بۇل جاڭالىقتى بارلىق باق وكىلدەرى جارىسا جاريا ەتتى. ويتكەنى, مەنايوتين قاتارداعى كوپ بوكسشىلاردىڭ ءبىرى ەمەس. ول 2007 جىلدان بەرى كاسىپقوي رينگتە ونەر كورسەتىپ ءجۇر. 2014 جىلدىڭ كۇزىندە مەكسيكانىڭ مىقتىسى وسۆالدو نوۆونى ۇپاي سانىمەن ۇتقان تايلاندتىڭ تاستۇلەگى WBC نۇسقاسىنىڭ التىن بەلبەۋىن يەلەنەدى. شارشى الاڭدا بارلىعى 54 كەزدەسۋ وتكىزگەن ۆانحەنگ مەنايوتين سونىڭ بارلىعىندا جەڭىسكە جەتتى. بۇل – رەكوردتىق كورسەتكىش! تىپتەن, ول اتاعى جەر جارعان امەريكالىق فلويد مەيۆەزەردىڭ ءوزىن باسىپ وزدى. وسىلايشا, ونىڭ ەسىمى جەڭىلمەگەن كۇيى ۇلكەن سپورتپەن قوش ايتىسقان ساناۋلى عانا بوكسشىلاردىڭ ءبىرى رەتىندە تاريحتا قالۋعا ءتيىس ەدى.
الايدا ارادا ەكى تاۋلىك وتپەي جاتىپ 34 جاستاعى تاي بوكسشىسى شارشى الاڭعا قايتا ورالاتىنى جايىندا جاريا ەتتى. ەندى ول الداعى ۋاقىتتا ءوز اتاعىن قورعاۋ ءۇشىن جەكپە-جەككە شىعادى. مەنايوتيننىڭ كىممەن جانە قاشان جۇدىرىقتاساتىنى ازىرگە بەلگىسىز.
