ايماقتار • 01 شىلدە، 2020

جامبىل وبلىسىندا شەكتەۋ شارالارى كۇشەيتىلەدى

30 رەت كورسەتىلدى

وبلىس اكىمى بەردىبەك ساپارباەۆتىڭ توراعالىعىمەن وتكەن جامبىل وبلىسىنىڭ جەدەل شتابىنىڭ كەزەكتى  وتىرىسىندا تاياۋ ۋاقىتتا شەكتەۋ شارالارىن كۇشەيتۋ تۋرالى شەشىم قابىلداندى، - دەپ حابارلادى وبلىس اكىمدىگىنىڭ ءباسپاسوز قىزمەتى.

شەكتەۋ شارالارىن كۇشەيتۋ  تۋرالى شەشىم كوروناۆيرۋسپەن اۋىرعان ناۋقاستار سانىنىڭ وسۋىنە بايلانىستى  بولىپ وتىر.

29 ماۋسىمداعى جاعداي بويىنشا جامبىل وبلىسىندا  كوروناۆيرۋستىڭ 693 جاعدايى (سيمپتومدىق) تىركەلگەن دەسەك، 100 مىڭ تۇرعىنعا شاققانداعى كورسەتكىش 59،9 پايىزدى قۇراپ وتىر. سونىمەن قاتار، 683 سيمپتومسىز دەرەگى تىركەلگەن. بۇگىنگى تاڭدا  ينفەكتسيالىق ستاتسيوناردا 272 ناۋقاس ەم الۋدا.

"وكىنىشكە قاراي، ستاتيستيكا كوڭىل كونشىتپەيدى. ەگەر 15-21 ماۋسىم ارالىعىندا وڭىردە 317 جاعداي انىقتالسا، 22-28 ماۋسىم ارالىعىندا ول – 473-ءتى قۇراعان. ونىڭ 60 پايىزى تاراز قالاسىندا تىركەلگەن»، - دەدى جينالىس بارىسىندا تاۋارلار مەن قىزمەتتەردىڭ ساپاسىن باقىلاۋ دەپارتامەنتىنىڭ باسشىسى بەرىك جارقىنبەكوۆ.

ونىڭ ايتۋىنشا، كورسەتكىشتىڭ ناشارلاۋىنا كارانتيندىك شارالاردى جەڭىلدەتۋ جانە ەپيدەمياعا قارسى شارالار الگوريتمدەرىنىڭ ساقتالماۋى اسەر ەتكەن.

"ەپيدەميولوگيالىق توپتاردىڭ جۇكتەمەسىنىڭ اۋىرلىعىن ەسكەرە وتىرىپ، تۇرعىندارعا مەديتسينا قىزمەتكەرلەرى مەن ەپيدەميولوگتار جەتكەنگە دەيىن بارلىق ساقتىق شارالارىن ساقتاۋدى ۇسىنامىز. اتاپ ايتساق، ءوزىن-ءوزى وقشاۋلاۋ، تەمپەراتۋرانى ولشەۋ، دەنساۋلىق جاعدايىن باقىلاۋ، قاجەت بولعان جاعدايدا ۋچاسكەلىك دارىگەردى شاقىرتۋ، جۇمىسقا شىقپاۋ كەرەك"، - دەدى بەرىك جارقىنبەكوۆ.

دەپارتامەنت باسشىسى بارلىق ەڭبەك ۇجىمدارىنىڭ كىرە بەرىستەرىندە قىزمەتكەرلەردىڭ دەنە تەمپەراتۋراسىن ولشەۋدى، اۋرۋ بەلگىلەرى بار قىزمەتكەرلەردى جۇمىسقا جىبەرمەۋدى، سانيتاريالىق-ەپيدەميولوگيالىق تالاپتاردى ساقتاۋعا جاۋاپتى ادامدى ايقىنداۋدى، جۇمىس كۇنى ىشىندە قولعاپتار مەن ماسكالاردى پايدالانۋدى، ءبىر بولمەدە كەمىندە ءبىر مەتر قاشىقتىقتى ساقتاۋدى، قىزمەتكەرلەردى جۇمىسقا جانە جۇمىستان ۇيگە قىزمەتتىك اۆتوكولىكپەن ورتالىقتاندىرىلعان جەتكىزۋدى قامتاماسىز ەتۋدى ۇسىندى.

وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ تۇرعىندار بارلىق ماسەلەلەر بويىنشا تاۋلىك بويى جۇمىس جاسايتىن 1302، 103 بايلانىس ورتالىقتارىنا جۇگىنە الاتىندىعىن جەتكىزدى.

