قازىر وسى ماقساتتا 389 جوبا ماقۇلدانىپ, تاراز قالاسى بويىنشا جۇمىس باستالىپ تا كەتتى. «جۇمىسپەن قامتۋدىڭ جول كارتاسى» باعدارلاماسى اياسىندا تاراز قالاسى بويىنشا جوسپارلانعان 389 جوبانىڭ كونكۋرسى وتكىزىلىپ, 14 ميلليارد 231,2 ميلليون تەڭگەگە 347 جوبانىڭ جەڭىمپازدارى انىقتالعان. ونىڭ ىشىندە وبلىستىق باسقارمالاردان وتەتىن نىساندار 4 742,8 ميلليون تەڭگە بولاتىن 23 جوبا, ال قالا ارقىلى وتەتىن نىساندار 9 ميلليارد 488,4 ميلليون تەڭگە بولاتىن 324 جوبا بار.
"جۇمىسپەن قامتۋدىڭ جول كارتاسى – 2020" باعدارلاماسى قالاداعى بىرقاتار ماسەلەنى شەشەدى. تاراز قالالىق اكىمدىگىنىڭ مالىمەتى بويىنشا, بۇگىندە شاھارداعى 163 كوپقاباتتى ءۇيدىڭ الدىنداعى اۋلالارعا, 96 كوشە مەن 4 كوشەنىڭ جولدارى مەن تروتۋارلارعا جوندەۋ جۇمىستارى جۇرگىزىلۋدە. "جول سالۋ, ساياباقتاردى اباتتاندىرۋ سياقتى جۇمىستاردىڭ بارلىعى وسى باعدارلاما ارقىلى بولىنگەن قاراجاتپەن جاسالۋدا. بيىل ءبىز قارجى كوزىن تاۋىپ, قالاداعى مەكتەپتەردىڭ سىرتتا ورنالاسقان دارەتحانالارىن ىشكە ورناتۋدى جوسپارلاعان ەدىك. ەندى "جۇمىسپەن قامتۋدىڭ جول كارتاسى» باعدارلاماسى بويىنشا 7 مەكتەپتىڭ ىشىنە دارەتحانا سالۋعا قارجى ءبولىنىپ, ونىڭ دا جۇمىستارى باستالدى. سونداي-اق, قالادا 6 بىردەي ءبىلىم نىسانىندا قۇرىلىس جۇمىستارى ءبىر مەزەتتە باستالدى. ترانسپورتتىق ينفراقۇرىلىم بويىنشا جالپى 92,5 شاقىرىمدى قۇرايتىن 100 كوشەنى ورتاشا جوندەۋگە 3 ميلليارد 334,3 ميلليون تەڭگە بولىنسە, قالا كوشەلەرىنىڭ شۇڭقىرلارىن قالىپقا كەلتىرۋ جۇمىستارىنا قالا بيۋدجەتىنەن 200,0 ميلليون تەڭگە ءبولىنىپ, جوندەۋ جۇمىستارى جۇرگىزىلەتىن بولادى. ال, سۇلەيمەنوۆ كوشەسىنىڭ سوڭىنداعى جاڭا القاپتا ىشكىكۆارتالدىق اۆتوموبيل جولدارىنىڭ قۇرىلىسى مەن "بۋرىل ا, ب, ۆ" تۇرعىن القابىنىڭ جولدارىنا قيىرشىق تاس توسەۋ جۇمىستارى اعىمداعى جىلى جالعاسىن تاباتىن بولادى", دەيدى تاراز قالاسىنىڭ اكىمى ايتقازى قارابالاەۆ.
