بۇل قۇرعاق سوزدەر تەك كوز الداۋ, ۋاقىتشا ۇپاي, ارزان بەدەل جيناۋ ءۇشىن عانا ايتىلاتىنى بەلگىلى بولىپ وتىر. مۇنداي تۇجىرىم جاساۋىمىزعا اقتوبە وبلىسى بويىنشا تەكسەرۋ كوميسسياسى جۇرگىزگەن اۋديتتىك تەكسەرۋلەر بارىسى باستى نەگىز قالاي الادى.
ناقتى دەرەكتەرگە سۇيەنسەك, وتكەن جىلى اقتوبە قالاسىندا وتىرعىزىلعان مىڭ كوشەتتىڭ توقسان پايىزى كوكتەي سولىپ قۋراپ قالعان ەكەن. ءوز كەزەگىندە بۇل ءىستى اتقارۋعا جەرگىلىكتى بيۋدجەتتەن 71,4 ميلليون تەڭگە بولىنگەنىن ەسكەرسەك, وسى قوماقتى قاراجاتتىڭ باسىم بولىگى جەلگە ۇشىپ كەتتى دەۋگە ابدەن بولادى.
بۇدان شىعاتىن ءتۇيىن – وكىلەتتى تۇلعالار بار ءىستى كوشەت وتىرعىزۋمەن بىتتىگە ساناپ, ونى كۇتىپ-باپتاۋ مەن سۋارۋ جۇمىستارىن مۇلدەم جۇرگىزبەگەنى بولىپ شىقپاي ما؟ سونداي-اق مۇنداي سوراقى كورىنىس اقتوبە قالالىق اكىمدىگىنە قاراستى سالالىق بولىمدەر تاراپىنان ءتيىستى قاداعالاۋ جۇمىستارىنىڭ جۇرگىزىلمەگەنىن كورسەتەدى. ال بيىل وبلىس ورتالىعىندا تال-تەرەك ءوسىرۋ ماسەلەسىنە قاتىستى اڭگىمەلەردىڭ اياسى بۇرىنعى جىلداردان دا اۋقىمدىراق ەستىلەدى. اقتوبە قالاسىنىڭ اكىمى اسحات شاحاروۆتىڭ ايتۋىنشا, شاھار كوپ كەشىكپەي جاسىل جەلەككە ورانىپ سالا بەرەتىن ءتۇرى بار. بۇل جونىندە جاسالعان جوبالار مەن باعدارلامالار دا ەشكىمگە ساۋىرىن سيپاتار ەمەس. ايتسە دە مۇنىڭ ءوزى وتكەن جىلدارداعى سەكىلدى قۇرعاق ءسوز, جالعان ۋادە كۇيىندە قالىپ قويماسا بولعانى دا.
اقتوبە