ارنايى قۇرىلعان ءموبيلدى توپتار سيمپتومسىز ناۋقاستاردى، بايلانىستا بولعان ادامداردى، ستاتسيوناردان كەيىن امبۋلاتوريالىق ەمدەۋگە جىبەرىلگەن جانە سوزىلمالى اۋرۋلارى بار ناۋقاستاردى باقىلايتىن بولادى.

وبلىس اكىمى بەردىبەك ساپارباەۆ قازىر ناقتى شارالار قابىلداپ، كوروناۆيرۋستىڭ پاندەمياسىنىڭ سوزىلۋ جاعدايىنا دايىندىقتى بۇگىننەن باستاۋ قاجەتتىگىن باسا ايتتى.

"قازىرگى تاڭدا ءدارىحانالاردا ۆيرۋسقا قارسى جانە دەنە قىزۋىن تۇسىرەتىن دارىلەردىڭ جەتىسپەۋشىلىگى وزەكتى بولىپ تۇر. مۇنداي جاعداي بۇكىل وبلىس بويىنشا بايقالۋدا. بۇل ماسەلەنى شەشۋ ءۇشىن جاۋاپتى ۆەدومستۆولار سالالىق مينيسترلىكپەن، "سك-فارماتسيا" كومپانياسىنىڭ وكىلدەرىمەن بىرلەسىپ جۇمىس ىستەۋى ءتيىس. حالىق اراسىندا ءتۇسىندىرۋ جۇمىستارىن جۇرگىزىپ، جوق پرەپاراتتاردىڭ انالوگتارى تۋرالى حاباردار ەتۋ كەرەك. ماسكامەن قامتاماسىز ەتۋ ماسەلەسى دە كۇن تارتىبىنەن تۇسپەيدى. مويىنقۇم، سارىسۋ جانە ت.رىسقۇلوۆ اۋداندارىندا ماسكالاردىڭ بەلگىلەنگەن باعادان قىمباتقا ساتىلىپ جاتقاندىعى انىقتالعان. اكىمدەرگە بۇل سەكىلدى ماسەلەلەردى جەدەل شەشۋدى تاپسىرامىن"، - دەدى ايماق باسشىسى.

بەردىبەك ساپارباەۆ كوروناۆيرۋستىڭ الدىن الۋ بويىنشا اقپاراتتىق جۇمىستى كۇشەيتۋ قاجەتتىگىن اتاپ ءوتتى.

"مەملەكەت باسشىسى قاسىم-جومارت توقاەۆ اۋرۋعا شالدىققان كەزدەگى ارەكەتتەردىڭ الگوريتمى تۋرالى حالىقتى ۋاقتىلى جانە ساپالى اقپاراتپەن قامتاماسىز ەتۋدى تاپسىردى. دارىگەرلەر كەڭەستەرىن  ونلاين  رەجيمدە، call-ورتالىقتار جانە بۇقارالىق اقپارات قۇرالدارى ارقىلى بەرۋىن ۇيىمداستىرۋ قاجەت"، - دەدى وبلىس اكىمى.

سونداي-اق مەديتسينا قىزمەتكەرلەرىنىڭ جەتىسپەۋشىلىگىنە بايلانىستى رەزيدەنتۋرادا وقيتىن ستۋدەنتتەردى، زەينەت جاسىنداعى دارىگەرلەردى تارتۋ ماسەلەلەرى سارالاندى. مارات جۇمانقۇلوۆ بۇل باعىتتاعى جۇمىستار قازىردىڭ وزىندە جۇرگىزىلىپ جاتقاندىعىن ايتتى.

"توسەك سانىن كوبەيتۋ بويىنشا دا شارالار قابىلداناتىن بولادى. ءبىز احۋالدى باقىلاۋدا ۇستاپ، كەز-كەلگەن جاعدايعا دايىن بولۋىمىز كەرەك. ادامدار جەدەل جاردەم جۇمىسىنا جانە اۋرۋحانالاردا ورىنداردىڭ جوقتىعىنا قاتىستى شاعىمدانۋدا. مۇندايعا جول بەرمەۋ كەرەك. ءاربىر ازامات ساپالى مەديتسينالىق قىزمەتپەن قامتىلۋى ءتيىس. بۇل ورايدا ەپيدەميولوگيالىق احۋالى قالىپتى اۋدانداردىڭ مەديتسينا قىزمەتكەرلەرى قول ۇشىن سوزعانى دۇرىس"، - دەپ اتاپ ءوتتى ايماق باسشىسى.

باسقوسۋ سوڭىندا بەردىبەك ساپارباەۆ جامبىلدىقتاردى سانيتارلىق دارىگەرلەردىڭ ۇسىنىستارىن ۇستانۋعا شاقىرىپ، ۇندەۋ جولدادى.

ۇندەۋدىڭ تولىق ءماتىنى بۇقارالىق اقپارات قۇرالدارىنىڭ بەتتەرىندە جاريالانادى.

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار