يران تاراپى سوڭعى كۇندەرى كەيبىر دوستاس ەلدەر ارقىلى اقش-تان كەلىسسوز باستاۋ تۋرالى ۇسىنىستار تۇسكەنىن راستادى. الايدا بۇل ۇسىنىستارعا جاۋاپ رەتىندە يران ءوز ينفراقۇرىلىمىنا شابۋىل جاسالعان جاعدايدا اۋىر سالدار بولاتىنىن ەسكەرتكەن. ەل بيلىگى ەنەرگەتيكالىق نىساندارعا قارسى كەز كەلگەن ارەكەتكە قارۋلى كۇشتەر تاراپىنان جەدەل ءارى قاتاڭ جاۋاپ بەرىلەتىنىن مالىمدەدى.
يران ءيزرايلدىڭ ەڭ ءىرى مۇناي وڭدەۋ زاۋىتتارىنا شابۋىل جاسادى
سونداي-اق يران پارلامەنتىنىڭ سپيكەرى موحامماد-باگەر گاليباف تا اقش-پەن ەشقانداي كەلىسسوز بولماعانىن ايتىپ, مۇنداي اقپاراتتاردى جالعان دەپ اتادى. ونىڭ پىكىرىنشە, مۇنداي حابارلار مۇناي جانە قارجى نارىقتارىنا اسەر ەتۋ ءۇشىن تاراتىلادى.
ترامپتىڭ مالىمدەمەلەرىنەن كەيىن Brent مۇنايى باعاسى شامامەن 9%-عا تومەندەپ, باررەلى 96,96 دوللاردى قۇرادى.
ال دونالد ترامپ جۋرناليستەرگە بەرگەن سۇحباتىندا كەلىسسوزدەر ەكى كۇننەن بەرى ءجۇرىپ جاتقانىن جانە يران يادرولىق قارۋدان باس تارتۋعا كەلىسكەنىن ايتقان. ونىڭ ايتۋىنشا, كەلىسسوزدەر «جوعارى لاۋازىمدى تۇلعامەن» جۇرگىزىلىپ جاتىر, بىراق ول جاڭا كوشباسشى مودجتابا حامەنەي ەمەس.
دونالد ترامپ: يرانعا قارسى سوعىستا اقش-قا ناتو ەلدەرىنىڭ كومەگى قاجەت ەمەس
سونىمەن قاتار ترامپ يرانداعى جاڭا اياتوللا اقش-پەن بايلانىسقا شىقپاعانىن, ءتىپتى ونىڭ ءتىرى ەكەنى دە بەلگىسىز ەكەنىن مالىمدەدى. ونىڭ بولجامىنشا, اقش پەن يران اراسىنداعى ىقتيمال بايلانىستار تۋرالى اقپارات يران بيلىگىنىڭ كەيبىر وكىلدەرىنە جەتپەگەن بولۋى مۇمكىن, سەبەبى ەل قازىرگى جاعدايدا بايلانىس ورناتۋدا قيىندىقتارعا تاپ بولىپ وتىر.
