قاسىم-جومارت توقاەۆ پرەمەر-مينيستر اسقار ءماميندى قابىلدادى

پرەزيدەنت • 23 شىلدە، 2020

قاسىم-جومارت توقاەۆ پرەمەر-مينيستر اسقار ءماميندى قابىلدادى

1484 رەت كورسەتىلدى

مەملەكەت باسشىسى پرەمەر-ءمينيستردىڭ ەلىمىزدەگى ەپيدەميولوگيالىق احۋالدى تۇراقتاندىرۋ جانە الەۋمەتتىك-ەكونوميكالىق دامۋ تۋرالى ەسەبىن تىڭدادى. بۇل تۋرالى Egemen.kz اقوردانىڭ ءباسپاسوز قىزمەتىنە سىلتەمە جاساپ حابارلايدى.

جىبەك اعداري

اسقار ءماميننىڭ ايتۋىنشا، ەلىمىزدەگى كوروناۆيرۋس جۇقتىرعانداردىڭ سانى 2،1 پايىزعا تومەندەگەن، اۋرۋحانالارداعى ىندەتكە شالدىققان ازاماتتارعا ارنالعان جالپى توسەك-ورىن 30،4 مىڭنان 49،7 مىڭعا دەيىن كوبەيگەن، سونىڭ ەسەبىنەن رەانيماتسياداعى ورىندارعا قاجەتتىلىك 12 پايىزعا، ستانتسيوناردا 25 پايىزعا ازايعان. سونداي-اق COVID-19 ىندەتىنەن جازىلىپ شىققاندار 63 پايىزعا ارتىپ، جەدەل-جاردەم شاقىرتۋشىلار سانى 31 پايىزعا تومەندەگەن.

ۇكىمەت باسشىسى قازاقستان پرەزيدەنتىنە بارلىق وڭىرلەردەگى تۇراقتاندىرۋ قورى قاجەتتى ءدارى-دارمەكتەر مەن مەديتسينالىق قۇرال-جابدىقتارمەن تولىقتىرىلىپ، اۋرۋحانالاردى وكپەنى جاساندى جەلدەتۋ جانە وتتەگى كونتسەنتراتورلارىمەن قامتاماسىز ەتۋ جۇمىستارى ءجۇرىپ جاتقانىن جەتكىزدى.

اسقار مامين قاسىم-جومارت توقاەۆقا شەكتەۋ شارالارى كەزىندە كاسىپكەرلىك سۋبەكتىلەرىن قولداۋ، جۇمىسپەن قامتۋ جانە ەلىمىزدىڭ الەۋمەتتىك-ەكونوميكالىق دامۋىنا قاتىستى وزەكتى ماسەلەلەر جونىندە ايتتى.

مەملەكەت باسشىسى پرەمەر-مينيسترگە ايماقتاردى، اسىرەسە، اۋىلداردى قاجەتتى ءدارى-دارمەكتەرمەن جانە مەديتسينالىق قۇرال-جابدىقتارمەن قامتاماسىز ەتۋدى تاپسىردى.

پرەزيدەنتتىڭ ايتۋىنشا، پاندەميا كەزىندە جانە ودان كەيىنگى ۋاقىتتا ۇكىمەتتىڭ الدىندا ەكونوميكانىڭ جوسپارلى دامۋىن قامتاماسىز ەتىپ، ازاماتتاردىڭ الەۋمەتتىك قاجەتتىلىكتەرىن قاناعاتتاندىرۋ مىندەتى تۇر. قازىرگى ۋاقىتتا جاڭا ەكونوميكالىق باعىتتى ازىرلەۋ جۇمىستارى ءجۇرىپ جاتىر. ول مەملەكەت باسشىسىنىڭ الداعى جولداۋىنىڭ نەگىزگى بولىگىن قۇرايتىن بولادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز