تالاپكەرگە ەركىندىك بەرىلدى
ەڭ الدىمەن سانداردى سويلەتسەك, وسىعان دەيىنگى جىلداردا ۇبت-عا ءوتىنىش بەرگەندەردىڭ سانى بيىل رەكوردتىق كورسەتكىشكە جەتتى. 131 754 تالاپكەر تەستىلەۋگە ءوتىنىم بەرگەن. ءبىر ەرەكشەلىگى وسى جىلى تالاپكەرلەر ۇبت-عا ءوتىنىشتى ونلاين تارتىبىندە دە تاپسىرا الدى. جالپى جاس بۋىننىڭ جاڭاشىلدىققا جانە جاڭا تەحنولوگياعا بەيىم كەلەتىنى بار عوي. سونىڭ ءبىر دالەلى بولار, 90 مىڭنان اسا تالاپكەر ءوتىنىشتى ونلاين تۇردە تولتىرعان. بۇل ءبىر جاعىنان ۆيرۋستى تاراتپاۋدىڭ الدىن السا, ەكىنشى جاعىنان زاماناۋي جەتىستىكتەر ارقىلى جىل سايىنعى سابىلىستى ءبىراز جەڭىلدەتتى. ال ەڭ ماڭىزدىسى تۇلەكتەرگە تاڭداۋ ەركىندىگى بەرىلدى. بۇرىن مەكتەپتى ناشار باعاعا بىتىرگەندەردى مەكتەپ باسشىلارى نەمەسە پەداگوگتەر ۇبت تاپسىرماۋعا ۇگىتتەيتىن.
بيىلعى ۇبت-نىڭ تاعى ءبىر ايتۋعا تۇرارلىق جاڭالىعى – مەملەكەتتىك ءبىلىم بەرۋ گرانتىنىڭ بۇدان بىلاي تىلگە ەمەس, ءبىلىم بەرۋ باعدارلاماسىنا بولىنەتىنىندە. بۇل ماسەلەنىڭ ماڭىزدىلىعى سول, كوبىنە ورىس تىلىندە تەست تاپسىرۋشىلار نەبارى 50 بالمەن گرانتقا تۇسسە, ءدال سول ماماندىققا قازاق تىلىندە تاپسىرعان تالاپكەرلەر 70 بالمەن گرانتقا يە بولا الماي جاتاتىن. وسىدان كەلىپ قازاق مەكتەبىن تامامداعان تۇلەكتەر گرانت الۋ ءۇشىن مۇمكىندىگى مول ورىس توبىن امالسىز تاڭدايتىن ەدى. ال بيىل تالاپكەرلەر وقۋ ءتىلىن گرانتقا تاۋەلدىلىك تانىتپاي تاڭداي الادى.
119 تالاپكەر دەنساۋلىعىنا بايلانىستى ۇبت تاپسىرمادى
ءبىلىم جانە عىلىم مينيسترلىگىنىڭ اقپاراتىنا سۇيەنسەك, رەسپۋبليكا بويىنشا 161 پۋنكتتە جۇرگىزىلگەن ۇبت-نىڭ ءادىل وتكىزىلۋ بارىسىن قاداعالاۋ ماقساتىندا قالالار مەن وڭىرلەرگە مينيسترلىك تاراپىنان 1 983 وكىل جىبەرىلگەن. بۇدان بولەك ۇبت-نىڭ ۇيىمداستىرىلۋ بارىسىن قۇرامىنا سىبايلاس جەمقورلىققا قارسى اگەنتتىك, ۇكىمەتتىك ەمەس ۇيىم, باق, «ادالدىق الاڭى» جوبالىق كەڭسەلەرىنىڭ وكىلدەرى مەن قوعام بەلسەندىلەرى كىرگەن, 510 ادام مۇشە ارنايى مونيتورينگتىك توپ رۇقسات باقىلادى.
بيىلعى ۇبت-عا تىركەلگەن ازاماتتاردىڭ 92,1%-ى تەستىلەۋگە قاتىسقان, 2019 جىلى بۇل كورسەتكىش 94%-دى قۇراعان بولاتىن. وسى جىلى بىلتىرعىمەن سالىستىرعاندا تىركەلگەن تەستىلەنۋشىلەردىڭ از بولۋىن پاندەميانىڭ ءورشىپ تۇرۋىمەن بايلانىستىرۋعا بولاتىن سەكىلدى. سەبەبى مينيسترلىكتىڭ مالىمەتىنشە, 119 تالاپكەر دەنساۋلىعىنا بايلانىستى ۇبت تاپسىرماپتى. ال وسى تالاپكەرلەر ءۇشىن 19 شىلدەگە دەيىن تەستىلەۋ ۇيىمداستىرىلماق.
