پرەمەر-ليگا ويىندارىندا ستاديونداردىڭ جارتىسى دا تولمايتىنى بەلگىلى. ماسەلەن, ەڭ كوپ كورەرمەن جينايدى دەگەن «اقتوبە» كلۋبىنا 2019 جىلعى پرەمەر-ليگادا ءوز الاڭدارىنداعى ويىندارىنا ءبىر ماتچتا ورتا ەسەپپەن 7280 ادام جينالعان. كورەرمەندەردىڭ كەلۋ كورسەتكىشى بويىنشا ەكىنشى ورىنداعى قايراتتىڭ ءوز الاڭدارىنداعى ويىندارىنا ورتاشا ەسەپپەن ءبىر ماۋسىمدا ويىن سايىن 6394 كورەرمەن, ورداباسىعا 4288 كورەرمەن, تارازعا 3973 كورەرمەن, استاناعا 3856 كورەرمەن جينالعان.
اتالعان الاڭداردىڭ جالپى سىيىمدىلىعىنا توقتالار بولساق, «اقتوبەنىڭ» ستاديونى 12 800 ادامدىق, الماتىداعى ورتالىق ستاديون 23 804, شىمكەنتتەگى مۇڭايتپاسوۆ اتىنداعى ستاديون 20 000, تارازداعى ستاديون 12 525, استانا ارەنا 30 000 ادامدىق ەكەنى بەلگىلى. جوعارىداعى سانداردى ەسكەرسەك, ەڭ كوپ كورەرمەن باراتىن بۇل بەس كلۋبتىڭ ىشىندە تەك «اقتوبەنىڭ» الاڭى عانا جارتىسىنان ارتىق تولادى ەكەن. ال قايرات, ورداباسى, تاراز ستاديوندارى شامامەن 25 پايىزعا عانا تولسا, ەلوردالىق كلۋبتىڭ ستاديونى تەك 13 پايىزعا عانا تولادى.
وسىدان-اق كورەرمەندەردىڭ كوپ جينالمايتىنىن كورۋگە بولادى. بىراق بۇل شىنىمەن دە قازاقتار فۋتبول كورگىسى كەلمەيدى دەگەن ءسوز بە؟ فۋتبول فەدەراتسياسىنىڭ Youtube جەلىسىندەگى رەسمي ارناسىندا 82,4 مىڭ ادام جازىلعان ەكەن. ءبىر قولدانۋشى ءبىر ويىندى عانا تاماشالادى دەگەننىڭ وزىندە بۇل ءار كلۋبتىڭ ويىنىن تاعى 7 مىڭعا جۋىق ادام Youtube ارقىلى تاماشالايدى دەگەن ءسوز. بيىل فەدەراتسيا Youtube-تەگى ارناسىندا ويىننىڭ ترانسلياتسياسىن جاسامايتىن بولدى, ەسەسىنە قازسپورت ارناسى كورسەتپەك. الايدا, ەكى-ءۇش ويىن قاتار بولعان جاعدايدا قپل ويىندارىنىڭ جارتىسىنان كوبى كورەرمەندەرىنەن ايىرىلادى دەگەن ءسوز.
فەدەراتسيا Youtube-تەگى ترانسلياتسيانى توقتاتقاننان كەيىن ويىنداردى ينتەرنەت ارقىلى تاماشالايتىن كورەرمەندەر ەندى الاڭداردى تولتىرا ما؟ ترانسلياتسيانى توقتاتۋ تۋرالى شەشىمنىڭ كورەرمەندەردى الاڭعا جيناۋ ءۇشىن بە, الدە قازسپورتپەن كەلىسىمنىڭ ءبىر شارتى ما, بەلگىسىز. ءبىر انىعى, كورەرمەندەر الاڭدى تولتىرۋ ءۇشىن بىرقاتار ۇلكەن جۇمىستار اتقارىلۋى كەرەك.
بىرىنشىدەن, ستاديونداردىڭ ساپاسى. كوگال مەن جاساندى كوگالدىڭ ساپاسىنان بولەك, كورەرمەندەر وتىراتىن ورىندىقتان باستاپ ستاديونداردا ءۇزىلىس كەزىندە بوي جازاتىن اسحانا مەن اجەتحانالاردىڭ زامانعا ساي بولۋى وتە ماڭىزدى. سونىمەن قاتار, كەڭەس وداعىنىڭ «ۇنەمشىل» ساياساتىمەن جاسالعان امبەباپ ستاديوندار دا كورەرمەندەردىڭ كوڭىلىنەن شىعا قويمايدى. بۇل – ويىن الاڭدارىن اينالاي قورشاعان جۇگىرۋ الاڭدارى. كورەرمەن ويىندى بارىنشا جاقىننان قاراي الماسا, قىزىعۋشىلىعى دا جوعارى بولمايدى. مۇمكىن, جۇگىرۋ الاڭدارىنا ارنايى ورىن سالۋ قوسىمشا قاراجاتتى قاجەت ەتەتىن بولعاندىقتان, ستاديون ىشىنە قوسا سالىنۋى كەرەك دەۋشىلەر دە بار شىعار. بىراق بۇل كورەرمەندەردىڭ ستاديونعا كەلۋ كورسەتكىشىن تۇسىرەتىنى انىق.
ەكىنشىدەن, ويىنداردىڭ ۋاقىتى. دەمالىس كۇندەرى وتكەنىمەن, كوپ ويىندار تۇستەن كەيىن بولاتىنى بەلگىلى. اسىرەسە وڭتۇستىكتە جاز ايلارىندا اۋا رايىنىڭ 40 گرادۋستان اسىپ كەتەتىن كەزدەرى بولادى. بۇل كەزدە ويىنشىلاردىڭ كۇن استىندا قاقتالىپ دوپ تەبۋى وڭاي ەمەس. كورەرمەندەردىڭ دە كۇن استىندا وتىرىپ ويىن تاماشالاۋعا زاۋقى جوق. بۇل تاعى دا ستاديون ساپاسىنا كەلىپ تىرەلەتىن ماسەلە. ويتكەنى كوپ ستاديوندا كورەرمەندەردىڭ توبەسىن كولەگەيلەپ تۇراتىن شاتىر جوق.
قورىتا ايتقاندا, وسى ماسەلەلەردى ەسكەرە وتىرىپ ستاديونداردى زاماناۋي ستاندارتتارعا ىڭعايلى ەتىپ جاساتپاسا دا, ويىنداردى كەشكى ۋاقىتقا قويسا, فۋتبولشىلارا دا, كورەرمەندەرگە دە ىڭعايى بولار ەدى.
ماعجان مولداحمەت
