كوروناۆيرۋس • 25 ماۋسىم، 2020

الماتىدا قانداي پاتسيەنتتەر اۋرۋحانالارعا جاتقىزىلادى؟

98 رەت كورسەتىلدى

بۇگىن الماتى قالاسى وڭىرلىك كوممۋنيكاتسيالار قىزمەتىنىڭ الاڭىندا قالالىق قوعامدىق دەنساۋلىق باسقارماسىنىڭ باسشىسى كامالجان نادىروۆ مەگاپوليستەگى ەپيدەميولوگيالىق جاعداي تۋرالى جان-جاقتى باياندادى، - دەپ حابارلايدى Egemen.kz.

ەپيدەميا باستالعاننان بەرى قالادا جالپى 3 530 جاعداي تىركەلسە، 2 178 ادام ەمدەلىپ شىقتى. قايتىس بولعاندار سانى – ­­ 23.

وسى ارادا جاعدايى اۋىر جانە وتە اۋىر پاتسيەنتتەردىڭ 80%-دان استامىن جاسى 60-تان اسقاندار قۇرايتىندىعىن اتاپ وتكەن ءجون.

سونىمەن قانداي پاتسيەنتتەر اۋرۋحانالارعا جاتقىزىلادى؟

"گوسپيتاليزاتسياعا COVID-19 ىندەتى راستالعان، دەنە قىزۋى 3 كۇننەن بەرى 38،5°س بولسا، قاننىڭ وتتەگىمەن قانىعۋ 95 پايىزدى كۇراسا، سونداي-اق وكپەدە 25 پايىزدان استام وزگەرىستەردىڭ باسىم پنەۆمونيا بەلگىلەرى بار (كت ناتيجەلەرى بار) پاتسيەنتتەر الىنادى"، – دەدى كامالجان نادىروۆ.

ودان باسقا، جاسى 65-تەن اسقان سوزىلمالى اۋرۋلارى بار ناۋقاستار مەن گەمودياليز ەم-دوم شارالارىن قاجەت ەتەتىن يممۋن تاپشىلىعى بەلگىلەنگەن ناۋقاستار اۋرۋحاناعا ەم قابىلداۋ ءۇشىن جاتقىزىلادى.

جاتاقحانادا 65-تەن جوعارى ادامدارمەن نەمەسە قاۋىپ توبىنا كىرەتىندەرمەن بىرگە تۇرىپ، COVID-19 راستالعان ادامدار دا اۋرۋحاناعا جىبەرىلەدى.

قازىر قالادا امبۋلاتوريالىق دەڭگەيدە باقىلاۋدا 2986 ادام بار، ونىڭ ىشىندە سيمپتومسىز تۇردە 2365 ادام، بۇل 79%-دى قۇرايدى. 621-ءدىڭ سيمپتومدارى بار، بۇل 21%-دى قۇرايدى. امبۋلاتوريالىق دەڭگەيدە سيمپتومدارى بار اۋىرلىقتىڭ جەڭىل دارەجەسىندە 555 ادام – 89%، اۋىرلىقتىڭ ورتاشا دارەجەسىندە 66 ادام نەمەسە باقىلاۋ جۇرگىزىلگەن ادامداردىڭ جالپى سانىنىڭ 11%-ىن قۇرادى. سوزىلمالى اۋرۋلارى بار، تاۋەكەل توبىنداعى 60 جاستان اسقان ادامدارعا ەرەكشە كوڭىل بولىنۋدە، قازىرگى ۋاقىتتا ولاردىڭ سانى 94-ءتى قۇراپ وتىر.

ءاربىر ەمحانادا بەكىتىلگەن رەگلامەنتكە سايكەس پاتسيەنتتەردى باقىلاۋ، مونيتورينگ جۇرگىزۋ جۇمىستارىمەن اينالىساتىن 72 موبيلدىك بريگادالار قۇرىلعان. موبيلدىك توپتىڭ قۇرامىنا – بولىمشە مەڭگەرۋشىلەرى، ينفەكتسيونيست دارىگەرلەر، ەپيدەميولوگتار، ۋچاسكەلىك دارىگەرلەر مەن مەيىربيكەلەر كىرەدى. بارلىعى 287 العاشقى سانيتارلى-مەديتسينالىق كومەك كورسەتۋ قىزمەتكەرى جۇمىلدىرىلعان. جۇمىس ساپاسىن ارتتىرۋ ماقساتىندا اتالمىش بريگادالاردىڭ سانىن ارتتىرۋ بويىنشا جۇمىستار جۇرگىزىپ وتىرمىز.

ماۋسىم ايىننان باستاپ ەمحانا باقىلاۋىندا 19 مىڭنان استام جاقىن بايلانىستا بولعان ادامدار بار.

