بۇگىن نۇر-سۇلتان قالاسىنىڭ جيىن پۋنكتىندەگى جاس ساربازدار قازاقستان رەسپۋبليكاسى قارۋلى كۇشتەرى قاتارىنا اتتاندى. ساربازدار اسكەري انت قابىلداعاننان كەيىن جامبىل وبلىسىنداعى اسكەري بولىمدەردە قىزمەت اتقارادى.
"قارۋلى كۇشتەرىمىز وزىق تەحنولوگيالار جانە زاماناۋي تەحنيكالارمەن كەڭىنەن جابدىقتالۋدا. سول سەبەپتى اسكەرىمىزدىڭ قاتارىن جاس ساربازدارمەن تولىقتىرۋدى ساپالى جۇرگىزۋگە اسا كوڭىل بولىنۋدە", دەيدى نۇر-سۇلتان قالاسى قورعانىس ىستەرى جونىندەگى دەپارتامەنتى باستىعىنىڭ ورىنباسارى ەربولات ءجۇسىپوۆ.
"بيىل پرەزيدەنت ق.ك. توقاەۆتىڭ جارلىعى بويىنشا كوكتەمگى اسكەرگە شاقىرۋ ناۋقانىنىڭ وتكىزىلۋ ۋاقىتى ۇزارتىلىپ, ازاماتتاردى اسكەرگە جونەلتۋ مەرزىمى تامىز ايىنا دەيىن سوزىلاتىن بولادى. ناۋرىز-مامىر ارالىعىنداعى بولعان ەلدەگى كارانتين شارالارى ۋاقىتىندا مەرزىمدى اسكەري قىزمەتكە شاقىرۋ ۋاقىتشا توقتاتىلىپ, مامىر ايىنىڭ اياعىندا قايتا باستالدى. مامىر-ماۋسىم ايلارىندا قازاقستان رەسپۋبليكاسىنىڭ ۇلتتىق قاۋىپسىزدىك قىزمەتىنىڭ شەكارا اسكەرلەرى مەن ۇلتتىق ۇلان اسكەري بولىمدەرىن جاس ساربازدارمەن تولىقتىرۋ جوسپارلى تۇردە ورىندالدى", دەيدى ە.ءجۇسىپوۆ.
ونىڭ ايتۋىنشا, اسكەري ءبولىم كومانديرلەرىنەن ەلوردالىق ساربازداردىڭ ۇزدىك قىزمەتتەرى مەن ەلدىڭ قورعانىس قابىلەتتىلىگىنە قوسىپ وتىرعان ەڭبەكتەرى ءۇشىن العىستار دا ءجيى كەلىپ تۇرادى.
سونداي-اق ە.ءجۇسىپوۆ: "شىلدە ايىنان باستاپ قازاقستان رەسپۋبليكاسى قارۋلى كۇشتەرى اسكەري بولىمدەرىندە قىزمەتىن اياقتاعان ساربازداردىڭ ورىنىنا جاس تولىمدى جونەلتە باستادىق. شاقىرىلاتىن جاستارىمىز قاپشاعاي قالاسىنداعى دەسانتتىق-شابۋىلداۋشى اسكەرلەر جانە اقتاۋ قالاسىنداعى تەڭىز جاياۋ اسكەرى اسكەري بولىمدەرى سەكىلدى ەليتالىق بولىمدەرگە بارادى. سونىمەن بىرگە مەحانيكالاندىرىلعان بريگادالار مەن اۋە قورعانىسى كۇشتەرى بولىمدەرىندە 18 بەن 27 جاس ارالىعىنداعى جاستارمەن تولىقتىرامىز", دەدى ول.
