ايماقتار • 13 شىلدە، 2020

پاۆلوداردا ءبىر عاسىردان استام تاريحى بار كىتاپحانا جاڭارتىلۋدا

47 رەت كورسەتىلدى

"جۇمىسپەن قامتۋدىڭ جول كارتاسى" باعدارلاماسى اياسىندا س.تورايعىروۆ اتىنداعى وبلىستىق امبەباپ عىلىمي كىتاپحاناسىنا كۇردەلى جوندەۋ جۇرگىزىلدى، دەپ حابارلايدى pavlodarnews.kz ءتىلشىسى.

ىرگەسى 1908 جىلى قالانعان عيماراتتىڭ بالالار ادەبيەتى ءبولىمى (لۋناچارسكي كوشەسى، 9/2 ءۇي) جارتى عاسىردان استام ۋاقىت جوندەۋ كورمەگەن.

وبلىستىق كىتاپحانانىڭ باسشىسى شولپان شاحمەتوۆانىڭ ايتۋىنشا، ماۋسىم ايىنىڭ 15-نەن بەرى مەردىگەر كومپانيا "كۇمبەز" جشس كۇردەلى جوندەۋجۇمىستارىن باستاعان.

1

"بالالار ادەبيەتى بولىمىنە كۇردەلى جوندەۋ جۇرگىزۋ مەنىڭ باسشىلىققا كەلگەن ۋاقىتىمنان بەرى قولعا العان شارۋالارىمنىڭ ءبىرى بولدى"، - دەيدى شولپان شاحمەتوۆا. - عيماراتتىڭ ىشكى-سىرتقى قابىرعالارى جارىلىپ، توبەسىنەن سۋ اعا باستاعان سوڭ جاۋاپتى مەكەمەلەرگە جوندەۋ جۇمىستارى تۋرالى قانشاما رەت ءوتىنىش بەردىك. نەگىزى عيماراتقا 2004 جىلى كوسمەتيكالىق جوندەۋ جۇمىستارى جۇرگىزىلگەن. دەگەنمەن، عاسىردان اسا تاريحى بار عيماراتتىڭ سۋ، جىلۋ، جارىقتاندىرۋ جۇيەسىندەگى ايتارلىقتاي ماسەلەلەردى شەشۋ ءۇشىن كۇردەلى جوندەۋدىڭ كەرەكتىگى ايدان انىق ەدى. سول سەبەپتەن 2017 جىلى ماۋسىم ايىندا "كۇمبەز" جشس-مەن 2 ملن 589 مىڭ تەڭگەگە جوبالىق-سمەتالىق قۇجاتتامالارى جاسالعان بولاتىن. ءدال وسى جىلدىڭ قىركۇيەك ايىندا مەملەكەتتىك ساراپتامادان وتتىك. قازىنادان قارجى بولىنىسىمەن بىردەن، 2020 جىلدىڭ ماۋسىم ايىنان كۇردەلى جوندەۋدى باستاپ كەتتىك. جوبانىڭ جالپى سومماسى 136 ملن 219 مىڭ تەڭگەنى قۇرايدى.

مەردىگەرلىك ۇيىمنىڭ باسشىسى ۆيكتور دەگتيارەۆتىڭ سوزىنشە، بولىنگەن اقشا، ۋاقىتىلى ءتيىمدى جۇمسالىپ، بارلىق جۇمىس جوسپارعا ساي جۇرگىزىلىپ جاتقان كورىنەدى.

"قازىر جۇمىستىڭ باستاپقى كەزەڭىندەمىز. ىشكى جانە سىرتقى جۇمىستار قاتار جاسالۋدا. كىتاپحانا توبەلەرى جوندەلىپ، قابىرعالارى تەگىستەلۋدە. جوسپارعا سايكەس كەيبىر قابىرعالار الىنىپ، سونىڭ نەگىزىندە كىتاپحانا ءىشى كەڭ ءارى جارىق قالىپقا ەنۋدە. الداعى ۋاقىتتا جىلۋ، جارىق جۇيەلەرى قالىپقا كەلتىرىلەدى. ەسىك-تەرەزەلەر اۋىستىرىلىپ، ەدەندەرى جاڭارتىلادى. ەڭ سوڭىندا اكتەۋ-سىرلاۋ جۇمىستارىن جاسايمىز"،– دەيدى جاۋاپتى مامان.

وبلىسىمىزداعى بىردەن-ءبىر رۋحاني ازىق ورداسى سانالاتىن – بالالارعا ارنالعان باستى كىتاپحانانىڭ جاعدايىنىڭ وتە مۇشكىل حالىنە كىتاپحانا قىزمەتكەرلەرىنەن بولەك، وقىرمان قاۋىم دا بەي-جاي قارامايدى. س.تورايعىروۆ اتىنداعى پمۋ پروفەسسورى جەڭىس مانانباەۆ باستاعان زيالى قاۋىم وكىلدەرى وبلىس اكىمىنىڭ بلوگىنا حات تا جازعان بولاتىن. بۇل ماسەلە بەس نەمەرەسىن جەتەكتەپ اپتاسىنا ەكى-ءۇش رەت كىتاپحاناعا باس سۇعاتىن، قر ءبىلىم بەرۋ ۇزدىگى، قازاقتان جۋرناليستەر وداعىنىڭ مۇشەسى ەرسىن تاقىرباسوۆتى دا قاتتى الاڭداتقان.

