ەڭبەكمينىنىڭ باسشىسى ءوز سوزىندە قازاقستاندا 16 ناۋرىزدان 10 مامىرعا دەيىنگى تج رەجيمى كەزىندە مەملەكەت تاراپىنان بۇرىن-سوڭدى بولماعان قولداۋ شارالارى قابىلدانعانىن اتاپ ءوتتى.
"قىسقا مەرزىمدە, بىرنەشە كۇننىڭ ىشىندە, مەملەكەتتىك الەۋمەتتىك ساقتاندىرۋ قورىنان (بۇدان ءارى – ماسق) توتەنشە جاعدايدىڭ ەنگىزىلۋىنە بايلانىستى تابىسىن جوعالتقان ادامدارعا ەڭ تومەنگى جالاقى مولشەرىندە مۇلدەم جاڭا تولەم - 42 500 تەڭگە ەنگىزىلدى. بۇل تولەم بۇعان دەيىن جۇمىس ىستەپ كەلىپ, ءماجبۇرلى تۇردە جۇمىسسىز قالعان ازاماتتارعا ارنالعان. الەۋمەتتىك تولەمگە 8 ميلليون ازامات ءوتىنىش بەرىپ, كريتەريلەرگە سايكەس كەلەتىن 4,6 ميلليون ادامعا بارلىعى 321,9 ملرد تەڭگەگە كومەك تاعايىندالدى", - دەدى ءبىرجان نۇرىمبەتوۆ.
تج رەجيمىن ەنگىزۋ الەۋمەتتىك-ەڭبەك سالاسىنداعى مەملەكەتتىك قىزمەت كورسەتۋ ساپاسىنا كەرى اسەر ەتپەۋى ءۇشىن 24 قىزمەت جەدەل تۇردە egov.kz پورتالىنداعى "ەلەكتروندىق وتىنىشتەر" سەرۆيسىنە ورنالاستىرىلدى.
"تج كەزىندە 108,9 مىڭ وتباسىنا اتاۋلى الەۋمەتتىك كومەك (بۇدان ءارى – ااك) اۆتوماتتى تۇردە تاعايىندالدى. سونداي-اق, وسى كەزەڭدە مۇگەدەكتىك جانە مۇگەدەكتىك بويىنشا تولەمدەر اۆتوماتتى تۇردە 3 ايعا ۇزارتىلدى", - دەپ تولىقتىردى ءبىرجان نۇرىمبەتوۆ.
سونىمەن قاتار, مۇقتاج ازاماتتارعا ارنالعان ازىق-ت ۇلىك جيىنتىعىنىڭ ەڭ تومەنگى قۇرامى بەكىتىلىپ, ونى بەرۋدىڭ ارنايى ءتارتىبى جاسالدى.
تج كەزىندە 1 ميلليون 45 مىڭ ازامات:
- ااك الۋشىلار قاتارىنان 6 جاستان 18 جاسقا دەيىنگى 202,7 مىڭ بالا;
-109,6 مىڭ تىركەلگەن جۇمىسسىز;
- 648 مىڭ مۇگەدەك بالا, I, II جانە III توپتاعى مۇگەدەكتەر;
- مۇگەدەك بالانى تاربيەلەپ وتىرعان 84,9 مىڭ ادام ازىق-ت ۇلىك جيىنتىعىمەن قامتاماسىز ەتىلدى.