ورتاشا كورسەتكىش وزگەرمەدى
وسى جىلى ۇبت تاپسىرعانداردىڭ ىشىندە 82 154 تالاپكەر تەستىلەۋ تارتىبىندە بەلگىلەنگەن شەكتى بالدى جيناي الدى. دەمەك بىلتىرعى كورسەتكىش كوپ وزگەرگەن جوق. ايتالىق, 2019 جىلى 65,5 بالل ورتاشا كورسەتكىش بولىپ سانالسا, 2020 جىلعى ۇبت-دا بۇل 64,06 بالدى قۇرادى.
بيىلعى ۇبت-نىڭ بۇرىنعىدان كەلەسى ءبىر وزگەشەلىگى – تەستىلەۋ ۇيىمداستىرۋدا العاش رەت ەلەكتروندى ۇكىمەت بازاسى ارقىلى Face ID جۇيەسىنىڭ پايدالانىلعانىندا. ۇبت-عا كىرگىزۋ تالاپتارىنان تالاپكەرلەردىڭ حاباردار بولعانى اسەر ەتتى مە, بيىل ءوزىنىڭ ورنىنا تەستىلەۋگە باسقا ادامدى كىرگىزۋ ارەكەتىنىڭ سانى ايتارلىقتاي ازايدى. ماسەلەن, وتكەن جىلى مۇنداي 34 جاعداي ورىن السا, بيىل 7 مەكتەپ تۇلەگى ءوز ورنىنا ۇبت-عا باسقا ادامدى جىبەرمەك بولعان. ياعني ءدال وسىنداي زاڭسىز ارەكەت ءبىر جىل ىشىندە 27-گە تومەندەدى.
كالكۋلياتور قولدانۋعا
رۇقسات ەتىلدى
تالاپكەرلەرگە كالكۋلياتوردى پايدالانۋعا رۇقسات بەرۋىن وسى جىلعى ۇبت-دا العاش رەت قاراستىرىلعان مۇمكىندىكتىڭ بىرىنە جاتقىزۋعا بولادى. البەتتە تالاپكەرلەر تەستىلەۋگە وزدەرى قالاعان ەسەپتەۋىش قۇرالدى اكەلە المادى, ولارعا كىرەبەرىستە قاراپايىم كالكۋلياتور بەرىلدى. بۇدان بولەك بيىل ءبىرىنشى رەت تۇلەكتەر قورىتىندى مەكتەپ ەمتيحاندارىنان بوساتىلدى. بۇل – ەلدەگى توتەنشە جاعداي كەزىندە قاشىقتان وقۋ فورماتىنا كوشۋگە ءماجبۇر بولعاندىقتان قابىلدانعان شەشىم.
ۇبت تاريحىندا العاش رەت تالاپكەرلەردىڭ اتا-انالارى تەستىلەۋ وتكىزۋ پۋنكتتەرىنە, ءتىپتى ماڭايىنا جولاي المادى. بۇعان دا پاندەميا سەبەپ بولدى. دەگەنمەن اتا-انالار ۇيدە وتىرىپ ۇبت-نى باقىلاۋعا مۇمكىندىك الدى. ۇبت جۇرگىزىلگەن ءار اۋديتوريا ارنايى بەينەباقىلاۋ كامەرالارىمەن جابدىقتالعان بولاتىن, ناتيجەسىندە 9,5 ملن-نان اسا ادام ۇبت-نىڭ وتكىزىلۋ بارىسىن ونلاين رەجىمدە باقىلادى. بۇل ەكىنشى جاعىنان تالاپكەرلەردىڭ ءتارتىبىن قاداعالاۋعا جانە تەستىلەۋدەن كەيىن دە ولاردىڭ ءار ارەكەتىنە ارنايى كوميسسيانىڭ ساراپتاما جاساۋىنا قاجەت. ويتكەنى ۇبت ەرەجەسىنە ەنگىزىلگەن جاڭا وزگەرىسكە سايكەس ەندى 2020 جىلعى 25 تامىزعا دەيىن بەينەجازبالار ءجىتى تەكسەرىلەدى. ەگەر بەينەجازبادا گرانت يەلەنگەن تالاپكەردىڭ تىيىم سالىنعان زاتتاردى پايدالانعانى انىقتالسا, تەستىلەنۋشىنىڭ ۇبت ناتيجەسى جويىلادى.
قوسا كەتۋ كەرەك, مەملەكەتتىك ءبىلىم بەرۋ گرانتىنا ۇمىتكەر بولۋ ءۇشىن وتكىزىلگەن ماۋسىمداعى ۇبت-دا شەكتى بالل جيناي الماعاندار ءۇشىن تامىز ايىندا تاعى دا تەستىلەۋ ۇيىمداستىرىلادى. ونداعى ناتيجەمەن تەستىلەنۋشىلەر ەلىمىزدەگى جوعارى وقۋ ورىندارىنىڭ اقىلى وقۋ بولىمىنە تۇسە الادى. نەگىزى ۋنيۆەرسيتەتتەردىڭ اقىلى بولىمىنە قابىلدانۋ ءۇشىن تالاپكەرلەردىڭ شەكتى بالل جيناعانىن ايعاقتايتىن قاڭتار ايىنداعى ۇبت سەرتيفيكاتتارى دا جارايدى.
