وسى ورايدا, جامبىل وڭىرىندە ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «تۋعان جەر» ارنايى جوباسى اياسىندا جامبىل وبلىسىنىڭ «رۋحاني جاڭعىرۋ» جوبالىق ءوفيسى مەن بايزاق اۋداندىق اكىمدىگىنىڭ باستاماسىمەن جانە اۋىلداعى ازاماتتاردىڭ قولداۋىمەن «اسارلاتىپ ءۇي سالۋ» جوباسى قولعا الىندى. سول جاقسى ءداستۇر قايتا جاڭعىرتىلىپ, كەمىندە وڭىردەگى 300 اۋىلعا اسارلاتىپ ءۇي سالىناتىن بولدى. بۇل دا بولسا اۋىل تۇرعىندارى ءۇشىن, جالپى باسپاناسىز جۇرگەن ادامدار ءۇشىن ۇلكەن كومەك.
جامبىل وبلىسىنىڭ اكىمى بەردىبەك ساپارباەۆ تا اۋدان اكىمدەرىنە بۇل باستامانى قولدايتىنىن ايتا كەلىپ, اۋىلدى جەرلەردەگى از قامتىلعان, الەۋمەتتىك جاعدايى تومەن وتباسىلارعا اسارلاتىپ ءۇي سالىپ بەرۋ تۋرالى ۇسىنىسىن ايتقان بولاتىن. وبلىستا بۇگىندە 377 ەلدىمەكەن بار بولسا, سول اۋىلداردا بارلىعى 300 ءۇي سالىنادى دەپ كۇتىلۋدە. ءتىپتى قازىرگى كەزدە اسار بايزاق اۋدانىنىڭ ءمادىمار اۋىلىندا باستالىپ تا كەتتى. اتالعان اۋىلدىق وكرۋگ اكىمىنىڭ شەشىمىمەن 15 سوتتىق جەر تەلىمى ءبولىنىپ, 4 بالا تاربيەلەپ وتىرعان جالعىزباستى انا عاليا قۇرمانوۆاعا 4 بولمەلى ءۇي سالىنۋدا. اۋىل تۇرعىنى ج.داۋلەتوۆ ءوزىنىڭ ەسكى ءۇيىن بۇزعان كەزدە شىققان قۇرىلىس ماتەريالدارىن تەگىن بەرىپتى. بۇدان بولەك, قازىرگى كەزدە كۇردەلى جوندەۋ جۇمىستارى جۇرگىزىلىپ جاتقان ش.ءۋاليحانوۆ اتىنداعى ورتا مەكتەپتەن شىققان جارامدى قۇرىلىس ماتەريالدارى دا قاجەتكە پايدالانىلۋدا. سونىمەن قاتار, اۋىلدىڭ ءاربىر ازاماتى جاعدايىنىڭ كەلگەنىنشە قارجىلاي كومەك كورسەتۋدە. ال, اۋدان اۋماعىنداعى 18 اۋىلدىق وكرۋگتە 2020-2021 جىلدار ارالىعىندا باسپاناعا مۇقتاج 18 وتباسى تۇرعىن ۇيمەن قامتىلادى. ەندى بۇل باستاما وبلىس كولەمىندە قولداۋ تاۋىپ, اۋىلدىڭ ازاماتتارى بىرلەسىپ باسپاناعا مۇقتاج جاندارعا ءۇي سالىپ بەرەتىن بولادى.
جامبىل وبلىسى
