ءبىلىم • 15 شىلدە، 2020

كەلەشەگى كەمەل باستاما

8 رەت كورسەتىلدى

ۆولونتەرلىك باستامالار بۇگىندە قازاقستان ءۇشىن وتە وزەكتى تاقىرىپقا اينالىپ وتىر. قازاقستاندىقتاردا، اسىرەسە جاستاردا قوعام يگىلىگى ءۇشىن ەرىكتى ەڭبەككە اركىمنىڭ اتسالىسۋى قاجەت ەكەنى، سونىمەن بىرگە بۇكىل ەلدىڭ تابىس­تى ءومىرىنىڭ العىشارتى دەگەن تۇسىنىك قالىپتاسا باستادى. ءبىز دە قاراعاندىلىق جاستاردىڭ قوعام ومىرىنە بەلسەندى ارالاسىپ، ازاماتتاردىڭ ومىرىنە بەيجاي قاراماۋلارىنا باۋلىپ جاتىرمىز.

­­­ادام الەۋەتىن اشۋدىڭ، ءبىلىم الۋشىلارعا جاقسى تاربيە بەرۋدىڭ جانە الەۋمەتتىك تاجى­ريبەنى دامىتۋدىڭ ەڭ ءتيىمدى جانە ماقساتتى قۇرالدارىنىڭ ءبىرى – ۆولونتەرلىك قىزمەت. ۆولونتەرلىك وقىتۋ مەن تاربيەلەۋدەگى يننو­ۆاتسيالىق تاربيەلىك ءتاسىل سانالادى. وسى ارادا «Azamat» قوعامدىق بىرلەستىگىنىڭ ۇيىم­داستىرۋىمەن «Birgemiz: Bilim» جالپىۇلت­تىق جوباسى اياسىندا اۋىل مەكتەپتەرىنىڭ 200-گە جۋىق جوعارى سىنىپ وقۋشىسىنا اعىلشىن ءتىلى، كومپيۋتەرلىك ساۋاتتىلىعىن ارتتىرۋ بويىنشا كۋرس­تار ۇيىمداستىرىلىپ، كەشەندى جۇمىس جۇرگىزىلۋدە.

كومپيۋتەرلەر كۇندەلىكتى ءومىرىمىزدىڭ ءبىر بولىگىنە اينالدى. قازىر تەحنولو­گيالار قول­دانىلمايتىن قانداي دا ءبىر سالالاردى ەلەس­تەتۋ قيىن. وسى سەبەپتى جوبا اياسىندا اۋىل مەكتەپتەرىنىڭ جوعارى سىنىپ وقۋشىلارىنا كومپيۋتەرلىك ساۋاتتىلىق ارتتىرۋ بويىنشا وقىتۋ كۋرستارى ۇيىمداستىرىلدى. كۋرس بارىسىندا وقۋشىلار «جاساندى ينتەللەكت»، «عىلىمي تەحنيكالىق جوبالار»، «Photoshop»، «ساپالى ۆيدەو جاساۋ»، «كيبەرقاۋىپسىزدىك» تاقىرىپتارىندا ءبىلىمىن جەتىلدىرىپ، تاجىري­بەسىن شىڭدايدى. جازعى دەمالىس كەزىندە وقۋشىلارعا پايدالى اقپارات بەرىپ، بولاشاقتا قاجەت ماشىق ۇيرەتكەن ۆولونتەر، «Smart zhardem» جوباسىنىڭ اۆتورى بولات بابەك كۋرس جۇرگىزدى.