سونىمەن قاتار, بيىلعى جىلى قالا كوشەلەرىنىڭ سىرتقى جارىقتاندىرۋ جۇيەلەرىن ورناتۋ جۇمىستارىنا جوبالىق-سمەتالىق قۇجاتتامالارىن ازىرلەۋگە 50,0 ميلليون تەڭگە قارجى قاراستىرىلعان. الماتى قالاسىنىڭ "Altocom Asia" جشس-ءنىڭ ۇسىنىسى بويىنشا مەملەكەتتىك-جەكەشەلىك ارىپتەستىك نەگىزىندە "اقىلدى كوشە جارىعى» جوباسى اياسىندا تاراز قالاسىنىڭ سىرتقى جارىقتاندىرۋ جەلىلەرىن قايتا جاڭعىرتۋعا ۇشجاقتى كەلىسىمشارت جاسالعان. الايدا كوروناۆيرۋس ىندەتىنىڭ سالدارىنان الماتى قالاسىنان تاۋارلاردى جەتكىزۋگە شەكتەۋ قويىلىپ, مۇمكىندىك بولماعاندىقتان, جوبا بويىنشا جۇمىستار باستالعان جوق. جوبا نەگىزىندە قالانىڭ 158 كوشەسىنە سىرتقى جارىقتاندىرۋ جۇمىستارى جۇرگىزىلىپ, قالا بويىنشا 14131 دانا شامشىراق اۋىستىرىلاتىن بولادى. تاراز قالاسى كوشەلەرىنىڭ بويىنداعى باعانالاردان ەسكى جارىق شامدارى جيناقتالىپ, جيناقتالعان شامداردىڭ جارامدىلارى كادەگە جاراتۋعا جىبەرىلەدى. بۇدان وزگە, قالاداعى ى.سۇلەيمەنوۆ كوشەسىنىڭ سوڭىنداعى 6 تۇرعىن ءۇيدىڭ قۇرىلىسىن جۇرگىزۋ, 6 تۇرعىن ءۇيدىڭ ينجەنەرلىك جەلىلەرىن جوندەۋ, اتالعان القاپتاعى جەكە تۇرعىن ۇيلەردى ەلەكترمەن قامتاماسىز ەتۋ, «داڭق» اللەياسىن اباتتاندىرۋ, "اۋەجاي" اۋماعىنداعى درەناج جەلىسىن جوندەۋ, اۋلا الاڭدارىن اباتتاندىرۋ, قوناەۆ جانە سەيفۋللين كوشەلەرىنىڭ قيىلىسىنداعى سكۆەردى اباتتاندىرۋ جانە جالپى ۇزىندىعى 41,1 شاقىرىمدى قۇرايتىن 35 كوشەنى ورتاشا جوندەۋ, تاراز قالاسىنداعى قۇبىر وتكەلدەرىن جانە لوتوكتى ارىق جۇيەلەرىن قالپىنا كەلتىرۋ سياقتى جالپى 55 نىساننىڭ جۇمىستارى باستالعان. باستالعان جۇمىستاردا جالپى 625 جۇمىس ورنى اشىلىپ, ونىڭ ىشىندە «جۇمىسپەن قامتۋ ورتالىعى» مەكەمەسى ارقىلى جالپى 264 ادام جولدانعان. الداعى ۋاقىتتا "تەكتۇرماس" تاريحي-مادەني كەشەنىنىڭ قۇرىلىسىن جالعاستىرۋ جانە "اۋليەاتا" ەسكەرتكىشىنىڭ اۋماعىن اباتتاندىرۋ جۇمىستارى قولعا الىنىپ, ماگيسترالدىق-كوممۋنيكاتسيالار جەلىسى جانە "وقۋشىلار سارايىنى" قۇرىلىسى جۇرگىزىلەتىن بولادى. بۇگىندە "تەكتۇرماس" ەتنوتاريحي كەشەنىن قايتا جاڭعىرتۋدىڭ ەكىنشى كەزەڭى باستالىپ كەتتى. جوسپار بويىنشا ەسكى بەكىنىس جوندەلىپ, كەشەن شەكاراسى كىرپىشتەرمەن قالانعان قابىرعامەن قورشالاتىن بولادى. ونداعى باقىلاۋ الاڭدارى مەن قامال اللەيامەن جالعاسىپ, بۇل جەرگە وبلىستىڭ تاريحي نىساندارى مەن جادىگەرلەردىڭ ماكەتتەرى ورنالاسادى. بەكىنىس پەن باقىلاۋ الاڭدارىنىڭ اراسىندا ۇزىندىعى 15-20 مەتر بولاتىن پانورامالىق پانەل جوباعا ەنگەن. مۇندا ەل تاۋەلسىزدىگى تاريحىنداعى ماڭىزدى وقيعا – اتلاح جانە اڭىراقاي شايقاستارى تۋرالى قۇندى دۇنيەلەر كورىنىس تابادى. بۇدان بولەك, جاعالاۋ, توعان جانە جاساندى سارقىراما سالۋ دا كوزدەلىپ وتىر. تاعى ءبىر ۇلكەن جوبا – "قاراسۋ" القابىندا "دەنساۋلىق" ساياباعى بوي كوتەرەدى. ساياباقتا بىرنەشە سپورت الاڭدارى, ۆەلوسيپەد جولاعى جانە workout الاڭشالارى اشىلادى دەپ كۇتىلۋدە. سونداي-اق, تاراز قالاسىندا بوي كوتەرەتىن "اناعا تاعزىم" ەرەكشە عيماراتى دا كونە شاھاردىڭ كورىكتى جەرلەرىنىڭ بىرىنە اينالادى. قازىرگى تاڭدا انالاردىڭ قۇرمەتىنە ارنالعان ەسكەرتكىشتىڭ ماكەتى ازىرلەنۋدە. سونىمەن قاتار, قازاق حاندىعىنىڭ 550 جىلدىعىنا ارنالعان ەسكەرتكىش ماڭىندا ەتنواۋىل پايدا بولادى. جۋىردا "اربات-3" جاياۋ جۇرگىنشىلەر اللەياسىنىڭ قۇرىلىس جۇمىستارى اياقتالىپ, بىرەگەي ساندىك ەلەمەنتتەر مەن جارىقتارمەن بەزەندىرىلگەن اللەيا تاراز قالاسىنىڭ كورىكتى جەرلەرىنىڭ بىرىنە اينالادى.
جامبىل وبلىسى
