بۇل رەتتە, ءجولۇستى جاياۋ جۇرگىنشىلەر وتپەسى تۇرعىنداردىڭ قاۋىپسىز ءوتۋى ءۇشىن قورشاۋلى-ەسكەرتۋ دابىلىمەن جانە جارىقپەن جاراقتاندىرىلعان. بۇعان دەيىن شاعىن اۋدان تۇرعىندارىنا ەمحاناعا, بالالار باقشاسىنا, مەكتەپكە جەتۋ قيىن سوعاتىن, ءتىپتى تەمىرجول استىمەن تارتىلعان سۋ وتكىزۋ تۇرباسى ارقىلى دا وتۋگە تۋرا كەلەتىن.
بۇل جەردە تاعى اۆتوموبيل جولى بار, الايدا ول اۋىلدان الشاق جەردەن وتەدى. جاياۋ جۇرگىنشىلەر وتپەسىن سالۋ تۋرالى ماسەلەنىڭ تالقىعا تۇسكەنىنە دە كوپ بولدى.
– جول ءۇستى بەتوندى جاياۋ جۇرگىنشىلەر وتپەسى تەمىر جولدى كەسىپ وتەتىن ازاماتتار قاۋىپسىزدىگى دەڭگەيىن ارتتىرادى. ونىڭ جالپى ۇزىندىعى 10 مەتردى, ال ەنى 1 مەتر 93 سانتيمەتردى قۇرايدى. ءبىز ادامداردىڭ وزەكتى ماسەلەسىن شەشىپ, كومەك كورسەتە العانىمىزعا وتە قۋانىشتىمىز, – دەيدى اتىراۋ ماگيسترالدىق جەلى بولىمشەسىنىڭ باس ينجەنەرى ساعىن سەيىلحانوۆ. بالالار مەن ولاردىڭ اتا–انالارى دا ءدان ريزا.
– ءبىز بالالار مەكتەپتەن ورالعانشا ولار ءۇشىن الاڭدايتىنبىز. ەندى وسىنداي جاڭا قاۋىپسىز جاياۋ جۇرگىنشىلەر وتپەسى ءۇشىن تەمىرجولشىلارعا وتە ريزامىز, – دەپ اعىنان جارىلدى جەرگىلىكتى تۇرعىن نۇربيعا داۋلەتباەۆا.
