ايماقتار • 25 ماۋسىم، 2020

ومىرزاق شوكەەۆ: قۇرىلىس جۇمىستارى باسەڭدەمەۋى ءتيىس

68 رەت كورسەتىلدى

تۇركىستان وبلىسىنىڭ اكىمى ومىرزاق شوكەەۆ جۇمىس ساپارىمەن ماقتاارال اۋدانىندا بولىپ، سۋ تاسقىنىنان زارداپ شەككەن ورگەباس ەلدى مەكەنىن قالپىنا كەلتىرۋ جۇمىستارىمەن تانىستى، - دەپ حابارلايدى Egemen.kz.

بۇگىنگى تاڭدا مۇندا 209 ءۇيدىڭ 184-ءىنىڭ يەلەرىمەن كەلىسىمشارت ءتۇزىلىپ، 184 وتباسىنا 8،5 ملن تەڭگە قارجى اۋدارىلعان. جالپى بۇگىنگى تاڭدا بۇزىلعان ءۇي سانى 145-كە جەتىپ وتىر. ول ۇيلەردىڭ اۋماعى تازارتىلىپ، ىرگەتاسىن قۇيۋ جۇمىستارىنا دايىندالعان. ال، 50 ءۇيدى بۇزباۋعا تۇرعىنداردىڭ وزدەرى ءوتىنىش بىلدىرگەن، 122 ءۇيدىڭ ىرگەتاسى قۇيىلىپ، 31 باسپانانىڭ قابىرعالارى قالانۋدا، 20-سىنىڭ شاتىرى جابىلعان. سونداي-اق 20 ءۇيدىڭ قابىرعاسى ءورىلىپ، ءبىرىنشى جاپپاسىن جابۋ جۇمىستارى جۇرگىزىلۋدە. وبلىس اكىمى ءۇي قۇرىلىسىن جىلدامداتۋ مەن  اۋلالاردى قوقىستان تازارتۋ، جول جوندەۋ جۇمىستارىن جەدەلدەتۋدى تاپسىردى.  ورگەباس اۋىلىنا جەتىساي اۋدانى جاۋاپتى بوپ بەكىتىلگەن بولاتىن. قازىر  مۇنداعى جۇمىستارعا 613 قۇرىلىسشى تارتىلعان.

سونداي-اق وبلىس اكىمى فيردوۋسي اۋىلىندا بولدى. قازىرگى تاڭدا فيردوۋسيداعى 340 ءۇيدىڭ 277 باسپانا يەلەرىمەن كەلىسىمشارت جاسالىپ، بارىنە دەرلىك 8،5 ملن تەڭگەدەن اۋدارىلعان.  مۇندا بۇگىندە 133 ءۇيدىڭ ىرگەتاسى قۇيىلىپ، 17 ءۇيدىڭ قابىرعاسى قالانۋدا، 1 ءۇيدىڭ شاتىرى جابىلۋدا. ال مىرزاكەنت كەنتىندەگى جاڭا مولتەك اۋداندا بۇگىندە جەڭىس، جاڭاتۇرمىس، دوستىق ەلدى مەكەن تۇرعىندارىنىڭ كەلىسىمى بويىنشا 386 جەكە تۇرعىن ءۇيدىڭ قۇرىلىسى جۇرگىزىلۋدە. ونىڭ ىشىندە 196 تۇرعىن ءۇي مەملەكەتتىك بيۋدجەت ەسەبىنەن، قالعان 190 تۇرعىن ءۇي ("ب.وتەمۇراتوۆ"، "ساليقالى ۇرپاق"، ء"بىز بىرگەمىز") قورىنان سالىنۋدا. مۇندا بۇگىندە  274 ءۇيدىڭ قابىرعاسى قالانىپ، 65 ءۇيدىڭ شاتىرىن جابۋ جۇمىستارى جالعاسۋدا جانە 55 ءۇيدىڭ ىشكى - سىرتقى ارلەۋ جۇمىستارى جۇرگىزىلۋدە. ءبىرىنشى شىلدەگە دەيىن 100 ءۇيدىڭ شاتىرىن جابۋ جوسپارلانىپ وتىر. «سۋ باسقان 5 ەلدى مەكەندەگى توتەنشە جاعداي سالدارىن جويۋ، جاڭا مولتەك اۋدان مەن ەكى اۋىلداعى ءۇي سالۋ جۇمىستارىن ءبىر ساتكە دە باسەڭدەتۋگە بولمايدى. ەڭ باستىسى – قۇرىلىستىڭ ساپاسىنا ءمان بەرۋىمىز قاجەت. تامىز ايىنىڭ العاشقى كۇنىندە جاڭا مولتەك اۋدانداعى ۇيلەردىڭ ءبارىنىڭ دەرلىك شاتىرلارى جابىلىپ ءبىتۋى ءتيىس»، دەدى ومىرزاق ەستاي ۇلى.

ساپار سوڭىندا ءوڭىر باسشىسى وبلىستىق شتابتا ءماجىلىس وتكىزىپ، جاۋاپتى باسشىلارعا ءۇي قۇرىلىسى، ءبىر رەتتىك وتەماقى، اۋىل شارۋاشىلىعى شىعىندارىن وتەۋ، فيردوۋسي، ورگەباس اۋىلدارىنداعى توتەنشە جاعداي سالدارىن جويۋ جۇمىستارى تۋرالى كۇندەلىكتى مالىمەت بەرىپ وتىرۋدى تاپسىردى.

سوڭعى جاڭالىقتار

ۇقساس جاڭالىقتار