"رۋحاني ءبىلىمنىڭ، رۋحاني مادەنيەتتىڭ ورداسى كىتاپحانا بولاتىن بولسا، ال ادامنىڭ جان ازىعى كىتاپ بولىپ تابىلادى. كىتاپپەن دوس بولعان ادامنىڭ وي-ءورىسى كەڭ، ءسوز مادەنيەتى جوعارى، سانالى جان-جاقتى بولىپ تاربيەلەنەرى ءسوزسىز. سوندىقتان مەيىلىنشە، نەمەرەلەرىمدى كىتاپحاناعا اكەلۋگە تىرىسامىن. 1-سىنىپتى ەندى اتتاپ كىتاپ وقۋدى باستاپ كەلە جاتقان نەمەرەلەرىمە جەڭىل ەرتەگى، اڭگىمەلەردى وقۋعا ۇسىنامىن. ولار كەيدە سۋرەت تە سالادى. ال ۇلكەندەرىنە كۇردەلىرەك تاقىرىپتاردى ۇسىنامىن. وسى تۇرعىدا كىتاپحانا قىزمەتكەرلەرىنە العىسىمدى بىلدىرمەكپىن. ىزدەگەن كىتاپتارىمىزدى تاۋىپ بەرىپ، نەمەرەلەرىممەن سۋرەت سالىپ، ءاردايىم جاعدايىمىزدى جاسايدى. كىتاپحاناعا كۇردەلى جوندەۋ جاسالىپ جاتقاندىعىن ەستىپ، كىتاپحاناشىلاردان كەم قۋانعان جوقپىز. مادەني-اعارتۋشىلىق مەكەمەنىڭ ايانىشتى ءحالى مەنىڭ دە كوڭىلىمدى كۇپتى ەتكەن ەدى. بۇعان دەيىن كىتاپحانادا بالالاردىڭ ەمىن-ەركىن كىتاپ وقىپ، بوس ۋاقىتتارىن ءتيىمدى وتكىزۋىنە تولىققاندى مۇمكىندىك جوق-تۇعىن. اسىرەسە، ءبىرىنشى قاباتىنداعى كوگەرگەن قابىرعالاردىڭ جاعىمسىز ءيىسى قولقاڭدى قاباتىن ەدى. ازىرگە كىتاپحانانىڭ الەۋمەتتىك جەلىلەرىندەگى ءىس شارالارعا بەلسەنە ارالاسۋدامىز. جاقىندا "اجەلەر ەرتەگىلەرى" جوباسىنا قاتىستىق. دەگەنمەن ءوزىمىز بارىپ، قاتىسقانعا جەتپەيدى. ءۇي-ىشىمىزبەن جوندەۋدىڭ تولىق بىتكەنىن اسىعا كۇتۋدەمىز"، – دەيدى ەرسىن قاسقي ۇلى.

شولپان شاحمەتوۆا كۇردەلى جوندەۋ بىتىسىمەن كىتاپحانامىزدا وزگەرىستەر كوپ بولاتىنىن ايتادى. باستاۋىش سىنىپ وقۋشىلارى مەن مەكتەپتكە دەيىنگى بالالارعا ارناپ، جاڭا تانىمدىق ويىن ورتالىعى اشىلماق. مۇندا كىتاپحاناشىلار بالالارمەن اپپليكاتسيا، سكراپبۋكينگ، كۆيللينگ، سۋرەت سالۋ سياقتى جۇمىستار وتكىزەتىن بولادى. سونىمەن قاتار جەرگىلىكتى فوتوگراف نەمەسە كوركەم سۋرەتشىلەرمەن جيىندار وتكىزىلمەك. كىتاپحاناداعى لەكتسيا زالى كينوتەاتر مەن كونفەرەنتسيا زالىنىڭ مىندەتىن قوسا اتقارادى. سونداي-اق اقىن-جازۋشىلارمەن كەزدەسۋلەر، ادەبي كەشتەر، كونفەرەنتسيالار وتكىزىلەتىن بولادى. كوۆوركين ورتالىعى دا ءوز جۇمىسىن جالعاستىرادى. 

كۇردەلى جوندەۋ جۇمىستارى اعىمداعى جىلدىڭ سوڭىندا اياقتالىپ، 2021 جىلى بالالارعا ارنالعان كىتاپحانا وقىرماندار ءۇشىن تولىق پايدالانۋعا بەرىلمەك.

سوڭعى جاڭالىقتار

اداسقان بالالار امان-ەسەن تابىلدى

ايماقتار • 07 تامىز، 2020

ۇقساس جاڭالىقتار