قازىرگى تاڭدا وبلىس بويىنشا پروۆيزورلىق اۋرۋحانالاردا 958 ناۋقاس پنەۆمونيادان ەم قابىلداۋدا. ونىڭ ىشىندە, تۇركىستان قالالىق اۋرۋحاناسىندا - 50, كەنتاۋدا 180 ادام ەمدەلۋدە. پنەۆمونيادان 198 ناۋقاس جازىلىپ شىقسا, 1 ماۋسىمنان بەرى وبلىس كولەمىندە 23 ادام اتالعان دەرتتەن كوز جۇمدى.
وڭىرلىك كوممۋنيكاتسيالار قىزمەتىندە وتكەن بريفينگتە وسىنداي دەرەكتەر كەلتىرگەن وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ تەرىس كورسەتكىش حالىقتىڭ بەيقامدىعىنان كوتەرىلىپ وتىرعانىن جاسىرمادى. باسقارما باسشىسىنىڭ ايتۋىنشا, الەۋمەتتىك جەلىلەردەگى اۋرۋحانالاردا ورىن جەتىسپەۋشىلىگى تۋرالى اقپارات شىندىققا جاناسپايدى. "قازىرگى تاڭدا وبلىس كولەمىندە ءدارى-دارمەك قورى مەن وتتەگى ورىندارى جەتكىلىكتى. ىندەتكە قاجەتتى انتيبيوتيكتەردءى الدىرۋدامىز. سونداي-اق, اۋرۋحانالاردا توسەك-ورىندار بويىنشا تاپشىلىق جوق. قوسىمشا ورىندار ازىرلەنگەن. ماسەلەن, كەنتاۋ قالالىق ورتالىق اۋرۋحاناسىندا 50 ورىندىق سوماتيكالىق بولىمشە قايتا بەيىمدەلىپ, قوسىمشا 200 ورىندىق توسەك-ورىن, 16 وتتەگى ورىندارى دايىندالدى. ال تۇركىستان قالالىق ورتالىق اۋرۋحاناسىندا قوسىمشا 270 توسەك-ورىن ازىرلەنگەن. ورىن العان جاعدايعا بايلانىستى تۇركىستان جانە كەنتاۋ قالالارىندا ناۋقاستاردى جوسپارلى جاتقىزۋ توقتاتىلعان. حقتۋ, "اكمارال", "كلينيكا تالعات" سىندى جەكە كلينيكالار دا وزدەرىنە بەكىتىلگەن تۇرعىندارعا ءتيىستى مەديتسينالىق قىزمەت كورسەتۋدە", دەدى مارات ورىنباسار ۇلى.
ال تۇركىستان قالالىق ورتالىق اۋرۋحاناسىنىڭ باس دارىگەرى جانبولات دىلدابەكوۆ وبلىس ورتالىعىندا ەكپە بولمەلەرىنىڭ تاپشىلىعىنا بايلانىستى قوسىمشا ورىندار دايارلانعانىن,توسەك-ورىن سانى ارتىپ, ناۋقاستارعا قاجەتتى ءدارى-دارمەكتەر قوسىمشا الىنىپ جاتقاندىعىن جەتكىزدى.
