپۋتاتتارى ايماقتاردا جۇمىستارىن جالعاستىرۋدا

32 رەت كورسەتىلدى

ءماجىلىس توراعاسى نۇرلان نىعماتۋليننىڭ پىكىرىنشە، پارلامەنت سەسسياسى اياقتالعاننان كەيىن ءداستۇرلى تۇردە ۇيىمداستىرىلاتىن دەپۋتاتتاردىڭ ايماقتارداعى جۇمىسى بيىل ەرەكشە ماڭىزعا يە. بۇل تۋرالى پارلامەنت ءماجىلىسىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

قازىر تەك قازاقستاندا عانا ەمەس، بۇكىل الەمدە ورىن العان كوروناۆيرۋس ىندەتى بارلىق قىزمەت سالالارىندا، ونىڭ ىشىندە دەپۋتاتتاردىڭ جۇمىسىنا ءوز اسەرىن تيگىزدى. ءماجىلىس توراعاسى نۇرلان نىعماتۋلين جىل سايىن دەپۋتاتتاردىڭ ءداستۇرلى تۇردە ۇيىمداستىرىلاتىن ايماقتارعا ساپارى وزگەرىپ، ءماجىلىس دەپۋتاتتارى وڭىرلەردە قوعامدىق باقىلاۋ اياسىندا كوروناۆيرۋس ىندەتىمەن كۇرەسكە ارالاسىپ جۇرگەنىن ايتتى.

"پارلامەنتتىك دەمالىس" – بۇل قالىپتاسقان تۇسىنىك. سەبەبى، جۇمىس جالعاسۋدا. تەك جۇمىس بارىسى پارلامەنت قابىرعاسىنان ايماقتارعا اۋىستى. بيىل ءبىز ماجىلىسمەندەردىڭ ءداستۇرلى كەزدەسۋلەرىنىڭ فورماتىن وزگەرتتىك. باستى ماقساتىمىز ساقتالدى. ول – ەلىمىزدىڭ بارلىق شەت جانە شالعاي اۋىلارىنا بارۋ. دەپۋتاتتار قوعامدىق باقىلاۋ اياسىندا ءدارىحانالار جەلىلەرىنە مونيتورينگ جۇرگىزىپ، اۋرۋحانالاردى ارالادى. حالىقتى قاجەتتى ءدارى-دارمەكتەرمەن قامتاماسىز ەتۋدى باقىلاۋعا الىپ، دارىگەرلەردىڭ جۇمىس جاعدايلارىمەن تانىستى. ماجىلىسمەندەر گۋمانيتارلىق كومەكتىڭ جەتكىزىلۋى مەن تاراتىلۋىن قاداعالاپ، كومەككە مۇقتاج تۇرعىنداردىڭ وتىنىشتەرىن قابىلدادى. دەپۋتاتتار ۆولونتەرلىك ورتالىقتاردىڭ جۇمىسىنا دا بەلسەندى قاتىسۋدا. ارىپتەستەرىمىزدىڭ قولداۋىمەن كوروناۆيرۋس ىندەتىنىڭ اسەرىنەن قيىن جاعدايعا تاپ بولعان تۇرعىندارعا ازىق-ت ۇلىكتەر جەتكىزىلدى. بۇگىنگى تاڭدا ماجىلىسمەندەردىڭ بەلسەندى جۇمىسىن الەۋمەتتىك جەلىلەردەن بايقاۋعا بولادى. ءبىزدىڭ كوپتەگەن ارىپتەستەرىمىز Facebook-تەگى پاراقشالارىندا ايماقتارداعى جۇمىستارى تۋرالى ۇنەمى جاريالاپ وتىرادى. مىسالى، دەپۋتاتتار نۇرتاي سابيليانوۆ، سنەجاننا يماشەۆا، ازات پەرۋاشەۆ، ايگۇل نۇركينا، گۇلنار بيجانوۆا، يرينا سميرنوۆا، زاۋرەش امانجولوۆا، ايقىن قونىروۆ، ماگەررام ماگەرراموۆ، نۇرجان التاەۆ، مەرۋەرت قازىبەكوۆا جانە باسقالار"، دەپ اتاپ ءوتتى نۇرلان نىعماتۋلين.

سونىمەن بىرگە، ءماجىلىس توراعاسى دەپۋتاتتار قايىرىمدىلىق كومەك كورسەتىپ، حالىققا قيىن ۋاقىتتا قولداۋ كورسەتۋ ءۇشىن قايىرىمدىلىق جوبالارىنا قاتىسىپ جاتقاندارىن ايتتى.

ءماجىلىس توراعاسى سەسسيا بارىسىندا دەپۋتاتتار مەملەكەت باسشىسى قاسىم-جومارت توقاەۆتىڭ كوروناۆيرۋستىڭ تارالۋىنا قارسى تۇرۋ، ىندەت كەزىندە جانە جالپى ەلدىڭ داعدارىسقا قارسى دامۋى جونىندەگى باستامالارىن زاڭنامالىق قولداۋدى قامتاماسىز ەتۋ ماقساتىندا زاڭناماعا بىرقاتار تۇزەتۋلەر قابىلداعانىن اتاپ ءوتتى. بۇل ەڭ الدىمەن، سالىق سالۋ جانە الەۋمەتتىك تولەمدەر ماسەلەلەرىنە قاتىستى.

سونداي-اق، نۇرلان نىعماتۋلين قازىر الەۋمەتتىك جەلىلەردە دەپۋتاتتاردىڭ شەتەلدە دەمالىپ جۇرگەنى تۋرالى اقپاراتقا نازار اۋداردى.

"مەن بۇل اقپاراتتىڭ شىندىققا جاناسپايتىنىن ناقتىلاپ ايتقىم كەلەدى. ولاردىڭ بارلىعى ەلدە، حالىققا وسى قيىن كەزەڭنەن وتۋگە كومەكتەسۋدە. ءبىزدىڭ ايماقتارداعى جۇمىسىمىز ءالى دە جالعاسادى. بۇل الداعى پارلامەنت سەسسياسىندا قاجەتتى زاڭناماعا وزگەرىستەر ەنگىزۋ كەرەكتىگىن تالداۋعا مۇمكىندىك بەرەدى. قازىردىڭ وزىندە زاڭنامالىق قورجىندا ونداعان جاڭا زاڭ جوبالارى بار"، دەدى ءماجىلىس توراعاسى.

سونىمەن قاتار، نۇرلان نىعماتۋلين ءماجىلىس دەپۋتاتتارىمەن قاتار، قازىر ايماقتاردا سەنات دەپۋتاتتارى جۇمىس ىستەپ جاتقاندىعىن اتاپ ءوتتى.

– بارشا قازاقستاندىقتارعا دەنساۋلىق، اماندىق جانە سابىرلىلىق تىلەيمىن. ءبىز بىرلىگىمىزدىڭ ارقاسىندا بۇل قيىندىقتان وتەمىز دەپ سەنەمىن، – دەدى ءماجىلىس توراعاسى نۇرلان نىعماتۋلين.

سوڭعى جاڭالىقتار

ۇقساس جاڭالىقتار