پاندەميا كەزىنە تاپ كەلگەندىكتەن, بيىلعى ۇبت سانيتارلىق-ەپيدەميالىق نورمالاردى قاتاڭ ساقتاۋمەن ەرەكشەلەندى. ونىڭ ىشىندە سىناق تاپسىرۋشىلاردىڭ ارا قاشىقتىعى دا بار. بۇل ءبىر مەزگىلدە تەست تاپسىراتىن تۇلەك سانى ازايىپ, سىناق مەرزىمىنىڭ ۇزارۋىنا اكەلىپ سوقتى. سوندىقتان دا وبلىستا ۇبت 12 كۇنگە سوزىلماق.
ء"بىز ۇبت وتەتىن ورىنداردىڭ قاجەتتى تەحنيكالىق جابدىقتارمەن جانە سانيتارلىق قاۋىپسىزدىك قۇرالدارىمەن قامتاماسىز ەتىلۋىن تەكسەرىپ شىقتىق. ازىرگە سانيتارلىق-ەپيدەميالىق تالاپتار بۇزىلعان جوق", - دەيدى باتىس قازاقستان وبلىستىق ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى گۇلنار سارسەنعاليەۆا.
بيىلعى ۇبت سىناعىندا باقىلاۋ ەرەكشە بولاتىنى, تەست تاپسىرۋشىلاردىڭ رۇقسات ەتىلمەگەن زاتتار مەن ادىستەردى قولدانباۋى الدىن الا ەسكەرتىلسە دە, ەرەجە بۇزعاندار كەزدەسكەن. وسى ءۇش كۇن ىشىندە وبلىس بويىنشا 13 تەستىلەۋشى تەستكە قاتىستىرىلماعان. ال سىناققا قاتىسقان 9 تۇلەكتىڭ ناتيجەسى جويىلعان. «بۇل بالالار بيىلعى قاڭتار ايىندا ۇبت سىناعىنا قاتىسىپ, سەرتيفيكات السا, اقىلى تۇردە ەلدەگى جوعارى وقۋ ورىندارىنا تۇسە الادى» دەپ حابارلادى دەپارتامەنت.
بيىلعى تەستىلەۋ 9 پۋنكتتە ءوتىپ جاتىر. جوعارىدا ايتىلعانداي, سىناققا قاتىسۋشىلاردى تاۋەلسىز ساراپشىلار قاداعالايدى. ولاردىڭ قۇرامىنا ارنايى مونيتورينگتىك توپ مۇشەلەرى, قوعام قايراتكەرلەرى, ۇكىمەتتىك ەمەس ۇيىم, سىبايلاس جەمقورلىققا قارسى قىزمەت جانە "ادالدىق الاڭى" جوبالىق كەڭسە وكىلدەرى كىرگەن. سىناق وتەتىن ءار اۋديتوريا بەينەباقىلاۋ كامەرالارىمەن جابدىقتالعان. قاتىسۋشىلار مەتالل ىزدەگىشتەن وتپەس بۇرىن ەرەجەلەردى ۇستانۋ تۋرالى مىندەتتەمەلەرمەن تانىسىپ, تىيىم سالىنعان زاتتاردىڭ جوقتىعى تۋرالى قۇجاتقا قول قويادى. تىيىم سالىنعان زاتتاردى قولدانۋعا جاسالعان كەز كەلگەن ارەكەت تەست ناتيجەلەرىن جارامسىز ەتەدى, قاتىسۋشى اۋديتوريادان شىعارىلادى جانە وسى جىلى ۇبت-نى قايتا تاپسىرا المايدى. سونداي-اق بيىلعى 25 تامىزعا دەيىن ءار اۋديتوريادان الىنعان بەينەجازبانى ماماندار زەردەلەيدى. ەگەر بەينەماتەريالداردى تالداۋ كەزىندە ەرەجەلەردى بۇزۋ انىقتالسا, تالاپكەردىڭ تەست ناتيجەسى جويىلۋىنا اكەلەدى. ەگەر سول كەزدە قاتىسۋشىعا گرانت تاعايىندالعان بولسا, ول گرانتىنان ايرىلادى.
"وسى ەرەجەنى بارلىق اتا-انا, تەست تاپسىرۋشىلارعا سان مارتە ەسكەرتكەنىمىزگە قاراماستان, 3 كۇن ىشىندە 13 تۇلەك تىيىم سالىنعان زاتتاردى الىپ وتۋگە تىرىسقانى ءۇشىن تەستىلەۋگە جىبەرىلمەدى. ونىڭ جەتەۋى – جانىبەك اۋدانىنان, التاۋى – قازتالوۆ اۋدانىنان. تاعى 9 تۇلەك تەست تاپسىرۋ بارىسىندا ۇبت ەرەجەلەرىن بۇزعانى ءۇشىن تەست تاپسىرۋ مۇمكىندىگىنەن ايىرىلىپ, جۇمىستارى جويىلدى. ولار – جانىبەك اۋدانىنان – 1 ادام, قازتالوۆ اۋدانىنان – 5 تۇلەك, ءبورلى مەن سىرىم اۋداندارىنان – 1 ادامنان, بقاتۋ ورتالىعىندا سىناق تاپسىرعان 1 تۇلەك", - دەيدى باتىس قازاقستان وبلىستىق ءبىلىم باسقارماسى باسشىسىنىڭ مىندەتىن اتقارۋشى زاۋرە عۇماروۆا
جەرگىلىكتى سانيتار دارىگەردىڭ قاۋلىسىمەن باتىس قازاقستان وبلىسىندا 27-28 ماۋسىم كۇندەرى كۇشەيتىلگەن كارانتين تالاپتارى ەنگىزىلىپ, كولىك قوزعالىسىنا شەكتەۋ قويىلعان بولاتىن. بىراق ۇبت تاپسىرۋشىلار ءۇشىن ارنايى كولىكتەر ۇيىمداستىرىلاتىنى بەلگىلى بولدى.
باتىس قازاقستان
