وڭىرلىك كوممۋنيكاتسيالار قىزمەتىنىڭ اقپاراتىنا قاراعاندا, وبلىس اكىمى ماحامبەت دوسمۇحامبەتوۆ استراحاننان كەلگەن بەس مەديتسينا قىزمەتكەرىمەن كەزدەستى.
"سىزدەرگە جانە استراحان وبلىسىنىڭ گۋبەرناتورى يگور بابۋشكينگە ەرەكشە العىسىمدى بىلدىرگىم كەلەدى. قازىرگى ۋاقىتتا ءبىزدىڭ دارىگەرلەرىمىز الدىڭعى شەپتە ايانباي ەڭبەك ەتۋدە. دەگەنمەن, ءبىرازى قاۋىپتى ىندەتتى جۇقتىردى, قالعانى ىندەتپەن كۇرەسۋ ۇستىندە. اتقارار جۇمىس كوپ. بىزگە سىزدەردىڭ تاجىربيەلەرىڭىز, بىلىمدەرىڭىز بەن بىلىكتەرىڭىز قاجەت. سوندىقتان, بۇگىننەن باستاپ كىرىسەتىن جۇمىستارىڭىزعا ساتتىلىك تىلەيمىن", - دەدى اتىراۋ وبلىسىنىڭ اكىمى ماحامبەت دوسمۇحامبەتوۆ.
رەسەيلىك دارىگەرلەر جۇقپالى اۋرۋلارعا ارنالعان بلوكتا قاۋىپتى ىندەتتى جۇقتىرعان ناۋقاستاردى ەمدەۋگە جۇمىلادى. الايدا, وبلىستىق دەنساۋلىق ساقتاۋ باسقارماسى باسشىلارىنىڭ ايتۋىنشا, رەسەي دارىگەرلەرى وبلىستىق كارديولوگيالىق ورتالىق پەن ينفەكتسيالىق ستاتسيوناردا جۇمىس ىستەيتىنى كوزدەلىپ وتىر. ولاردىڭ كەيبىرى اۋداندارعا جىبەرىلۋى مۇمكىن.
ء"بىزدى وتە جىلى قابىلداعاندارىڭىزعا راقمەت. تولىققاندى جۇمىس جاساۋىمىز ءۇشىن بارلىق جاعداي جاسالعان. ەندى ءبىز ارىپتەستەرىمىزگە كوروناۆيرۋسپەن كۇرەستە كومەكتەسۋ ءۇشىن بار كۇشىمىزدى سالۋعا تىرىسامىز. قولدان كەلگەننىڭ ءبارىن جاسايمىز", - دەدى استراحاندىق دارىگەر اننا چەپەل.
