ۇلىبريتانياداعى Sage عىلىمي كەڭەس بەرۋ توبىنىڭ مۇشەسى, پروفەسسور پيتەر وپەنشوۋ بۇل تۋرالى لوردتار پالاتاسىنىڭ عىلىم جانە تەحنولوگيالار جونىندەگى كوميتەتىنىڭ وسى اپتادا وتكىزگەن وتىرىسىندا مالىمدەدى.
"كەيدە وسال توپتاردى ەكىنشى توپ ارقىلى قورعاۋعا بولادى, ماسەلەن, بۇل ءادىس تۇماۋعا قارسى قولدانىلادى", دەيدى پروفەسسور پ.وپەنشوۋ. ونىڭ ايتۋىنشا, اۋىر تۇماۋلارمەن ءجيى اۋىرمايتىن بالالارعا ەكپە ەگۋ ارقىلى ولاردىڭ اتا-اجەلەرىن تۇماۋدان قورعاۋعا بولادى. سول سەكىلدى مەديتسينا قىزمەتكەرلەرىنە ءبىرىنشى ۆاكتسينا سالدىرۋ قاجەت. سوندا دارىگەرلەر قابىلداۋىنا كەلگەن قارت كىسىلەردى, ەگدە ەمدەلۋشىلەردى اۋرۋدان ساقتايدى.
UCL-ءدىڭ يممۋنولوگيا پروفەسسورى ءارى بريتاندىق يممۋنولوگيا قوعامىنىڭ پرەزيدەنتى ارنە اكبار عالىمداردىڭ قارت ادامداردىڭ يممۋندىق جۇيەسىنە قاتىستى ماسەلەلەردى شەشۋى كەرەگىن ايتادى. ويتكەنى سوڭعى كەزدە ەگدە جاستاعى دەنى ساۋ جانداردىڭ وزىندە قابىنۋ بەلگىلەرى ءجيى بايقالىپ ءجۇر. "بىزگە وسى قابىنۋدىڭ قايدان جانە نەدەن بولاتىنىن ءبىلۋ كەرەك. قارت كىسىلەردەگى باستاپقى قابىنۋ السىزدىك جانە كوپتەگەن نەگاتيۆتىڭ سالدارىنان بولادى. جانە ولار Covid-19 سەكىلدى قاۋىپتى ينفەكتسيا جۇقتىرعاندا, جاعدايدى ودان سايىن ۋشىقتىراتىن سەكىلدى", دەيدى ا.اكبار.
ونىڭ ويىنشا, ەگدە ەمدەلۋشىلەرگە دەكسامەتازون سەكىلدى قابىنۋدى بولدىرمايتىن جانە Covid-19-دا ءومىرىن ساقتاپ قالاتىن ۆاكتسيناعا قوسىمشا تاعى ءبىر نارسە قاجەت.
