ەندى وتكەن اپتادا تاتۋلاسۋ ورتالىعىنىڭ ارنايى عيماراتى اشىلدى. وعان قاتىسقان وبلىس اكىمى ماحامبەت دوسمۇحامبەتوۆ ەلىمىزدە داۋ-دامايلاردىڭ شەشىمىن تابۋعا ەرەكشە كوڭىل بولىنەتىنىنە توقتالدى. بۇگىندە ءتۇرلى جانجالداردى سوتقا جەتكىزبەي شەشۋدىڭ بالاما جولدارى قولدانىلۋدا. بۇل مىندەتتەر ەلباسىنىڭ جولداۋلارىندا, پرەزيدەنتتىڭ تاپسىرمالارىندا ايتىلعان.
– بىتىمگەرلىك پەن اراعايىندىق حالقىمىزدىڭ قانىندا بار. اتا-بابالارىمىز بىتىسپەس داۋدى ءبىر-اق اۋىز سوزبەن شەشكەن. كەلىسىم مەن تاتۋلىقتى اسىل مۇراعا اينالدىرعان ەلىمىز ءۇشىن بابالار قۇندىلىعىن جانداندىرۋدىڭ ماڭىزى زور. سوڭعى جىلدارى ەل ىشىندەگى داۋلاردى ازايتۋ ماقساتىندا سوت جۇيەسىندە اۋقىمدى جۇمىستار جاسالۋدا. سالاداعى رەفورمالاردىڭ ارقاسىندا داۋلاردى سوتقا جەتكىزبەۋدىڭ جاڭا تەتىكتەرى ىسكە قوسىلدى, – دەدى وبلىس اكىمى ماحامبەت دوسمۇحامبەتوۆ.
ال اتىراۋ وبلىستىق سوتىنىڭ توراعاسى باۋىرجان جۇماعۇلوۆتىڭ ايتۋىنشا, جاقىندا مەملەكەت باسشىسى قول قويعان «ازاماتتىق ءىس جۇرگىزۋ» كودەكسىنە وزگەرىستەر مەن تولىقتىرۋلار ەنگىزۋ تۋرالى زاڭ كۇشىنە ەندى.
– سوت رەفورماسىن جۇرگىزۋدىڭ جالعاسى ءارى ءبىزدىڭ باستى مىندەتىمىز – تاتۋلاستىرۋ راسىمدەرىن قولدانۋ. ەندى سوتتار ارىزداردى قابىلداپ, تاتۋلاستىرۋ سۋدياسىنا جىبەرەدى. تاراپتار تاتۋلاسۋ ارقىلى نەگىزگى سوت پروتسەسىنە كەلمەي-اق ماسەلەسىن شەشۋ ءۇشىن 14 كۇن ۋاقىت بەرىلەدى, – دەيدى ب.جۇماعۇلوۆ.
ونىڭ ايتۋىنشا, بۇل جوبا حالىقتىڭ الەۋمەتتىك وسال توپتارىنا, سونداي-اق جەكە جانە زاڭدى تۇلعالارعا قۇقىقتىق, دەلدالدىق جانە زاڭگەرلىك كومەك كورسەتۋگە باعىتتالىپ وتىر. ورتالىقتا ازاماتتارعا مەدياتورلار, بيلەر, ادۆوكاتتار, پروكۋرورلار, پسيحولوگتەر, نوتاريۋستار جانە بيزنەس-ومبۋدسمەن قۇقىقتىق كومەك كورسەتەدى. تۇرعىندارعا قولايلى جاعداي تۋدىرۋ ءۇشىن ورتالىق قاجەتتى تەحنيكالىق قۇرالدارمەن جابدىقتالعان. مۇندا كەلۋشىلەرگە مەدياتسيانىڭ ەرەكشەلىگى مەن ارتىقشىلىعى تۋرالى اقپارات بەرىلەدى.
اتىراۋ