ودان بولەك ءححى عاسىرداعى تاعى ءبىر نەگىزگى تالاپقا اينالعان اعىلشىن ءتىلى ماسەلەسى دە نازاردان تىس قالعان جوق. وزدەرىڭىز بىلەتىندەي، قازىر اعىلشىن ءتىلى تەك شەتەلدە جۇمىس ىستەپ، ءومىر ءسۇرۋ ءۇشىن ەمەس، ەلدە وتىرىپ تا قاجەت اقپارات وقىپ، عالامدىق تەندەنتسيالاردان حاباردار بولۋعا جول اشادى. دەرەككوزدەردەن اقپارات الىپ، وقيعانىڭ ءمان-جايىن تۇسىنۋگە دە اعىلشىن ءتىلى قاجەت. جاستاردىڭ انا تىلىمەن بىرگە شەتەل ءتىلىن ءبىلۋى دە بۇگىنگى زا­ماننىڭ باس­تى تالابىنا اينالدى. سول سە­بەپتى «Birgemiz: Bilim» جالپىۇلتتىق جوباسى اياسىندا اۋىل مەكتەپتەرىنىڭ جوعارى سىنىپ وقۋشىلارىنا اعىلشىن ءتىلى كۋرسىن وتكىزۋدى ءجون كوردىك. اعىلشىن ءتىلىن ۇيرەتۋشى – جاس ۇستاز، جوبانىڭ ۆولونتەرى بوتاگوز زايدۋللينا. الەمدەگى سوڭعى جاعدايلارعا بايلانىستى ساباقتار ونلاين رەجىمدە ءوتتى. ناتيجە جامان ەمەس. وقۋ باعدارلاماسى تەز جانە وڭاي يگەرىلەدى. ساباق­تار دا سوڭعى تەحنولوگيالارعا نەگىزدەلىپ، تىڭ ادىستەمەلەر قولدانىلىپ، قىزىقتى ءوتتى. وقۋ­شىلار بۇرىن-سوڭدى تۇسىنبەگەن تاقىرىپ­تارىن قايتا قاراپ، مۇعالىمنەن تىڭعىلىقتى جاۋاپ الدى.

«Birgemiz: Bilim» جالپىۇلتتىق جوباسى اقپارات جانە قوعامدىق دامۋ مينيسترلىگى، قاراعاندى وبلىستىق جاستار ساياساتى ماسەلە­لەرى باسقارماسى جانە قاراعاندى وبلىسى ءبىلىم باسقارماسىنىڭ قولداۋىمەن، ازامات­تىق باس­تامالاردى قولداۋ ورتالىعىنىڭ مەم­لەكەتتىك گرانتى شەڭبەرىندە جۇزەگە اسىرىلىپ جاتقانى ءمالىم. بۇل كۋرستار الداعى ۋاقىتتا دا جالعاسىن تاۋىپ، تالاي جاستىڭ ارمانىنا قول جەتكىزۋىنە سەپتىگىن تيگىزەدى دەگەن سەنىمدەمىز. ۆولونتەر جىلى شەڭبەرىندە بەلگىلەنگەن ۆولونتەرلىك باعىتتار بويىنشا باسقا دا ءىس-شارالار قولعا الىنىپ، رۋحاني، مادەني مۇرالاردى دارىپتەۋ، جاستار اراسىندا تانىتۋ بويىنشا دا كەشەندى جۇمىستار اتقارىلۋدا.

«Birgemiz: Bilim» جالپىۇلتتىق جوباسى اياسىندا كۋرستار سانىن ارتتىرىپ، قامتيتىن اۋداندار سانىن دا كوبەيتۋ جولعا قويىلعان. پاندەميا كەزىندە جاستارعا قاشىقتان وقىتۋ دەگەننىڭ ءوزىن-ءوزى دامىتۋعا تاپتىرماس مۇمكىندىك ەكەنىن ءىس جۇزىندە كورسەتۋگە مۇمكىندىك اشىلىپ وتىر. ولارعا ونلاين وقۋدىڭ قىر-سىرىن كورسەتىپ، كەلەشەكتە حالىقارالىق ۋنيۆەرسيتەتتەر ۇسىنعان شەتەلدىك پلاتفورمالاردا دا وزدىگىنەن ءبىلىم الۋعا باۋلۋدى ماقسات ەتتىك. راسىمەن، ادام ۇزدىكسىز ءبىلىم الۋى قاجەت. ال ىزدەنگەن، نيەتتى ادامعا قاشاندا جول تابىلارى ءسوزسىز. اۋىل-ايماقتاعى بالالاردىڭ مۇنان حابارى بولا بەرمەيتىنى انىق. سوندىقتان اعىلشىن ءتىلى مەن كومپيۋتەرلىك ساۋاتتىلىق كۋرستارىنىڭ وسى ورايدا پايداسى مول ەكەنىنە كۇمانىمىز جوق.

 

داۋرەن راحىمبەك،

ۆولونتەر

سوڭعى جاڭالىقتار

ۇقساس جاڭالىقتار