"بىلۋىمىزشە، كۆي-ءدىڭ قاۋىپتى جانە ءجيى اسقىنۋلارىنىڭ ءبىرى – پنەۆمونيا. جاعدايدى اۋىرلىعىن باعالاۋ ءۇشىن ۋاقتىلى وكپەنىڭ كومپيۋتەرلى توموگرافياسىن جۇرگىزۋ قاجەت. وسىعان بايلانىستى، ءبىز كت قىزمەت كورسەتۋشىلەرىنىڭ ءتىزىمىن جاسادىق، ەمحانالار كت ورىندايتىن مەملەكەتتىك جانە جەكە مەنشىك ۇيىمدارمەن شارتتار جاساستى. قالا بويىنشا اتالعان قىزمەت كورسەتۋشىلەر سانى – 12. كت قىزمەتىن جەتكىزۋشىلەر كوروناۆيرۋستىق ينفەكتسيا دياگنوزى راستالعان پاتسيەنتتەردى قابىلداۋ جۇمىستارىنىڭ بولەك كەستەسىن جانە اۋرۋ بەلگىلەرى ۇقساس پاتسيەنتتەرگە ارنالعان جەكە ۋاقىتتى انىقتادى. وسىلايشا، ءبىز كت كابينەتتەرىنىڭ وتكىزۋ قابىلەتىن تالداپ، جۇقتىرعان پاتسيەنتتەردىڭ اعىمداعى سانى كەزىندە الماتى قالاسى بويىنشا حالىقتى كت قىزمەتتەرىمەن قامتاماسىز ەتۋدە پروبلەمالار بولماۋى ءتيىس دەگەن قورىتىندىعا كەلدىك. سونداي-اق، ءۇش اي ىشىندە كت اپپاراتىن قالالىق بالالار قالالىق كلينيكالىق جۇقپالى اۋرۋلار اۋرۋحاناسى جانە مەديتسينالىق جەدەل-جاردەم كورسەتۋ اۋرۋحاناسىنا جەتكىزۋ كۇتىلۋدە، بۇل وسى زەرتتەۋگە قول جەتىمدىلىكتى ارتتىرادى"، – دەدى قالالىق دەنساۋلىق ساقتاۋ باسقارماسىنىڭ باسشىسى..

"ايتا كەتەتىنىم، دارىگەردىڭ نۇسقاۋىنسىز رادياتسيالىق ساۋلەلەنۋدىڭ جوعارى بولۋىنا بايلانىستى، كت زەرتتەۋدەن ءوتۋ قاجەت دەپ قارىستىرىلمايدى.

وسى جەردە جەدەل جاردەم قىزمەتى تۋرالى دا ايتقىم كەلەدى. قوڭىراۋ شالۋ سانى بۇگىندە كۇرت ءوستى. ەگەر مامىر ايىندا شامامەن 2500 قوڭىراۋ تۇسكەن بولسا، ماۋسىم ايىندا كۇنىنە قوڭىراۋلار سانى 8000-عا جەتەدى.

بريگادالاردىڭ جۇمىسى دا اۋىر بولىپ كەلەدى. جۇكتەمە كۇرت ارتتى. ەگەر مامىردا بريگادانىڭ ورتاشا تاۋلىكتىك جۇكتەمەسى شامامەن 9 قوڭىراۋ بولسا، ماۋسىم ايىندا ول ەكى ەسەگە ءوستى.

قالاداعى زەرتحانالىق دياگنوستيكا جاعدايىنا كەلسەك، ءبىزدىڭ زەرتحانالارىمىزدىڭ بىرقاتارى ءتۇرلى سەبەپتەرمەن ۋاقىتشا ىستەن شىقتى. وسى اپتادا ولار جۇمىسقا قايتا قوسىلادى. سونداي-اق بولات وتەمۇراتوۆتىڭ قورى سىيلاعان موبيلدىك زەرتحانا پايدالانۋعا بەرىلەدى"، – دەيدى كامالجان نادىروۆ.

"بۇل زەرتحانا 1000 سىناقتى وتكىزە الادى جانە بولاشاقتا قۋاتتىلىقتى كۇنىنە 5000 سىناققا دەيىن ارتتىرۋعا مۇمكىندىگى بار.

زەرتحانالاردىڭ ىستەن شىعۋى قوعامدا بەلگىلى ءبىر رەزونانس تۋدىرعانى بەلگىلى. بىراق، پاتسيەنتتەردە تەست ناتيجەسىنىڭ وڭ بولماۋىنا قاراماستان، كوروناۆيرۋسقا ۇقساس كلينيكالىق كورىنىس تاپقان جاعدايدا، ءبىز دياگنوستيكالاۋ مەن ەمدەۋدىڭ جاڭا كلينيكالىق حاتتاماسىنا سايكەس، تەستىلەۋ ناتيجەسىن كۇتپەستەن ەمدەۋدى باستايمىز. بۇل ەمدەۋ پروتسەسىن باقىلاۋعا جانە پروتسەستى قاۋىپتى اسقىنۋلارعا دەيىن ءورشىتىپ الماۋعا مۇمكىندىك بەرەدى. بولاشاقتا وسىنداي كەلەڭسىز جاعدايلاردى بولدىرماۋ ءۇشىن جەكە-مەنشىك جەتكىزۋشىلەردى تارتۋ ارقىلى اعىمداعى قۋاتتاردى ارتتىرۋ جانە جاڭا زەرتحانالاردى اشۋ سياقتى ماسەلەلەر شەشىلىپ جاتىر"، – دەدى الماتىنىڭ باس دارىگەرى.

 

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ددسۇ QazVac-تى قاشان مويىندايدى؟

كوروناۆيرۋس • بۇگىن، 12:35

ۇقساس جاڭالىقتار