ايماقتار • 06 شىلدە، 2020

ءدارى-دارمەك تيەلگەن كولىك الماتىدان اتىراۋعا جەتتى

وبلىس اكىمى ماحامبەت دوسمۇحامبەتوۆتىڭ تاپسىرماسىمەن ءدارى-دارمەك تاپشىلىعى ماسەلەسى وڭ شەشىلىپ جاتىر، - دەپ حابارلايدى Egemen.kz.

جولداسبەك كوشەرباي ۇلى

"بىرنەشە كۇن بۇرىن وبلىس اكىمى ماحامبەت دوسمۇحامبەتوۆ ءدارى تاپشىلىعى ماسەلەسىن جەدەل تۇردە شەشۋگە قاتىستى ءتيىستى تاپسىرما بەرگەن بولاتىن. سوعان ساي، الماتىدان قاجەتتى ءدارى-دارمەكتەردى شۇعىل تۇردە جەتكىزۋدى قامتاماسىز ەتتىك. دارىلەر دارىحانالارعا بۇرىنعى باعاسىمەن بەرىلەدى. ال، ءدارىحانالاردىڭ باعانى قىمباتتاتپاۋ قاتاڭ قاداعالانادى"، -دەدى وبلىس اكىمىنىڭ ورىنباسارى ەرجان ءابىلحانوۆ.

"INKAR" جشس اتىراۋ فيليالىنىڭ ديرەكتورى سۆەتلانا ليپاتوۆانىڭ ايتۋىنا قاراعاندا، ءدارى-دارمەكتىڭ 430 ءتۇرى اكەلىنگەن. ونىڭ 50-گە جۋىعى – انتيبيوتيكتەر، ازيتروميتسين، تسەفازولين، تسەفترياكسون جانە ينەكتسياعا ارنالعان ليدوكاين ەرىتىندىسى سىندى پرەپاراتتار.

"اسا قاجەتتى ءدارى-دارمەكتەردىڭ الماتى قالاسىنان جىلدام جەتكىزىلۋىنە قالا اكىمدىگى لوگيستيكا جاعىنان قولداۋ كورسەتتى. ايتپەسە، تەمىرجولمەن جەتكىزىلەر بولسا، جولدا كوپ ۋاقىت جوعالتار ەدى. اكەلىنگەن دارىلىك ونىمدەر وبلىس ورتالىعىنان وزگە اۋداندارعا دا جەتكىزىلەدى. بۇل پارتيا وبلىستىڭ سۇرانىسىن قامتاماسىز ەتەدى"،- دەيدى سۆەتلانا ليپاتوۆا.

اتىراۋ وبلىسىنىڭ اكىمدىگى ءدارى-دارمەكتەردى بارلىق دارىحاناعا جەتكىزۋدى ۇيىمداستىرىپ، باقىلاۋىندا ۇستاعالى وتىر. سونداي-اق، الداعى ۋاقىتتا پرەپاراتتاردىڭ باعاسىنىڭ بەلگىلەنگەن مولشەردەن اسپاۋىن قاداعالايدى. ءدارى-دارمەكتىڭ ءار ادامعا تيەسىلى مولشەردەن ارتىق ساتىلماۋى ءۇشىن وبلىس اكىمدىگى مەن اتىراۋ وبلىسى فارماتسەۆتيكا سالاسىندا ەڭبەك ەتەتىن جەكە كاسىپكەرلەر مەن زاڭدى تۇلعالاردىڭ قاۋىمداستىعى – "فارمقاۋىمداستىق" قوعامدىق بىرلەستىگى جانە وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى اراسىندا ارنايى مەموراندۋمعا قول قويىلماق.